URUSh, NOMING OʻChSIN JAHONDA!

Urush... Bu soʻzni shunchaki aytish yo tinglash mumkin emas. Chunki, bu soʻz zamirida xonavayron boʻlgan shahar, qishloqlar, izdan chiqqan hayot, necha minglab yigit yoshida shahid ketgan jonlar, ayriliq, jabr-u sitamlar bor, yo otasi, yo tugʻishganidan ayrilib, bir umr koʻngli kemtik boʻlib yashayotgan umrlar bor.

Shuning uchun ham ikkinchi jahon urushida erishilgan gʻalabaga ulkan hissa qoʻshgan, nainki oʻz yerimiz, necha-necha davlatlarni ham fashizm balosidan qutqarib, tinch-osuda hayot oʻrnatishga koʻksini qalqon qilgan insonlarga yuksak hurmat-ehtirom koʻrsatamiz, avaylaymiz, bugungi dorilomon kunlar zavqini surib yashashi uchun gʻamxoʻrlik qilamiz.

Ikkinchi jahon urushida qozonilgan buyuk gʻalabaning 70 yilligi nishonlanadigan kunni koʻrish baxtiga tumanimizning 16 nafar urush faxriysi muyassar boʻlmoqdalar.

Ayni kunda ularni qutlugʻ ayyom bilan muborakbod etish, xotiralarini tinglash uchun tumanimizdagi korxona, tashkilotlar xodimlari, umumtaʼlim, kasb-hunar taʼlimi muassasalari oʻqituvchilari, oʻquvchilari ana shu tabarruk insonlar bilan uchrashuvlar tashkil etishmoqda, uylariga tashrif buyurishmoqda, bayram sovgʻalari ulashmoqda.

Yaqinda ana shunday uchrashuvlardan biri Amudaryo akademik litseyida boʻlib oʻtdi.

Uchrashuvda 3 nafar urush faxriylari – "Bogʻ” mahallasida istiqomat qiluvchi Yoʻldosh Ortiqov, Navoiy nomli mahalladan Sobir Nurullayev, Yoʻldosh Tojimurodovlar va xalq taʼlimi faxriysi Turdiboy Bozorboyevlar ishtirok etdilar.

Shuni aytish kerakki, mazkur muassasa ustoz-murabbiylari va oʻquvchilari har yili 9-may - Xotira va Qadrlash kuni bayrami arafasida tumanimizdagi barcha urush faxriylari holidan xabar olib, sovgʻa-salomlar berib, ularning duolarini olib kelmoqdalar. Bu yil ham har yilgi anʼana davom ettirildi. Oʻquvchilar ustozlari bilan urush faxriylarining barchasining xonadonida boʻlib, bayram bilan qutladilar, urush mashaqqatlari, urushdan soʻnggi ogʻir tiklanish yillaridagi xotiralarini tingladilar, bugungiday dorilomon kunlar zavqini surib, uzoq yashashini tiladilar.

Oʻzlariga yuksak ehtirom koʻrsatib kelayotgan oʻqituvchilar, oʻquvchilar bilan uchrashish urush faxriylari uchun ham quvonarli voqea boʻldi. Litsey oldida saf tortib, qarshi olgan oʻquvchilardan minnatdor boʻlib, koʻngillari shodlikka toʻlib, muassasa zaliga kirdilar.

Yigʻilganlarni litsey direktori Otabek Yoʻldoshev 9-may - Xotira va Qadrlash kuni bilan qizgʻin qutladi.

- Men urushga joʻnaganimda, 1942-yil iyulda 20 yashar yigit edim, - deya soʻzini boshladi Yoʻldosh Tojimurodov. – Sobiq Kuybishev nomli kolxoz hisobidan armiyaga chaqirilganman. Chaqiruv qogʻozi olganimizning ertasigayoq Mangʻitdan Urganchga qarab, yuklarimiz aravada, oʻzimiz piyoda yigirma chogʻli yigitlar yoʻlga tushdik. Keyin paroxodda, poyezdda Toshkentga yetdik. Qisqa muddatli tayyorgarlikdan soʻng, ikkinchi Ukraina frontining desantchilar qismida urushga kirdim. 1943-yilning oxirigacha boshimizdan oʻtganlarini aytsam, xuddi ertakdek. Eshitgan quloq ishonmas darajadagi mashaqqatlarga chidab, jang qilardik. Ruminiya, Vengriyani nemislardan tozalashda qatnashdim. Chap qoʻlimdan oʻq yeb, gospitalda yotib davolandim va yurtimga qaytdim. Ovulimga kelib koʻrsam, bularning holi ham frontdagidan kam emas ekan. Xalq och, undirgan hosilini hatto urugʻligigacha askarlarga joʻnatgan, qahatchilik edi.

Dunyoda bizning xalqimizday sabr-toqatli, qanoatli xalq bormikan, - deb oʻylab qolaman baʼzan. Biz bir-birimizga mehr-oqibatimiz, hamjihatligimiz tufayli ana shunday mashaqqatlarni ham yengdik. Yaratganga beadad shukr, mana bugungiday kunlarga yetib keldik. Ilohim, endi avlodlarimiz urush koʻrmagay. Yer yuzida tinchlik-osoyishtalik boʻlgay!

-Bizga koʻrsatilayotgan hurmat-ehtiromdan koʻnglimiz togʻday yuksaladi, - deydi Yoʻldosh Ortiqov minnatdorchilik bilan. – Buning uchun davlatimizga, tumanimiz rahbariyatiga ming-ming rahmat.

- Mening Sizlarga tilagim, aziz yoshlar, ogʻir mashaqqatlar evaziga yurtimizda oʻrnatilgan tinchlikni, mustaqillikni asrab-avaylang, qadrlang, - deydi Sobir Nurullayev.

Chindan-da tinchlik - ulugʻ neʼmat. Bugun amalga oshirilayotgan barcha sohalardagi ulkan bunyodkorliklar, yuksalishlarning tub asosi ham yurtimizdagi osuda va tinch hayotdir.

"Nuroniy” jamgʻarmasi tuman boʻlinmasi raisi B.Ollamberganovning maʼruzasini ham barcha diqqat-eʼtibor bilan tingladi.

Faxriylar tilaklariga hamohang tarzda sahnaga chiqqan oʻquvchilar tinchlikni, osoyishtalikni ulugʻlovchi, mustaqilligimizni madh etuvchi sheʼrlar, qoʻshiqlar ijro qildilar. Xalq taʼlimi faxriysi Turdiboy Bozorboyevning ona Vatanimizga, Navroʻz bayramiga atalgan sheʼrlarini miriqib tingladilar. Har satrida shukrona balqib turgan, tinchlikni asrashga chorlaguvchi qoʻshiq, harir libosda, oʻzbekona odob-ikrom bilan mayin harakatlar ila ijro etilgan raqs hammani oʻziga sehrladi.

Bu dolgʻali dunyoning turli burchaklarida tinchlikka raxna solishga, urush olovini yoqishga, hali oqqorani tanib ulgurmagan oʻsmirlarni haq yoʻlidan ozdirishga urinayotgan manfur kimsalar bor ekan, beparvo, loqayd yashashga haqqimiz yoʻq. Shu Vatan, shu aziz tuproqni koʻz qorachigʻiday asrashga har birimiz burchlimiz. Bu yoʻlda yuksak matonat egalari boʻlgan faxriylarimiz oʻgit-nasihatlari bizga dasturilamaldir.