Shoshilinch tibbiy yordam xizmati takomillashtirilmoqda

Inson – hayot gultoji. U hayot boʻstoni aro qadam qoʻygan kunidan boshlab, uning bagʻriga intiladi. Bu boʻston ichra oʻzgartishlar, yangiliklar olib kiradi. Qiziqishlari, kasb-u kori bilan oʻzgalar eʼtiborini qozonadi. Bundaylarni biz yaxshi inson, deymiz. Chunki atrofimizdagi ana shunday yaxshi insonlar bizga yaxshi xayollar surish imkonini beradi. Yaxshi xayollar esa odamni yashartiradi, hayotni sevishga, hayotga joʻshqin nazar bilan qarashga undaydi.

... Joni qil ustida turgan bola hayoti uchun uch-toʻrt soatlab zir yugurgan shifokorning xayolidan bu damlarda oʻzi uchun aziz boʻlgan oila, bola-chaqa – hamma-hammasi koʻtarilgan. U jang maydonidagi askar kabi oʻzini unutgan. Butun fikr-u yodi jarrohlik stolida jon talashayotgan murgʻak vujudda. Bola yashashi kerak!

Jarrohlik xonasi eshigi oldida bemor bolaning ota-onasi, yaqinlari hayot bilan mamot oraligʻidagi olov ichra oʻrtanadilar goʻyo. "Bolam omon qolsin-da...” degan qoʻrquv butun xayolini band etgan ota-ona qarshisiga horgʻin jilmayib chiqib kelgan shifokorning bir ogʻiz shirin soʻzi ularning qalbini, vujudini yashnatib yuboradi. Najotkor shifokor ular uchun dunyodagi eng yaxshi Odam!

Tuman tibbiyot birlashmasi markaziy shifoxonasining barcha boʻlimlarida bemorlar hayoti uchun masʼullik tuygʻusi bilan muhnat qilayotgan malakali shifokorlar koʻp. Ayniqsa, shoshilinch tibbiy yordam boʻlimida eng malakali mutaxassislar jamlangan. Asosiy stavkada ishlovchi 10 nafar mutaxassis shifokorlarning 6 nafari oliy toifali, 1 nafari birinchi, yana bir mutaxassis ikkinchi toifalidir. Oʻrindoshlik asosida ishlovchi 27 nafar shifokorning 16 nafari oliy toifali, uch kishi birinchi, bir nafar mutaxassis esa ikkinchi toifaga ega. Oʻrta tibbiy xodimlar orasida ham oliy toifalilari anchagina. Boʻlimda 24 soat davomida uzluksiz ish joriy etilganidan shifokorlar har daqiqada masʼuliyatni chuqur his qilib ishlashadi.

Shu sababli Shoshilinch tibbiy yordam boʻlimida muolaja olayotgan bemorlar eʼtirofi, minnatdorchiligi cheksiz.

– Agar davlatimiz tomonidan biz shifokorlar uchun zarur shart-sharoitlar yaratib berilmaganida tez tibbiy yordam koʻrsatish masalasida ancha qiynalib qolardik, – deydi boʻlim mudiri Soliy Yoʻldoshev, – Faqat 2010-yilning oʻzida boʻlimga 17 xildagi tibbiy jihozlar keltirildi. Bundan tashqari, zamonaviy talablar darajasidagi UTT, endoskop, mobil rentgen va EKG jihozlarining keltirilishi, bemorlarga oʻz vaqtida va toʻgʻri tashhis qoʻyish imkonini yaratdi. Sogʻlikni saqlash tizimidagi islohotlar nafaqat soha xodimlari, balki xalqimiz hayotiga ham katta oʻzgarishlar olib keldi. Namunali tibbiy xizmatning yoʻlga qoʻyilishi xalqimizning mehnatga qobiliyatlilik darajasi oshishini, oʻrtacha umr koʻrish davomiyligining uzayishini taʼminlamoqda. Biz shifokorlar esa muhtaram Prezidentimiz Sh.M.Mirziyoyev aytganlariday, xalqimiz bizdan rozi boʻlishi uchun har lahzada masʼullikni his etib, el-yurt salomatligi yoʻlida fidoyilik bilan mehnat qilaveramiz.

Biz esa ana shunday ezgu niyatlar bilan yashab, xalqimiz qalbida goʻzal orzular, yaxshi xayollar uygʻotib va yaxshilik tomon har lahzada bir qadam qoʻyib mehnat qilayotgan shifokorlarga hamisha yaxshilar qatorida boʻlishdan aslo charchamang, kasb bayramingiz muborak boʻlsin, deymiz.

Robiya YOʻLDOShEVA.

Suratda: Soliy Yoʻldoshev (chapdan ikkinchi) boʻlim xodimlari bilan