QOʻShIQLARI ELGA MANZUR

Shunday qoʻshiqlar borki, qancha tinglasak ham toʻymaymiz, har bir jumla soʻzi, ohangi yuragimizning tub-tubiga yetib boradi, bu dolgʻali dunyoda qadrini goh anglab, goh  anglamay yashayotganimiz – moʻʼtabar va mukarram zot – onamiz siymosini koʻz oʻngimizda gavdalantiradi, uning poyi – qadamiga jonimizni nisor etsakda kam ekanligiga iqror etadi, jismimizda joʻsh urib oqayotgan qon goʻyo oʻsha hayotbaxsh ohanglarga qorishib  ketganday vujudimiz tozaradi, hayotga teranroq nigoh bilan boqamiz.

Bu qoʻshiqlar barchamizga yorugʻ dunyoda yashash baxtini inʼom etgan aziz va buyuk zot – onajonlarimiz haqidagi qoʻshiqlardir. Ular aslida koʻnglimizda shunday tuygʻularni junbushga keltira olgani bilan ham qadrlidir.

Ona! Unga ashʼor bitmagan shoir, koʻngillarni sel qilib, eng nozik pardalarda kuylashni istamagan hofiz bormikan, dunyoda?

Sizga qoʻshiq aytaman,

Dil madorim onajon...

Yaqindagina tumanimiz ahli Amudaryo televideniyesi orqali tomosha qilgan, 8-mart – Xalqaro xotin-qizlar kuniga bagʻishlanib tuman Madaniyat va sport ishlari boʻlimi tomonidan tayyorlangan maxsus kontsert dasturida taniqli xonanda Anvar Xudoyberganov ijro etgan "Dil madorim onajon” qoʻshigʻi hech bir tinglovchini befarq qoldirmadi, deb oʻylaymiz.

Soʻzlari sodda, samimiy, balandparvoz tashbehlarsiz, koʻngilga yaqin ruhda yozilgan sheʼrga mos musiqa bastalab, yuksak mahorat bilan ijro etgan mazkur qoʻshigʻi uchun Anvar Xudoyberganov joriy yilning boshida "Otam – suyangan togʻim, onam – mehr bulogʻi...” koʻrik-tanlovida tuman bosqichi gʻolibi, 25-fevralda boʻlib oʻtgan Qoraqalpogʻiston respublikasi bosqichida esa faxrli uchinchi oʻrin sohibi boʻlgan edi.

Bolaligidan sanʼatga qiziqib, yoqimli ovozi bilan elimizga manzur boʻlgan koʻplab qoʻshiqlarni ijro etish bilan birga, "Uchqun” ashula va raqs xalq dastasiga badiiy rahbarlik, puflab chalinadigan cholgʻu orkestri rahbarligi mutaxassisligi boʻyicha 30-yilga yaqin vaqt mobaynida 9-sonli Bolalar musiqa va sanʼat maktabida bolalarga saboq berish jarayonida va oʻzining ijro mahorati uchun ham uning erishgan yutuqlari, gʻolib boʻlgan nufuzli koʻrik-tanlovlari koʻp. Biroq "Otam – suyangan togʻim, onam – mehr bulogʻi...” koʻrik-tanlovidagi muvaffaqiyati hofiz uchun eng ulkan martaba boʻldi. Boisi, Xudoybergan Jumamurodov sheʼriga oʻzi kuy bastalagan, tugʻishgan akasi Shomurod aka yoʻl-yoʻriqlari bilan musiqasi sayqallanib,  maromiga yetkazilgan mazkur qoʻshiqni Anvar Xudoyberganov onasining vafotidan sal oldin, eng avval unga aytib bergan, volidasini quvontirgan, duosini olgan edi. Asli barchasi sanʼat yoʻlini tutgan oʻgʻillar, nevaralar yangi ijod mahsulini eng avval sanʼatni jondan sevuvchi, zurriyodlarining sanʼatdagi har bir yutuqlaridan, yangi qoʻshigʻidan koʻngli osmon qadar yuksaladigan, ularni ham ota, ham ona boʻlib kamolga yetkazgan bagʻrikeng ayol – Maryam momoga taqdim etishar, maslahatlarini olib, kamchiliklarini tuzatishar, onaxonning duosini olib, keyin sahnaga chiqishardi. Chunki sanʼat sohasida bilimli boʻlmasa-da, Murod baxshi nomi bilan taniqli boʻlgan baxshining qizi Maryam momo kuy-qoʻshiqlarni baholashda juda didli edi.

- Bizni asli sanʼatga qiziqtirib, ragʻbatlantirib, shu kunlarga yetkazgan  ham onam edilar. Hozir Navroʻz – umumxalq bayramiga tayyorgarlik qizgʻin ketayapti. Tuman miqyosida oʻtkaziladigan teatrlashtirilgan bayram tomoshasi badiiy rahbari sifatida zimmamdagi masʼuliyat juda salmoqli. Biroq onamning duolari menga doim kuch berib turadi, - deydi taniqli xonanda Anvar Xudoyberganov.

Biz ham undan xalqimizga manzur boʻladigan koʻplab qoʻshiqlar kutib qolamiz.

Oygul RAJABOVA.

Suratda: Anvar Xudoyberganov.