Oilamiz boʻlsa birdam, gʻalaba bizga hamdam

Mahalla yoshlari hamda oilalar orasida sportni keng ommalashtirish, aholi va yoshlarning boʻsh vaqtini mazmunli tashkil etish maqsadida anʼanaviy tarzda oʻtkazilayotgan "Biz – aql-idrokli oilalarmiz” hamda "Otam, onam va men – sportchi oila” sport musobaqalarining qamrovi yil sayin kengayib bormoqda. Ushbu musobaqalarning hududiy-saralash bosqichlarida yuzlab yoshlarning ishtirok etayotgani fikrimizning tasdigʻidir. Xususan, oilaviy musobaqalarning tuman bosqichlarida 47 ta fuqarolar yigʻinidan 20 taga yaqin oilalar ishtirok etdi.

Bu gal ham musobaqalarning tuman bosqichi murosasiz bahslarga boy boʻldi. Oʻtgan yillardagi musobaqalardan oʻzgacha, koʻtarinki tarzda oʻtkazilgan oilaviy shaxmat-shashka musobaqasi ham taassurotlarga boy boʻldi. 

- Yoshligimdan shaxmat oʻynash bilan shugʻullanaman, - deydi Yangiobod mahallasidan Azizbek Rahimov. -   Darsdan boʻsh vaqtlarimda otam, onam bilan shaxmat oʻynaymiz. Shaxmatga boʻlgan mehrim, qiziqishim bobomdan oʻtgan. Oilaviy oʻyinlar orqali mahoratimni oshirib boryapman.

Durunki mahallasidan Zafar Qurbonovning aytishicha, oila aʼzolarining barchasi shaxmat va shashkaga doʻst tutingan, ayniqsa, shashkaga. Bunday sogʻlom muhit oʻgʻli Ravshanbekning shashka va shaxmatga boʻlgan ishtiyoqini oshirayotir.

- Bugungi musobaqada buvim, otam-onam va ukam bilan birgalikda ishtirok etdik, - deydi u. – Bellashuvda koʻplab doʻstlar orttirdim. Ular oʻz qiziqishlari haqida gapirib berdi. Buvim, otam, onam va men birdam boʻlib gʻoliblikni qoʻlga kiritdik.

Ravshanbekning xotirasida bugungi kun bir umrga muhrlanib qolishi tayin.

30 yoshdan 35 yoshgacha boʻlgan ota-ona, 10 yoshdan 14 yoshgacha boʻlgan 2 nafar bolalardan iborat sportsevar oilalar oʻrtasidagi musobaqaning tuman bosqichida saralash bosqichda gʻoliblikni qoʻlga kiritgan 10 ta oilalar ishtirok etdilar. 7 ta shartdan iborat boʻlgan bellashuvni baholash, gʻolib oilani belgilash hakamlar uchun oson boʻlmadi, chunki barcha ishtirokchilar oʻta chaqqon va epchil ekanligi yaqqol koʻrinib turardi. Bahslarga boy boʻlgan musobaqada Namuna ma-hallasidan Zarifboy Eshniyozov oilasi 3-oʻrinni, Qilichboy ovulidan Alisher Jumaniyozov oilasi 2-oʻrinni,  oʻrta qalʼali Bahodir Yoqubov oilasi eng yaxshi sportchi oila deb topilib, faxrli 1-oʻrinni egalladilar.

"Biz – aql-idrokli oilalarmiz” sport musobaqasining shaxmat turi boʻyicha gʻoliblikni qoʻlga kiritgan Yangiobod mahallasidan tumanimizning eng namunali shaxmatchilari, faxriy otaxon Bekjon Rahimovlar oilasini, Durunki mahallasidan eng namunali shashkachilar Zafar Qurbonovlar oilasini, "Otam, onam va men – sportchi oila” sport musobaqalarida Qoraqalpogʻiston Respublikasi bosqichiga yoʻllanmani qoʻlga kiritgan Oʻrta qalʼa ovulidan Bahodir Yoqubov oilasini "Mahalla” xayriya jamoat fondi tuman boʻlinmasi nomidan yana bir bor muborakbod qilamiz!

Oʻzaro doʻstlik bayramiga aylanib ketgan sport musobaqalari koʻtarinki ruhda yakunlandi. Ishtirokchilar turli nominatsiyalar boʻyicha tashkilotchilarning diplom, Faxriy yorliq va esdalik sovgʻalari bilan taqdirlandilar.

Gavhar ChIMBAYChIYeVA, "Mahalla” xayriya jamoat fondi tuman boʻlinmasi boshqaruvi bosh mutaxassisi.

(Foto - http://uza.uz)