QUShNING HAM UYaSI BUZILMASIN!

Bugungi kunda mamlakatimizda oilalarda sogʻlom turmush tarzini qaror toptirishga, mustahkamligiga erishishga, yosh oilalarni namunali oilalar tajribalari asosida tarbiyalashga va shu tufayli ularda ham oʻzaro mehr-oqibat, bir-biriga ishonch, oʻzaro birdamlik, hamjihatlikni qaror toptirishga ulkan ahamiyat berilayotir. Oilalarda asrlar davomida shakllangan hamjihatlikni taʼminlashga, farzandlar tarbiyasiga doir bilim va tajribalarni qunt bilan oʻrganish, bu boradagi urf-odatlar, anʼanalarning, qadriyatlarning ahamiyatini keng targʻib etish va turmushimizdagi jilosini toʻlaligicha saqlab qolish tobora muhim ahamiyat kasb etmoqda. Negaki, keyingi yillarda jamiyatimizning kichik boʻgʻini boʻlmish oilaning muqaddas goʻsha ekanligi, undagi tinchlik, totuvlik, hamjihatlik farzandlarning barkamol boʻlib voyaga yetishiga bevosita aloqadorligi ayrim yosh oilalar nazaridan chetda qolmayapti.

Farzandlarimiz dunyoga kelib ulgʻayadigan, barcha orzu-umidlarimiz beshigi boʻlgan, barchamiz bagʻriga talpinib yashaydigan qutlugʻ maskanimiz – oilalarimizning tinchligi, obodligi butun jamiyatimizning tinchligi, obodligidir.

Bugungi kunda oilalar mustahkamligiga erishish vazifasi shu boisdan ham dolzarb va ayni paytda barchamizga daxldordir.

Oʻtgan yilda tumanimiz boʻyicha 1787 ta nikoh qayd etilib, 78 ta ajrim, joriy yilning oʻtgan davrida esa 710 ta nikoh, 31 ta ajrim qayd etilgani va ajralishga qaror qilganlarning koʻpchiligi 30 yoshgacha boʻlgan er-xotinlar ekanligi - yoshlarning hali mustaqil hayotga tayyor boʻlmay turib oila qurayotganlarini, shunchaki hoyu-havas uchun, dabdabali marosim, sarpolar, oʻz tengqurlaridan oldinda boʻlish, boshqalarning havasini keltirish uchun toʻy qilayotganliklarini koʻrsatib turibdi. Ular bu qadamni qoʻyish uchun oʻzlariga nechogʻlik bilim, masʼuliyat va hayotiy tajribalar kerak boʻlishini oʻylab ham koʻrmaydilar va taqdirning ilk zarbalariga chora topolmay, ajrashib ketadilar.

Yosh oilalarning mustahkamliligiga erishishda ota-onalarning sabr-toqati, bagʻrikengligi va oila qonuniyatlarini erinmay tushuntirishlari ham juda muhim. Afsuski, bu borada kattalardan ham baʼzan xatoliklar oʻtib turadi.

Bobur nomli ovulda ikki kelinlik oilaning kichigi oʻqituvchi, kattasi uy bekasi edi. Qaynona muallima kelinni bozorga ergashtirib borib, yangi koʻylak olib bergan. Katta ke-linning menga-chi, - degan savoliga qaynona: "Sen uydasan, u ishlab, oylik olayapti”, - deb javob bergan. Bundan katta kelinning qaynonasidan koʻngli qolib, oila tinchligi buzilgan. Agar shu oʻrinda qaynona unga ovsining ishga boradi, shuning uchun unga kiyim zarurroq edi, senga ham imkoniyat tugʻilgan vaqt olarmiz, - deb yotigʻi bilan tushuntirganida, yuqoridagi koʻngilsizlik yuz bermagan, katta kelin ikki oy ota uyida yashab, oʻrtada norasida goʻdaklari dilgir boʻlishmasdi. Chunki qaynona nevaralarini jonidan ortiq suyub, ardoqlab parvarish qilarkanki, ular onasiga ergashmay, enasi bilan qolgan ekan. Endi bagʻridagi bolasini qayn uyida tashlab, ikki oy ota uyida yashagan kelinning ahvolini tasavvur qilib koʻrish qiyin emas.

Oddiygina koʻringan shugina bir muammo ham ikki oilaning maʼlum muddat tinchligini buzdi.

- Oʻylab koʻrib, turmush oʻrtogʻim, farzandlarim bilan kulib-oʻynab yashagan har bir kunim mingta koʻylakdan afzal ekanini tushunib yetdim. Biroq, sen ishlamaysan, deb enamning kamsitganidan dilim qattiq ogʻridi, - deydi katta kelin kulimsirab.

Bu nizoning oxiri baxayr boʻlganini, kelinning iqrorini eshitib, biz ham quvondik. "Beayb parvardigor, qaynona ham baʼzan nomaqbul soʻz aytib qoʻyishi mumkin, kechirimli boʻlib, ikkingiz ham yaxshi qilibsizlar”, - deya alqadik qaynona-kelinni. Axir qushning ham uyasi buzilmasin, - degan gap xalqimizning yillar sinovidan oʻtgan iborasi emasmi?

Adashganning aybi yoʻq, qaytib yoʻlini topsa. Qaniydi, hamma oilalarda ham xatoliklarning oxiri baxayr boʻlaversa, ajrim degan hukmga oʻrin qolmasa, begunoh norasidalar tirik etim boʻlib qolishmasa...

Oygul RAJABOVA.