OBOD UY-JOYLAR — FAROVONLIK TIMSOLI

Bugun mamlakatimizning, tumanimizning qaysi hududiga bormang, xalqimizning turmushi farovonligidan darak beruvchi ravon yoʻllar, did va yuksak mahorat bilan rejalashtirib qurilgan fayzli koʻchalar, obod hovli-joylarni koʻrasiz. Biri – biridan chiroyli va ixcham zamonaviy andozalarda taʼmirlangan va bezatilgan hovli-joylar atrofini turli mevali, manzarali daraxtlar, gullar bezab tursa, tomorqasida qulf urib oʻsib turgan turli ekinlar yurtdoshlarimizning zaxmatkashligi, mehnatsevarligidan dalolat berib turadi, koʻrib koʻzimiz quvonadi. Oʻz mehnatimiz bilan turmushimizning sifati tobora yuksalayotganidan qalbimiz faxr-iftixorga toʻladi.

Yurtboshimiz tashabbusi bilan bugungi obodlikning, farovonlikning tamal toshi necha yillar muqaddam qoʻyilganini hammamiz ham bilavermaymiz.

1989-yilning 17-avgustida I.Karimov boshchiligida oʻtkazilgan respublika hukumati yigʻilishida oʻsha vaqtdagi murakkab vaziyat hisobga olinib, yurtimiz aholisiga tomorqa va yakka tartibda uy-joy qurishi uchun yer uchastkalari ajratib berish, uy-joy qurish uchun barcha sharoitlarni yaratish masalasi muhokama etiladi. Oʻsha yigʻilishdan bir kun avval Oʻzbekiston rahbari tarixiy hujjat – "Qishloqda yashovchi har bir oilani tomorqa bilan taʼminlash, ularga yakka tartibda uy-joy qurish uchun barcha shart-sharoitlarni yaratib berish haqida”gi qarorni imzolagan edi. Oʻsha tarixiy qaror qishloq aholisi hayotining biroz boʻlsa-da oʻnglanishida  ahamiyatli boʻldi. Koʻpgina yosh oilalar hovli-joyli boʻldi, ogʻir damlarda tomorqasi oila iqtisodiga ishonchli madad boʻlib turdi.

Shuningdek, Prezidentimizning 1992-yil 19 avgustdagi "Uy-joylar xususiylashtirilishi munosabati bilan aholining kam taʼminlangan tabaqalarini ijtimoiy himoyalashga oid qoʻshimcha tadbirlar toʻgʻrisida”gi Farmoniga muvofiq, kam taʼminlangan toifalarga mansub fuqarolar, ehtiyojmand oilalar yashab turgan yoki doimiy roʻyxatdan oʻtkazilgan xonadonlar va alohida uylar shu fuqarolarga bepul shaxsiy mulk qilib berildi.

Bu insonparvarlik tufayli aholining ijtimoiy himoyaga muhtoj qismi oʻtish davri qiyinchiliklaridan himoya qilindi, boquvchisini yoʻqotgan, koʻp bolali oilalar, nogironlar uy-joyli boʻldi.

Qishloq aholisi hayotini zamonaviy mezonlarga javob beradigan darajaga koʻtarishga, qishloqlarni har tomonlama rivojlangan obod maskanlarga aylantirishga, infratuzilma tarmoqlarini rivojlantirishga davlatimiz rahbari istiqlol yillarida ayniqsa, asosiy vazifalardan biri sifatida ulkan eʼtibor qaratdi. Bu eʼtibor bugungi kunda hayotimizda oʻzining chinakam samarasini koʻrsatmoqda. Biri-biridan obod, fayzli manzillar safiga yurtimiz koʻrkiga koʻrk qoʻshayotgan namunaviy loyiha asosida uy-joylar qurilishi yoʻlga qoʻyilgani, mazkur uy-joylar asosan yangi hovli joylarga ehtiyojmand yosh oilalarga berilayotgani keyingi yillarda aholining bu boradagi xohish-irodasiga juda mos tushmoqda. Bu xayrli ishlar Oʻzbekiston Respublikasi Prezidentining 2009-yil 3-avgustdagi "Qishloq joylarda uy-joy qurilishi koʻlamini kengaytirishga oid qoʻshimcha chora-tadbirlar toʻgʻrisida”gi 1167-sonli qaroriga muvofiq amalga oshirilmoqda. Mazkur qarorga muvofiq birgina tumanimizning oʻzida shahardagidan qolishmaydigan qulaylik va sharoitlarga ega 287 ta uy-joylar qurilib, foydalanishga topshirildi. Joriy yilda 75 ta ana shunday uy-joylar qurilmoqda.

- Bu uylarning uzoq muddatli kreditlar hisobiga qurib berilayotganligi ayniqsa yosh oilalar uchun juda qoʻl kelayapti, - deydi mustaqilligimizning 24 yilligi arafasida "Oʻrta qalʼa” ovulida yangidan qad rostlagan ana shunday hovlilardan biriga koʻchib oʻtgan "Mikrokreditbank”ning Mangʻit filiali boshqaruvchisi Alibek Omonov.

Asli "Boʻzyop” ovulida tugʻilib oʻsgan, oiladagi olti nafar farzandning biri boʻlgan Alibek Omonov 2008-yilda Qoraqalpoq Davlat Universitetining iqtisodiyot fakultetini bitirib kelganidan beri mazkur bankda ishlab kelayapti. 2013-yilda esa boshqaruvchi etib tayinlandi.

Har bir farzandiga uy-joy qurib, orzu-havas bilan roʻzgʻorini boʻlaklab berishni orzu qilmaydigan ota-ona bormi? Bir umr Xitoy MMTPda turli lavozimlarda, ayni kunda esa yer tuzuvchi muhandis boʻlib ishlayotgan otasi Abdulla ogʻaga, onasiga, tugʻishganlariga Alibekning yangi hovliga koʻchib oʻtishi ulkan bayram boʻldi. Quvonmay boʻladimi shunday koʻrkam, zamonaviy, qulay sharoitlar yaratilgan hovli uchun!

- Men koʻpincha ishda boʻlaman. Oʻz kuchimiz bilan uy quraman, deb goh qurilish materiallari, goh usta izlab ovora boʻlmasdan yangi hovliga koʻchish ayniqsa, menga qulay boʻldi, - deydi Alibek Omonov.

Tumanimizda Alibek singari yangi hovli-joyga ehtiyoji bor yosh oilalar uchun namunaviy loyihalar asosida uy-joylar qurilishi kelgusida ham davom ettiriladi. Qanchadan-qancha yosh oilalarning obod va farovon turmushiga asos yaratilaveradi.