2017-yil sarhisobi: TUMANIMIZNING MEʼMORIY QIYoFASI TUBDAN OʻZGARDI

Keyingi yillarda mamlakatimizda qishloq va shaharlarning meʼmoriy  qiyofasi goʻzallashib, namunaviy loyihalar asosida koʻplab uy-joylar bunyod etilmoqda, hududlarda muhandislik va transport-kommunikatsiya tarmoqlari, ijtimoiy infratuzilma obʼektlari  jadal rivojlantirilmoqda, shuningdek, shaharlarda koʻp qavatli uylarni qurish va qayta taʼmirlash ishlariga ham katta eʼtibor qaratilmoqda. Bular aholi turmush darajasi va sifatining tobora yuksalib borishiga xizmat qilmoqda.

Muhtaram Prezidentimiz Shavkat Mirziyoyevning 2016-yil 21-oktyabrdagi “2017-2021-yillarda qishloq joylarda yangilangan namunaviy loyihalar boʻyicha arzon uy-joylar qurish dasturi toʻgʻrisida”gi Qarori asosida tumanimizda shu yilning oʻzida 4 ta massivda jami 122 ta namunaviy loyihadagi arzonlashtirilgan uy-joy qurilib, foydalanishga topshirildi.

Ayni kunda tumanimizda Oʻzbekiston Respublikasi Vazirlar Mahkamasining 2017-yil 4-sentyabrdagi 995-F-sonli Farmoyishi asosida qoʻshimcha ravishda maydoni 0,02 ga. boʻlgan 75 ta arzonlashtirilgan uy-joylar qurilishi olib borilmoqda.

Ichki ishlar boʻlimining profilaktika inspektorlari uchun maydoni 0,02 ga. boʻlgan 28 ta xizmat uylari qurildi.

Qishloq xoʻjaligida foydalanilayotgan yerlarda sugʻorish tizimini yaxshilash maqsadida “Shoʻr yob” kanalining 15 km. qismi rekonstruktsiya qilinib, 2546,2 mln. soʻmlik, “Alili yop” kanalida 5,8 km. uzunlikda yangi qurilish ishlari amalga  oshirilib, 570,1 mln. soʻmlik mablagʻ oʻzlashtirildi.

Joriy yilda tumanimizda infratuzilma obʼektlari qurilishiga ham alohida eʼtibor berildi. Bu yoʻnalishda jami 7390,5 mln. soʻmlik yoʻl qurilishi va joriy taʼmirlash ishlari amalga oshirildi.

Mazkur uy-joylarning 4 tasi nogironligi boʻlgan shaxslarga berilib, ular ish bilan taʼminlandi.

“Olmazor” mahallasi hududida loyiha qiymati 1254,0 mln. soʻm boʻlgan FHDYo boʻlimi binosi, “Gulzor” mahallasi hududida loyiha qiymati 479,0 mln. soʻm boʻlgan notarial idora binosi, Kuyukkoʻpir ovulida sutkasiga 30 tonna koʻmirni briketlash quvvatiga ega boʻlgan hududiy distribyuterlik markazi binosi qurildi.

2017-yilda tuman yoʻl xoʻjaligi pudrat, taʼmirlash-foydalanish korxonasi tomonidan 5820,3 mln. soʻmlik, «Amudaryo SKB» MChJ tomonidan 1433,2 mln. soʻmlik, “Mangit invest maksimum” MChJ tomonidan 137,0 mln. soʻmlik hajmda yoʻl qurilishi, taʼmirlash va saqlash ishlari amalga oshirildi.

Joriy yilda tumanda jami 9,5 km. uzunlikdagi suv quvuri yotqizildi. Jumladan, investitsiya dasturi asosida “Arna boʻyi” mahallasi hududidagi suv taqsimlash inshootigacha tender bahosi 1154,3 mln. soʻm boʻlgan 2,04 km. uzunlikdagi suv tarmogʻi yangilanib, “Vaxum”, “Bosuv” mahallalari va “Taqir qalʼa” massividagi 480 ta xonadon aholisining toza ichimlik suvi bilan taʼminlanishi yaxshilandi.

“Olmazor” mahallasida 702,4 mln. soʻmlik qurilish ishlari bajarilib, 5,4 km. uzunlikdagi suv quvurlari yotqizildi. Ushbu mahallada 242  ta xonadon uchun yangidan suv tarmogʻi qurildi.

Mangʻit shahrini tungi yoritish tizimi bilan taʼminlash maqsadida 3 km. uzunlikdagi elektr tarmoqlari tortildi va shahar koʻchalari tungi yoritish tizimi bilan taʼminlandi.

Aholini tabiiy gaz bilan taʼminlash maqsadida Mangʻit  shahrining Boʻston, Navoiy nomli, Chordara va Oybek nomli mahallalarida 1,7 km. uzunlikdagi gaz tarmogʻi ichki imkoniyatlar hisobidan rekonstruktsiya qilindi.

Tumanimiz aholisini uzluksiz elektr energiya-si bilan taʼminlash maqsadida quvvati 0,4 kVa va 10 kVa boʻlgan 11,5 kilometrlik elektr tarmoqlari rekonstruktsiya qilindi. Shuningdek, TP-265 va TP-169 transformatorlari kam quvvatli boʻlganligi sababli ular katta quvvatdagi transformatorlarga almashtirildi.

2017-yilda tumanda 3 ta xususiy uy-joy mulkdorlar shirkatlari tashkil etilib, ular zarur kredit mablagʻlari bilan taʼminlandilar.

«Daumov» xususiy uy-joy mulkdorlar shirkatiga Doʻstlik va Yangiobod mahallalaridagi 16 ta koʻp qavatli uylarni taʼmirlash uchun «Mikrokreditbank»ning tuman filialidan 234,0 mln. soʻm, «Mangʻit bino taʼmir» shirkatiga “Gulzor” mahallasidagi 7 ta koʻp qavatli uylarni taʼmirlashi uchun “Agrobank”ning tuman boʻlimidan 220,0 mln. soʻmlik, «Amudaryo bino taʼmir» shirkatiga esa “Boy ovul” mahallasidagi 5 ta koʻp qavatli uylarni taʼmirlashi uchun “Xalq banki”ning tuman boʻlimi tomonidan 100,0 mln. soʻmlik bank kreditlari ajratildi.

Azat Madraimov, tuman uy-joy, kommunal xizmat koʻrsatish boʻlimi bosh mutaxassisi.