YaNGI UY-JOYLAR – OBODLIK TIMSOLI

Zamonaviy qishloq infratuzilmasini yaratish maqsadida Yurtboshimiz rahnamoligida "Qishloq taraqqiyoti va farovonligi yili” Davlat dasturi negizida ishlab chiqilgan zamo-naviy meʼmorchilik talablariga javob beradigan va bizning iqlim sharoitlarimiz hisobga olingan shinam hamda qulay, namunaviy loyihadagi uy-joylarning butun mamlakatimiz miqyosida, shu jumladan, bizning tumanimiz qishloqlarida qurilayotganligi qishloqlarimiz qiyofasini tubdan oʻzgartirib yubordi.

Mana shunday namunaviy loyihadagi 100 ta uy-joylar ilk bor Mangʻit shahrining sharqiy qismida joylashgan "Taqir qalʼa” maskanida "Mangʻit invest maksimum” MChJ hamda "Amudaryo maxsus qurilish” MChJ quruvchilari tomonidan qurib bitkazilib, oʻz egalariga topshirildi. Ayni kunda "Toshyop" OFYning "Taqir qalʼa” mavzesida zamonaviy uy-joylardan iborat shaharcha boʻy tiklab, barchamizga oʻzini koʻz-koʻz qilib turibdi. Joriy 2013-yilda bu yerda yana 10 ta yangi turar joy qurilishiga hozirlik koʻrilmoqda. Endilikda koʻz oʻngimizda "Taqir qalʼa” oʻrnida chinakam obod qalʼa vujudga kelib, uning infratuzilma majmualari, yaʼni bitta qishloq vrachlik punkti va bitta zamonaviy maktab binosining qurib bitkazilib, foydalanishga topshirilganligi fikrimizning dalilidir. Bundan tashqari, kundalik ehtiyoj mollari va oziq-ovqat mahsulotlari doʻkoni, maktabgacha taʼlim muassasasi, bolalar maydonchalari va toʻy-maʼrakalar va marosimlar oʻtkaziladigan toʻyxona-choyxona qurilishi moʻljallanmoqda.

2011 yilda namunaviy loyihadagi uy-joylardan 17 tasi "Qilichboy” ovulining "Olmazor” mahallasida, 8 ta turar joy "Toʻlqin” ovulidagi "Vays ovul” maskanida bunyod etildi. Oʻtgan 2012-yilda esa "Oʻrta qalʼa” ovulining "Vahum” aholi punktida 20 ta turar joy binolari qad rostladi.

Namunaviy loyihadagi uy-joylar qurilishi joriy 2013-yilda yana davom ettiriladi "Choykoʻl” ovulining "Boʻzsuv” punktida 42 ta, "Oʻrta qalʼa” ovulining "Vahum” mahallasida yana 18 ta yangi turar joylar qad rostlashi rejalashtirilmoqda. Bunga yana hozirgi "Taqir qalʼa” shaharchasida quriladigan 10 ta yangi turar joyni ham qoʻshsak, joriy 2013-yilda 70 ta uy-joy qurilishi rejalashtirilmoqda. Bu 10 milliard soʻmlikka yaqin qurilish-montaj ishlarini amalga oshirish imkonini beradi. Bu koʻlamdor ishlarni "Amudaryo qurilish”, "Amudaryo qurilish xizmat”, "Amudaryo maxsus qurilish”, "Amudaryo suv qurilishi boshqarmasi”, "Oqtov” MChJlari quruvchi-bunyodkorlari amalga oshiradilar.

Yangi-yangi uy-joylar, maktab, shifo maskanlari va boshqa imoratlar, inshootlar, yurtimiz koʻrkiga-koʻrk, husniga-husn qoʻshib, tumanimizda ham yuksalish va obodlik sari dadil qadam tashlanayotganidan darak berib turibdi. Qayerdaki qurilish bor ekan, u yerda yangilanish va rivojlanish boʻlishi soʻzsizdir.

Qobul ShOMURODOV.

(Foto - http://uza.uz)