КИТОБГА МЕҲР
Таниқли ўзбек ёзувчиси Ўткир Ҳошимов "Дафтар ҳошиясидаги битиклар” китобида шундай ёзади: "Эътибор берганмисиз – йўқми, билмадим-у, Сизнинг садоқатда тенги йўқ дўстингиз бор. Қачон хоҳласангиз сиз билан ҳамсуҳбат бўлади. Билмаганингизни ўргатади. Адашсангиз тўғри йўл кўрсатади. Яқин кишиларингиз бурилиб кетганида ҳам у сизни тарк этмайди. Хизмати учун ҳеч нима таъма қилмайди. Йиллаб унутиб ташлаб қўйсангиз, индамайди. Тағин чорласангиз, етиб келиб, хизматингизни қилаверади...”
... Бу дўстнинг номи – Китоб!
Ҳақиқатан ҳам китоб – бизнинг беминнат дўстимиздир. Китобга меҳр болаликдан бошланади. Болага ҳар хил эртак, бадиий китоблар мутолаа қилиш катта фойда беради. Айниқса соғлом боланинг камол топишида бадиий китобларнинг ўрни беқиёсдир.
Албатта, китоб мутолаасида катталарнинг ҳам ташаббускорлиги зарур. Сабаби, бола ота-онадан, ака-опадан ўрнак олиб улғаяди. Шундай экан, болани китобга меҳр руҳида тарбиялаш лозим. Тан олишимиз керакки, бугунги кунда боласига китоб олиб бераётган ота-оналар кам. Менимча, ота-оналар боласига фалон сўмлик мобил телефонлар, турли хил бўлмағур дисклар ўрнига инсонни ҳар томонлама етук, маънан соғлом қилиб тарбиялайдиган, ҳаётда тўғри йўл кўрсатадиган китобларни олиб беришса, мақсадга мувофиқ бўлур эди. Сабаби, китоб инсонга маънавий озуқа берувчи, унинг онгини, дунёқарашини ўстирувчи самарали воситадир. Мен дугоналаримга ҳам китоб мутолаасини тавсия қилган бўлардим.
Бизнинг коллежимизда рус тили ва адабиёти фанидан дарс берувчи севимли ўқитувчимиз Нигора опа Саъдуллаеванинг биз ўқувчи ёшларнинг китобга меҳр қўйиб улғайишимизда ҳиссалари катта. Адабиётдан ўтаётган ҳар бир мавзуни ва ҳар бир бадиий асарни шу қадар онгимизга сингдира биладиларки, биз ҳам бевосита худди мана шу асар қатнашчисига айланиб қоламиз.
Биз шогирдларнинг маънан соғлом, баркамол инсонлар бўлиб камол топишимизда муҳим аҳамият касб этувчи мана шундай – китобни улуғлайдиган чинакам китобсевар ўқитувчимиз омон бўлсин!
Китоблар ҳақида сўз кетар экан, бир қизча эсимга тушади.У туманимиздаги 55-сонли умумтаълим мактабининг 7-синф ўқувчиси Барчиной Қозоқбоевадир. Ёш бўлишига қарамасдан, кўплаб жаҳон адабиёти ва ўзбек адабиёти намояндаларининг асарларини мутолаа қилган ва қилмоқда. Бадиий китоблар оламига боғланиб қолган бу қизча мактабда ҳам аъло баҳоларга ўқийди. Унга айниқса, Ў.Ҳошимовнинг "Дафтар ҳошиясидаги битиклар”, Шукруллонинг "Кафансиз кўмилганлар” каби асарлари ёқади. Ҳозирда у Марк Твеннинг "Овсар Вильсон” асарини мутолаа қилмоқда.
Орамизда Барчинойга ўхшаган ёш китобхонлар жудаям кўп. Бу - қувонарли. Чунки, китоб - беминнат тарбиячидир.
Азиза МАДРАҲИМОВА,
Манғит иқтисодиёт касб-ҳунар коллежи ўқувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
