BURCh MASʼULIYaTINI HIS ETIB...

Inson tabiatan mehr-muhabbatga, yaxshilikka moyil. U oʻzgalarga mehr-muhabbat, oqibat va muruvvat koʻrsatish barobarida oʻzi ham boshqalardan mehr-oqibat, yaxshilik kutib yashaydi. Chunki, mehr bilan boquvchi nigohlar inson yuragiga oʻzgacha taft beradi. Muhabbatli nigohlar odamni ezgulikka yoʻllab turadi. Har bir yaxshilikning, yaxshi soʻzning zamirida esa yorugʻlik bor. Koʻnglini gʻam-anduh, vujudini dard egallagan inson yaxshilikning, yaxshi soʻzning yogʻdusida hayot goʻzalliklarini his etadi, ana shu yogʻduga – goʻzallikka intilib yashaydi.

Men shifokor sifatida insonlar tabiatida zohir boʻlgan ana shunday tuygʻularga juda koʻp bora oshno boʻlganman. Oddiygina bir soʻz bemorning holatini ogʻirlashtirib qoʻygani yoki birgina soʻz bilan ogʻir xastaning oyoqqa turib ketganiga oʻz faoliyatimda necha yuz martalab guvoh boʻlganman.

Shifokorlar nima uchun oppoq libos kiyishadi? Hech oʻylab koʻrganmisiz, shifokor libosining oqligi xususida?

Oqlik – avvalo poklik ramzi. Poklik esa nihoyatda keng qamrovli tushuncha, yaʼni, koʻngil tozaligi, vujud tozaligi, halollik va ezgulikka, yaxshilikka ishora bor unda.

Demak, biz shifokorlar bemor koʻnglining farishtalariday unga mehr-muhabbat, oqibat va muruvvat nigohi bilan boqishimiz, har bir mijozning qadr-qimmatini joyiga qoʻyishimiz bilan oʻz faoliyatimizda poklikka amal qilamiz.

TTBning fizioterapiya boʻlimiga muolaja olish uchun har xil toifadagi bemorlar kelishadi. Ularni bezovta qilayotgan kasallik bilan kurashishdan oldin eng avvalo bemorning ruhiyatiga monand muomala qilishga intilamiz. Chunki, fizioterapevtik muolaja usulida shifokor bilan bemorning oʻzaro muomalasi muhim ahamiyatga ega.

Boʻlimimizga shifo istab kelgan har bir bemor bilan alohida-alohida muolaja kurslari olib boriladi. Buning uchun bizda barcha sharoitlar muhayyo.

2012-2013-yillarda toʻliq taʼmirlanib, zamonaviy tibbiy uskunalar bilan jihozlangan fizioterapiya boʻlimi kuniga 75-80 nafar bemorga malakali tibbiy xizmat koʻrsatish imkoniga ega. Elektroforez, magnitoterapiya, parafin qoʻyish, UZT hamda davolash-gimnastika-sogʻlomlashtirish, uqalash kabi muolaja xonalarining har birida kuniga 10-12 nafar bemor muolaja olmoqda. Hali yuqorida aytganimday, har bitta muolaja xonasida bemorlarga xizmat koʻrsatuvchi shifokor va hamshiralarga shunday talab qoʻyiladi-ki, fizioterapevtik muolajadan soʻng albatta mijozlar xursand, yaxshi kayfiyatda chiqib ketishlari zarur. Biz oʻz faoliyatimizda albatta, bunga erishayapmiz. Zamira Allamberganova, Shohida Oymonova, Malohat Ozodova, Muhayyo Yangiboyeva, Latofat Sobirova, Malohat Oʻrozimbetova singari hamshiralarimizdan mijozlar hamisha mamnun.

Men har gal boʻlimimiz shifokorlari bilan muloqotda boʻlganimda bir gapni juda koʻp takrorlayman:

- Inson-aziz, sogʻligi undan ham aziz. Biz ana shu azizlikka, barqaror hayotga, yaʼni insonlar salomatligiga masʼulmiz. Ularga yaxshi muomala, mehrli nigoh bilan xizmat koʻrsatish – burchimiz!

Ana shu burch masʼuliyatini his etib mehnat qilayotgan barcha salomatlik posbonlariga anʼanaviy kasb bayramingiz qutlugʻ boʻlsin, deyman.

Zulxumor MAMATQULOVA,

tuman tibbiyot birlashmasining fizioterapiya boʻlimi mudiri.