Yurt obod, el farovon

OʻzA, A.Ortiqboyev, 30.07.2013 13:59

Eng ulugʻ, eng aziz bayramimiz – Oʻzbekiston Respublikasi mustaqilligining 22 yilligi tobora yaqinlashmoqda. Mamlakatimizda ushbu qutlugʻ sana oldidan amalga oshirilayotgan ulkan bunyodkorlik ishlarini sarhisob qilib, navbatdagi marralarni yana bir bor belgilab olish yaxshi anʼanaga aylangan.

Bu borada Amudaryo tumanida amalga oshirilayotgan ishlar xususida tuman hokimi, Qoraqalpogʻiston Respublikasi Joʻqorgʻi Kengesi deputati Rajabboy Yoʻldoshev Oʻzbekiston Milliy axborot agentligi – OʻzA muxbiriga quyidagilarni gapirib berdi:

– Prezidentimiz rahnamoligida olib borilayotgan keng koʻlamli islohotlar tufayli yurtimiz tobora obod va farovon boʻlib, barcha yutugʻimizning bunyodkori boʻlgan xalqimizning ongu tafakkuri, dunyoqarashi, ishga, hayotga munosabati tubdan oʻzgarib, ertangi kunga, oʻz kuchi va imkoniyatlariga ishonchi mustahkamlanib borayotir.

Butun mamlakatimizda boʻlgani kabi tumanimiz iqtisodiyotida ham barqaror oʻsish surʼatlari taʼminlanib, ulkan yutuq va muvaffaqiyatlar qoʻlga kiritilmoqda.

Sanoat salohiyatini rivojlantirish maqsadida 2013-2015-yillarda tumanni kompleks rivojlantirish dasturi ishlab chiqilib, izchillik bilan amalga oshirilayotir. Ushbu dastur doirasida investitsiya loyihalari dasturi, mavjud sanoat korxonalarini toʻliq quvvatda ishlatish, boʻsh turgan bino va inshootlarda ishlab chiqarishni tashkil etish hamda tijorat banklari tasarrufidagi korxonalarning ishlab chiqarish hajmini oshirish hisobidan kam quvvatli, iqtisodiy nochor korxonalarni moliyalashtirish, 2012-2016-yillarda xizmat koʻrsatish sohalarini rivojlantirish hamda qishloq xoʻjalik mahsulotlari ishlab chiqarish, yaʼni chorvachilik, parrandachilik, baliqchilik, asalarichilik sohalarini rivojlantirish dasturlari ishlab chiqildi.

Shu kabi keng koʻlamli ishlar natijasida "Asia silk” shoʻʼba korxonasi hamda poyabzal, kiyim-kechak, mebel, kolbasa mahsulotlari ishlab chiqaradigan korxonalar, sutni qayta ishlash kompleksi, Xitoy texnologiyasi asosida yiliga 25 million dona gʻisht ishlab chiqarish quvvatiga ega "Qoraqalpoqqishloqqurilishservis” korxonasi, zamonaviy sovutgichli "sendvich” panelli meva-sabzavot saqlaydigan omborxonalar ishlab turibdi.

Angliyaning "Welroy Technology LLP” kompaniyasi bilan birgalikda qiymati 29 million AQSh dollariga teng boʻlgan "Amudaryoteks” xorijiy korxonasi, "Zhas metall production” qoʻshma korxonasining metallni eritish va qayta ishlash tsexi qurilishi ishlari jadal surʼatlarda olib borilmoqda.

2013-2015-yillarda tumanning sanoat salohiyatini rivojlantirish dasturiga asosan qiymati 32 million 672,8 ming dollar miqdorida 20 loyiha amalga oshirilishi, shuning natijasida 478 yangi ish oʻrni tashkil qilinishi koʻzda tutilmoqda.

Ayni paytda tumanimizda ikki mingdan ortiq tadbirkorlik subʼekti faoliyat yuritmoqda. Ularning 99,8 foizi xususiy va masʼuliyati cheklangan jamiyat shakliga oʻtgan boʻlib, bu yerda jami ish bilan band aholining 89,1 foizi mehnat qilayotir.

Tadbirkorlikni rivojlantirish boʻyicha 2013-yilda 380 loyihani amalga oshirish rejalashtirilgan. Bugungi kunda tadbirkorlikka nafaqat iqtisodiyotni rivojlantirish, balki aholi bandligini taʼminlash masalasida ham jiddiy eʼtibor qaratilmoqda. Bu yoʻnalishda olib borilgan ishlar natijasida joriy yilning 6 oyida 16 milliard 560 million soʻmlik 274 loyiha amalga oshirildi va 1061 yangi ish oʻrni yaratildi.

Tumanimizda faoliyat yuritayotgan 278 fermer xoʻjaligidan 197 tasida ishlab chiqarish, xizmat koʻrsatish va servis, qayta ishlash yoʻnalishidagi qoʻshimcha tarmoqlar yoʻlga qoʻyilib, fermer xoʻjaliklarining daromadi va ularda ish bilan band aholi soni ortib bormoqda.

Iqtisodiyotning yetakchi tarmogʻi boʻlgan qishloq xoʻjaligi sohasida katta natijalarga erishilmoqda. Bu yil tumanimiz pillachilari 243,5 tonna pilla yetishtirib, yilning dastlabki shartnomaviy rejasini ortigʻi bilan bajardi. Gʻallakorlarimiz 10 ming tonnadan ortiq bugʻdoy yetishtirdi, shundan 4605 tonnasi shartnoma asosida davlatga topshirildi.

Qishloq joylarda namunaviy loyihalar asosida uy-joy qurilishi koʻlamining kengayishi har yili koʻplab oilalarning yangicha hayot kechirishiga zamin yaratmoqda. Bu yil ana shunday 70 uy-joy qurilishi davom etmoqda.

Bugun qaysi xonadonga kirmang, qaysi ovul yoki mahallada boʻlmang, har bir fuqaroning avvalo oʻzi yashayotgan, mehnat qilayotgan hududni, qolaversa, oʻz mahallasi va qishlogʻini obod maskanga aylantirishga hissa qoʻshayotganiga guvoh boʻlasiz. "Qadr-qimmatim, tayanchim va iftixorimsan, mustaqil Oʻzbekiston!” degan ezgu gʻoyani oʻzida mujassam etgan mustaqilligimizning 22 yillik bayramini munosib kutib olish uchun xalqimiz fidoyilik bilan mehnat qilmoqda.