Farovon hayotimizning huquqiy asosi

Mamlakatimizda fuqarolarning emin-erkin yashashlari, mehnat faoliyati bilan shugʻullanishlari, intellektual salohiyatlarini namoyon etishlari uchun barcha shart-sharoitlar muhayyo. Bular asosiy Qonunimiz – Konstitutsiyamizda ham oʻz aksini topgan.

Bosh Qomusimiz — Konstitutsiyamizda ota-ona, farzand huquq va burchlarining aniq-ravshan belgilangani qonunlar kitobining xalqchil ekanidan dalolat beradi. Zotan, unda milliy qadriyatlarimizning yana bir muhim boʻgʻini - "oila” tushunchasiga ham alohida toʻxtalib oʻtilgan. 63-moddada oila jamiyatning asosiy boʻgʻini, jamiyat va davlat muhofazasida boʻlishi, nikoh tomonlarning ixtiyoriy roziligi va teng huquqliligiga asoslanishi belgilab qoʻyilgan. Bu bir tarafdan milliy qadriyatlarimizga chuqur hurmat ramzi boʻlsa, ikkinchi tomondan sogʻlom jamiyatni shakllantirishning sharqona usulidir. Chunki oilaga eʼtibor - jamiyatga eʼtibor demakdir. Sogʻlom jamiyat esa mamlakat taraqqiyotini, uning ijtimoiy-iqtisodiy salohiyatini belgilaydi.

Ona va bola salomatligini asrash, har tomonlama sogʻlom avlodni voyaga yetkazish, ularning taʼlim olishi uchun barcha sharoitni yaratib berish koʻp jihatdan oilalarga berilayotgan eʼtibor va gʻamxoʻrlik samarasidir. Konstitutsiyamizda oila tushunchasiga alohida oʻrin berilgani oilaviy qadriyatlarni asrashga ham xizmat qilayotir.

Bizning milliy mentalitetimizga xos boʻlgan eng muhim maʼnaviy qadriyatlardan biri hisoblangan ota - onaga hurmat, mehr-oqibat tuygʻulari, farzandning ota-ona oldidagi burchi, maʼnaviy qarzdorligi Asosiy Qonunimizning 66-moddasida huquqiy jihatdan quyidagicha mustahkamlab qoʻyilgan: "Voyaga etgan, mehnatga layoqatli farzandlar oʻz ota-onalari haqida gʻamxoʻrlik qilishga majburdirlar”. Hech bir davlat Konstitutsiyasida bunga oʻxshash modda uchramaydi. Bu esa Asosiy Qonunimiz azaliy maʼnaviy qadriyatlarimizni ham oʻzida mujassam qilgan Qomus ekanligini koʻrsatadi.

Bugungi kunda yurtimizda millatlararo totuvlik, bagʻrikenglik asosida 130 dan ortiq millat va elat vakillari ahil, tinch-totuv istiqomat qilmoqda. Barcha millat vakillariga oʻz tili, madaniyatini yuksaltirish uchun sharoitlar yaratib berilgan. Jumladan, mamlakatimizda mavjud oʻquv dargohlarida oʻnga yaqin tillarda taʼlim olish imkoni yaratilgan. Bularning barchasining huquqiy kafili albatta, Konstitutsiyamiz hisoblanadi.

M.PRIMBETOVA,

tuman FHDYo boʻlimi noziri.

(Foto - http://navoiypress.uz)