ENG BAXTLI MAMLAKAT FUQAROSIMIZ
Bu yilgi 9-may – Xotira va qadrlash kuni bayrami yurtimizda nihoyatda hamjihatlik, oʻzaro mehr-oqibat, burchga sadoqat, ota-bobolar jasoratiga cheksiz hurmat tamoyillari asosida oʻtdi.
Men buni oynai jahon qarshisida oʻtirib, mamlakatimizda inson omiliga, ayniqsa, yoshi ulugʻ insonlarga koʻrsatilayotgan eʼtibor va eʼzozda koʻrdim.
Muhtaram Prezidentimiz xotira maydonidagi nutqida Ikkinchi jahon urushining insoniyat boshiga yogʻdirgan mislsiz kulfatlari haqida gapirar ekan, oʻzbek xalqining eng asl oʻgʻlonlari fashizm qurboniga aylanganligini, onalarimiz, farzandlarimiz chekkan azob-uqubatlarni birma-bir tilga oldilar.
" - Oʻzbekistonda oʻsha paytda 6,5 milliondan ziyod aholi yashagan boʻlsa, - dedi Yurtboshimiz oʻz nutqida, - shuning 1,5 milliondan koʻprogʻi urushda qatnashganining oʻzi, qisqa qilib aytadigan boʻlsak, barcha erkaklar, mardlarimiz qoʻliga qurol olib, yagona dushmanimizga qarshi chiqqanidan dalolat beradi.”
Shuningdek, Prezidentimiz yarim milliondan ziyod yurtdoshlarimiz bu urushda halok boʻlganini, urush boshidanoq front hududlaridan Oʻzbekistonga koʻchirilgan 1 millionga yaqin oila va bolalarni xalqimiz bagʻriga olib, oxirgi bir burda nonini ham ular bilan baham koʻrganini, mehr-muruvvat koʻrsatganini, millatlararo totuvlik Oʻzbekistonda hamisha qadrlanishini taʼkidladilar.
Ota-bobolarimiz beshafqat jang maydonlarida mardlik va matonat koʻrsatgani uchun ularning 338 nafari Sovet Ittifoqi Qahramoni unvoniga sazovor boʻlgani, minglab yurtdoshlarimiz jangovar orden va medallar bilan taqdirlangani ularning jasoratidan dalolatdir.
Mening qalbimni toʻlqinlantirgan xushxabardan esa koʻzlarimdan quvonch yoshlari sizib chiqqanini aslo yashirmayman. Qarang, chet el olimlari oʻtkazgan "Dunyoning eng baxtli mamlakatlari” mavzusidagi tadqiqot natijalariga koʻra, ona Oʻzbekistonimiz dunyoning 158 ta mamlakati orasida 44-oʻrinni, MDH davlatlari orasida esa faxrli 1-oʻrinni egallagan!
Bir paytlar sobiq ittifoq tarkibidagi ijtimoiy ahvoli nochor, qoloq davlatlardan biri, deb hisoblangan ona Oʻzbekistonimiz istiqlol sharofati, Yurtboshimizning oqilona siyosati va xalqimizning fidokorona mehnati tufayli oʻsha davlatlar orasida eng baxtli mamlakat boʻlgani har birimizga gʻurur, iftixor bagʻishlaydi, albatta.
Shu baxtli mamlakatning oʻttiz milliondan ortiq baxtiyor fuqarolari qatori men ham jannatmakon Vatanda yashayotganimga, inson mehnati, qadr-qimmati ulugʻlangan farovon hayotga yetishganimga ming-ming shukronalar aytaman. Iloho, yurtimizdagi tinchlik va taraqqiyotga koʻz tegmasin!
Ibrohim ISMOILOV,
xalq taʼlimi faxriysi.
(Foto - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
