TAShKILOT RAMZI ROʻYXATDAN OʻTKAZILDI

"Nodavlat notijorat tashkilotlari toʻgʻrisida”gi Oʻzbekiston Respublikasining Qonunida NNT oʻz ramziy belgilariga ega boʻlishi mumkinligi belgilab qoʻyilgan. Shu maqsadda "Jayxun ilhomlari” nodavlat notijorat tashkiloti Boshqaruvining 2015-yil 14-avgustdagi yigʻilish bayoni qarori bilan NNTning ramzi loyihasi tasdiqlangan edi.

Oʻzbekiston Respublikasi Vazirlar Mahkamasining "Oʻzbekiston Respublikasi Prezidentining "Fuqarolik jamiyati institutlarini rivojlantirishga koʻmaklashish borasidagi qoʻshimcha chora-tadbirlar toʻgʻrisida”gi 2013-yil 12 de-kabrdagi PQ-2085-sonli qarorini amalga oshirish chora-tadbirlari haqida”gi 57-sonli qarori bilan tasdiqlangan Nodavlat notijorat tashkilotlarining ramzlarini davlat roʻyxatidan oʻtkazish tartibi toʻgʻrisida nizom talablariga koʻra Qoraqalpogʻiston Respublikasi Adliya vazirligiga NNT ramzini roʻyxatdan oʻtkazishni soʻrab berilgan ariza koʻrib chiqilib, 2015-yil 17-sentyabr kuni tashkilotimizga NNT ramzi davlat roʻyxatidan oʻtkazilganligi toʻgʻrisidagi 1-sonli guvohnoma topshirildi.

"Jayxun ilhomlari” nodavlat notijorat tashkilotining ramzi (emblemasi) aylana ichida aks ettirilgan ona yurt, tabiat va ijodkorlikni ifodalovchi bir necha tasvirlardan iborat.

Aylananing ichki tepa qismida tong paytida azim togʻlar osha koʻtarilib kelayotgan quyosh tasviri aks ettirilgan. Quyosh yer-u koʻkka yorugʻlik, nur va iliqlik taratuvchi saxiylik ramzi, otayotgan tong esa butun borliqqa rizq-nasiba ulashiladigan palla, ijodkorga ilhom baxsh etuvchi lahza hisoblanadi.

Quyoshning pastki qismida aks ettirilgan purviqor togʻlar koʻhna Jayxun boʻyida yastanib yotgan Qoratov aksi, ramziy maʼnoda esa ijodkorni ijod choʻqqilari sari chorlovchi ilhom manbai hisoblanadi.

Togʻlar etagida mavj urib oqayotgan, necha ming yillardan buyon oʻsimlik va hayvonot dunyosiga hayot, ikki sohilda yashab kelayotgan aholiga rizq-roʻz va ilhom baxsh etuvchi Amudaryo tasviri aks ettirilgan.

Daryoning soʻl sohilida, ramzning pastki qismida yashil maysalarga burkangan, Amudaryoning najotbaxsh obi hayotidan bahra olib gullayotgan voha tasvirlangan.

Ramzning markaziy qismida ilm-maʼrifat ramzi boʻlmish kitob, kitobning old qismida esa ijodkorlik ramzi sanalmish patqalam va siyohdon tasvirlangan. Kitobning ramz oʻrtasida joylashtirilishining yana bir sababi – ilm-maʼrifat daryoning ikki sohilidagi ellarni ellarga, dillarni dillarga bogʻlovchi vosita ekanligidir.

Ramzning tashqi tepa qismida, koʻk rangli fondagi aylana ichiga oq harflar bilan, lotin yozuviga asoslangan oʻzbek alifbosida "JAYXUN ILHOMLARI” yozuvi, uning har tomoni 3 ta yulduzcha (***) bilan ajratilgan pastki qismida esa "NODAVLAT NOTIJORAT TASHKILOTI” degan soʻzlar yozilgan.

"Jayxun ilhomlari” nodavlat notijorat tashkilotining ramzi toʻgʻrisidagi nizomga muvofiq, tashkilot ramzi uning Ustavidagi maqsad va vazifalari hamda faoliyat yoʻnalishlaridan kelib chiqqan holda ishlab chiqilgan boʻlib, mazkur ramzdan "Jayxun ilhomlari” nodavlat notijorat tashkilotining rasmiy blanklarida, muhr va shtamplarida, guvohnomalarda, plakatlarda, bannerlarda, koʻrgazmali qurol va oʻquv-uslubiy, badiiy adabiyotlarda, diplomlar hamda faxriy yorliqlarda, tashkilot vimpellarida, esdalik nishonlarida, xodimlarning maxsus kiyimlarida, tashkilot aʼzolarining yagona nusxadagi aʼzolik guvohnomalarida, tashkilot tomonidan qonun hujjat-lariga muvofiq, uning Ustav boʻyicha amalga oshiradigan faoliyatini moliyalashtirish uchun tashkil etiladigan bosma ommaviy axborot vositalari muqovalarida, shuningdek, elektron ommaviy axborot vositalarida, tashkilot manfaatlariga mos keluvchi barcha oʻrinlarda foydalanilishi mumkin.

Bir soʻz bilan aytganda, mazkur ramz "Jayxun ilhomlari” nodavlat notijorat tashkilotining xalqimiz maʼnaviyatini yuksaltirish, yosh avlodni Vatanga muhabbat, milliy va umuminsoniy qadriyatlarga hurmat ruhida kamol toptirish, adabiyot, musiqa, badiiy va amaliy sanʼat ravnaqiga hissa qoʻshish hamda Qoraqalpogʻiston Respublikasida faoliyat yuritayotgan ijodkorlarni  qoʻllab-quvvatlash, ularning ijodiy salohiyatlarini roʻyobga chiqarish orqali jamiyatda ijtimoiy-maʼnaviy muhitni yanada yaxshilashga hissa qoʻshishdek ezgu maqsadini oʻzida ifoda etib, tashkilot aʼzolarini bu yoʻlda xayrli ishlarga chorlab turuvchi mayoq vazifasini oʻtaydi.

Ahmad NAFASOV, "Jayxun ilhomlari” NNT raisi.