KELAJAGIMIZGA DAXLDOR SIYoSIY JARAYoN

Mamlakatimiz fuqarolari muhim ijtimoiy-siyosiy voqea – Oʻzbekiston Respublikasi Prezidenti saylovi arafasida turibdilar.

Ayni kunlarda mamlakatimizning barcha hududlarida saylov okruglari, okruglar tarkibida saylov uchastkalari tuzilib, Oʻzbekiston Respublikasi Prezidenti saylovini uyushqoqlik bilan oʻtkazishga tayyorgarlik ishlari ochiq va oshkora amalga oshirilmoqda.

Saylov komissiyalari fuqarolarni oʻz faoliyatilari, saylov okruglari, uchastkalari faoliyati va saylov oʻtkazuvchi uchastka saylov komissiyalarining tarkibi, joylashgan manzili va ish vaqti bilan tanishtirib, saylovchilarning roʻyxatlarini tuzishmoqda.

Ayni kunda tumanimizda Oʻzbekiston Respublikasi Prezidenti saylovini oʻtkazuvchi 58 ta saylov uchastkalari tuzilgan boʻlib, uchastka saylov komissiyalari aʼzolari saylovning maqsad va mohiyatini fuqarolarimizga tushuntirishda, saylovning yuksak saviyada oʻtishiga erishish yoʻlida sidqidildan mehnat qilmoqdalar.

Maʼlumki, "Oʻzbekiston Respublikasi Prezidenti saylovi toʻgʻrisida”gi Oʻzbekiston RespublikasiQonunining 2-moddasiga muvofiq, "Oʻzbekiston Respublikasining 18 yoshga toʻlgan fuqarolari Oʻzbekiston Respublikasi Prezidenti saylovida qatnashish huquqiga ega.

Ijtimoiy kelib chiqishi, ijtimoiy va mulkiy ahvoliga, irqiy yoki milliy mansubligiga, jinsi, maʼlumoti, tili, dinga munosabatiga, mashgʻulot turi va xususiyatiga qarab Oʻzbekiston Respublikasi fuqarolarining saylov huquqini biron-bir tarzda bevosita yoki bilvosita cheklash taʼqiqlanadi. Sud tomonidan muomalaga layoqatsiz deb topilgan fuqarolar, shuningdek sud hukmiga muvofiq ozodlikdan mahrum etilib, jazoni oʻtash joylarida boʻlganlar bundan mustasnodir.

Qaysi bir bobini, moddasini olib qarasangiz ham Qonunning nihoyatda xalqparvarlik, ijtimoiy adolatlilik va insonparvarlik ruhi bilan sugʻorilganini koʻrishimiz mumkin.

Tumanimiz fuqarolari 4-dekabrda Oʻzbekiston Respublikasi Prezidenti saylovida faol qatnashib, eng munosib nomzodning saylanishiga hissa qoʻshadilar, deb umid qilamiz. Chunki eng munosib nomzod uchun ovoz berish – mamlakatimizning kelajagiga bevosita daxldor vazifadir.

Muborak PRIMBETOVA,

tuman fuqarolik holati dalolatnomalarini yozish boʻlimi inspektori.

(Foto - https://www.gazeta.uz)