YuTUQLAR SARHISOB QILINIB, YaNGI REJALAR BELGILANDI

Mustaqillik yillarida mamlakatimizda mislsiz yutuqlarga erishildi. Ilm-fan, madaniyat sport sohalarida, sogʻlikni saqlash tizimi, agrar soha hamda iqtisodiyotning barcha boʻgʻinlarida buyuk oʻzgarishlar, yangilanishlar yuz berdi.

Iqtisodiy-ijtimoiy hamda madaniy-maʼrifiy hayotimizda roʻy berayotgan jahon andozalariga mos yuksalishlar, oʻzgarish va yangilanishlarning asosiy  mezoni – bu butun dunyoda taraqqiyotning "Oʻzbek modeli” sifatida havas uygʻotgan Kadrlar tayyorlash Milliy dasturi, "Taʼlim toʻgʻrisida”gi Oʻzbekiston Respublikasi Qonunining xalqimiz hayotiga izchil tatbiq etilganidir. Taʼlim sohasida erishilayotgan bu kabi muvaffaqiyatlar ayni kunlarda butun mamlakatimizda boʻlib oʻtayotgan oʻqituvchi va murabbiylarning anʼanaviy avgust Kengashlarida alohida eʼtirof etilmoqda. 26-avgust kuni tuman hokimligining katta majlislar xonasida koʻtarinki ruhda oʻtkazilgan tumanimiz oʻqituvchilarining anʼanaviy avgust Kengashida yangi oʻquv yili oldidan qilingan ishlar sarhisob etilib, galdagi vazifalar belgilab olindi. Anjumanda tuman hokimining oʻrinbosarlari, hokimlik mutaxassislari, tumanimizda faoliyat olib borayotgan siyosiy partiyalarning vakillari, taklif etilgan oʻqituvchi va murabbiylar, OAV vakillari ishtirok etdilar.

Anjuman delegatlari kun tartibidagi asosiy masala – "Sifatli taʼlim-tarbiya - bosh vazifamiz” mavzusidagi tuman XTMFMTTE boʻlimi  mudiri A.Qoʻshayevning maʼruzasini eʼtibor bilan tingladilar. Maʼruzachi oʻz nutqida taʼlim-tarbiya sohasiga tatbiq etilayotgan innovatsion pedtexnologiyalar, tobora  yangilanib borayotgan taʼlim maskanlari, yangidan barpo etilgan maktab va sport inshootlari hamda ularda yaratilgan shart-sharoitlar tufayli bugungi oʻquvchi-yoshlar erishayotgan muvaffaiyatlar zamirida ustoz va murabbiylarning ulkan mehnati, bilim va salohiyati, fidoyiligi borligini taʼkidladi. Sohada fidoyilik koʻrsatayotgan ustoz-murabbiylarning nomlarini hurmat bilan tilga olib, minnatdorchilik bildirdi.

Maʼruza yuzasidan qizgʻin muzokaralar boʻldi. Muzokaralarda ishtirok etgan 16-sonli ixtisoslashtirilgan davlat umumtaʼlim maktabi direktori Shuhrat Jumaniyozov, 2-sonli umumtaʼlim maktab oʻqituvchisi Rayhon Abdullayeva, 15-sonli umumtaʼlim maktabi oʻqituvchisi Nargiza Matlatipova, "Kamolot” YoIH tuman Kengashi raisi Mansur Oʻrozboyevlar tumanimiz maktablarida olib borilayotgan ibratli ishlar bilan bir qatorda yechimini kutayotgan muammolar xususida ham soʻz yuritdilar.

Anjumanda tuman hokimi oʻrinbosari, xotin-qizlar qoʻmitasi raisi Maryam Ahmedova tuman hokimligi nomidan ustoz va murabbiylarni anʼanaviy avgust Kengashi, yaqinlashib kelayotgan mamlakatimiz mustaqilligining 25 yillik bayrami hamda "Bilimlar kuni” bayramlari bilan samimiy tabrikladi. Shuningdek u oʻz soʻzida sohada erishilayotgan yutuqlarga haqqoniy baho berib, yoʻl qoʻyilayotgan kamchiliklarga ham toʻxtalib oʻtdi va bu kamchiliklarni bartaraf  etish yuzasidan fikr-mulohazalarini bildirdi.

Anjumunda yosh avlodni har tomonlama yetuk va barkamol insonlar qilib tarbiyalashda yuksak natijalarga erishayotgan bir guruh oʻqituvchi va murabbiylarga Oʻzbekiston Respublikasi va Qoraqalpogʻiston Respublikasi xalq taʼlimi Vazirligining hamda tuman hokimligining faxriy yorliqlari, tuman hokimligi hamda XTMFMTTE boʻlimi tomonidan tayyorlangan esdalik sovgʻalari topshirildi.

Tumanimiz oʻqituvchilarining anʼanaviy  avgust Kengashi yakunida koʻrilgan masala yuzasidan  tegishli qaror qabul qilindi.

Anjuman soʻngida tumanimizdagi 9-sonli hamda 21-sonli bolalar musiqa va sanʼat maktablarining oʻquvchilari tomonidan tayyorlangan bayramona kontsert dasturi namoyish etildi.

Robiya YOʻLDOShEVA.

Suratda: (chapdan) Qoraqalpogʻiston Respublikasi xalq taʼlimi aʼlochilari ­- 15-sonli maktab oʻqituvchisi Nargiza Matlatipova, 9-sonli maktab direktori Xayrulla Oʻtaganov, 30-sonli maktabning boshlangʻich sinf oʻqituvchisi Sharofat Qodirova.