AHDI QATʼIY USTOZ

Oʻqituvchi boʻlishni, ustozi kabi sinfxonada tizilishib oʻtirgan qorakoʻzlarni ilm dunyosi sari yetaklab, ularning sevimli insoniga aylanishni istamagan bola bormikan? Shu moʻʼtabar zotlarga havas qilib tengqurlari bilan "maktab, maktab” oʻynamagan-chi?

Umrning begʻam, shodliklarga toʻla eng masʼum davridagi buningdek ilk orzu-havaslar keyinchalik baʼzilarning hayoti mazmuniga aylanib ham qoladi.

Hulkar Qurbonboyeva dastlab oʻzi taʼlim olgan 38-umumtaʼlim maktabidagi boshlangʻich sinf oʻqituvchisi Safarboy Qurbonboyev, ona tili va adabiyot oʻqituvchisi Guljon opa Davlatboyeva, Soatboy aka Begimovlarga havas qilib, oʻqituvchi boʻlishni orzu qilgan edi. Oliy maʼlumotli stomatolog shifokor, adabiyotni sevadigan, oʻzbek mumtoz adabiyoti namunalarini sevib mutolaa qilib, oʻzi ham sheʼrlar ijod qiladigan, sheʼriyat muxlislariga yaxshi tanish otasi Jabborbergan Qurbonboyev, onasi Qurbonbika opalar ham uning bu qiziqishini ragʻbatlantiribgina qolmay, dars mashgʻulotlarini yaxshi oʻzlashtirishiga imkoniyat yaratib berdi, badiiy kitoblar olib berib, maʼnaviyatli boʻlib voyaga yetishiga harakat qildi. Oilada 7 nafar farzandning ham ilmli, odob-ikromli boʻlib ulgʻayishiga intilgan ota-onaning mehnatlari zoya ketmadi, uch nafari oʻqituvchi, boshqalari shifokor, turli kasb egalari boʻlib yetishishdi. Hulkar esa umumtaʼlim maktabini tugatgach, Samarqand Davlat Oliygohining oʻzbek tili va adabiyoti fakultetiga hujjat topshirib, sinovlardan muvaffaqiyatli oʻtib, talaba boʻlishga erishdi.

Uning talabalik davri mamlakatimiz mustaqilligining ilk davrlari – 1992-1997-yillarga, sobiq ittifoq tizimida faqat xomashyo bazasi boʻlib kelgan yurtimizda ishlab chiqarish izdan chiqib, iqtisodiy taqchilliklar hukm surgan, yosh davlatimizning endi oyoqqa tura boshlagan davrlariga toʻgʻri keldi.

- Baʼzan doʻkonga borib, non yetishmay qolgan, baʼzan nonga ham pulimiz qolmagan kunlarimiz ham boʻlgan, - deya eslaydi talabalik davrini Hulkar Qurbonboyeva.

Oʻsha vaqtlarda ham talabaning oʻqishga ishtiyoqi susaymadi, stipendiya pulidan, ota-onasi joʻnatgan puldan maʼlum qismiga darslikdan tashqari kitoblar sotib olishga, bilim doirasini kengaytirishga sarfladi. Oliygohni muvaffaqiyatli bitirib kelib, 1997-yildan 16-sonli umumtaʼlim maktabida oʻz fanidan dars bera boshladi.

Hulkar oʻzining oʻqituvchilik faoliyati davomida boshqalarga oʻrnak boʻlarlik yutuqlarga erishdi. 2005-yildan beri oʻquvchilari muttasil bilimlar bellashuvi va fanlar olimpiadasida, turli koʻrik-tanlovlarda qatnashib, faxrli oʻrinlarni egallab kelishmoqda. Avvalgi yili ikki oʻquvchisi fanlar olimpiadasining mamlakat bosqichiga chiqishgan boʻlsa, oʻtgan oʻquv yilida ham Qoraqalpogʻistonda ikkinchi, uchinchi oʻrinlarni egallashdi. Yana bir oʻquvchisi Qunduzoy Yusupova  "Kamalak” yulduzlari bolalar ijodiyoti festivalida mamlakat bosqichida dastlab ishtirokchi, keyinchalik gʻolib boʻlishga erishdi.

- Oʻquvchining muvaffaqiyati oʻqituvchidan tashqari ota-onasi, oilasiga ham koʻp jihatdan bogʻliq, - deydi Hulkar shogirdlarining yutuqlari haqida gapirganida kamtarlik bilan. – Bolaning qiziqishini, ilmga intilishini ota-ona ham qadrlamasa, qoʻllab-quvvatlamasa, yaxshi natijaga erishish qiyin. Avvalo bolaning iqtidorini toʻgʻri anglay olish, intilishlarini ragʻbatlantirib, bu yoʻlda koʻmakchi boʻlish – oʻqituvchi mehnati samarali boʻlishini taʼminlaydi. Men doim shunga intilaman.

Hulkarning ezgu niyatlar bilan qilgan mehnati uni hamkasblari orasida obroʻ-eʼtiborli qildi. Mehnatlari munosib baholanib, joriy yilda "Qoraqalpogʻiston xalq taʼlimi aʼlochisi” boʻldi. Bu ishonch, ragʻbat iqtidorli oʻqituvchini yana ham ezgu ishlarga chorlayveradi.

Oygul RAJABOVA.

Suratda: Hulkar Qurbonboyeva dars paytida.

M.ShOMURODOV surati.