Obod turmush yili yangiliklari

YaNGI MAKTAB BINOSI IShGA TUShDI

"Taqirqalʼa” massiviga yaqin hududda yangidan qurilib bitkazilgan 76-sonli umumtaʼlim maktabi 2-sentyabr kuni oʻquvchilarni oʻz bagʻriga chorladi.

Yangi maktabning ishga tushirilishiga bagʻishlangan tantanani maktab direktori N.Yoʻldoshev ochdi va quvonchli kun bilan barcha oʻqituvchilar va oʻquvchilarni qutladi.

Tuman hokimi oʻrinbosari, tuman xotin-qizlar qoʻmitasi raisi M.Ahmedova, "Amudaryo televideniyesi” direktori, "Taraqqiyot koʻzgusi” gazetasi muharriri Gʻ.Yeshniyozov, "Toshyop” ovuli oqsoqoli A.Oʻrozboyevlarning tabrigidan soʻng maktab oʻquvchilari tayyorlagan bayram kontserti namoyish etildi.

Mustaqillik darsi bilan boshlangan oʻquv yilini oʻquvchilar shodon qarshi oldilar.

Yangi oʻquv yili boshlanishiga bagʻishlandi

Mamlakatimizdaoʻquvchi yoshlarning bilim olibgina qolmay, kasb-hunarli ham boʻlishi uchun 12 yillik uzluksiz taʼlim joriy etilgan. Shu boisdan ham kasb-hunar taʼlimi maskanlarida yangi oʻquv yilining boshlanishi bayram sifatida nishonlanadi.

2 sentyabr kuni "Mangʻit” iqtisodiyot kasb-hunar kollejida yangi oʻquv yilining boshlanishiga bagʻishlangan tantana boʻlib oʻtdi.

Kollej direktori Z.Otamurodov, ingliz tili oʻqituvchisi tuman Kengashi deputati G.Ahmedovalar oʻquvchilarni yangi oʻqish yili boshlanishi bilan tabrikladilar. Soʻzga chiqqan oʻquvchilar tengdoshlarini oʻquv yilida aʼlo oʻqib, oʻz sohasini mukammal egallab, yetuk kadrlar boʻlib yetishishga chaqirdi.

"Zulfiyaxonim qizlari”

Har yili maktab, litsey, kollej, oliy oʻquv yurtlarida taʼlim olayotgan aʼlo xulqi, oliyjanob fazilatlari, zukkoligi, donoligi, oʻqishdagi muvaffaqiyatlari, yorqin isteʼdodini namoyish qilib va istiqlol gʻoyalarini keng targʻib qilishda tengdoshlariga namuna boʻlayotgan 14 yoshdan 22 yoshgacha boʻlgan iqtidorli qizlarga adabiyot, sanʼat, fan, taʼlim va madaniyat sohalarida erishgan ulkan yutuqlari uchun Zulfiya nomidagi Davlat mukofotlari berib borilayapti.

Nizomga muvofiq nomzodlar maktab, kollej, litsey, oliy oʻquv yurtida tanlab olinib, tuman, viloyat, bosqichlaridan oʻtib, Respublika bosqichiga yoʻllanmani koʻlga kiritadilar. Ryespublika bosqichi gʻolibasi esa mazkur yuksak mkofotga sazovor boʻladi.

Yaqin tuman madaniyat va sport ishlari boʻlimida boʻlib oʻtgan tanlovda tumanimizdagi Zulfiyaxonim izdoshlari sinovdan oʻtdilar.

Beshta yoʻnalish boʻyicha qatnashgan 22 nafar qizlarning hakamlar hayʼati qaroriga binoan eng munosiblari saralab olinib, Qoraqalpogʻiston respublikasi bosqichiga yoʻllanma berildi.

Lobarning orzulari

Lobar Jumaboyeva 3-sonli Amudaryo akademik litseyida oʻqiydi. U fan asoslarini chuqur oʻrganib qolmay, badiiy ijod bilan ham shugʻullanadi. Uning isteʼdodi shu jihati bilan qadrliki, u ona Vatanimizning betakror tabiati, baxtli bolalik va oʻzaro mehr-oqibat haqida yozgan sheʼrlariga mos rasmlar ham chizadi.

U ustozi Bozorboy Xolimbetovning saboqlarini puxta oʻzlashtirayotgani bois, chizgan rasmlari bilan "Kelajak ovozi” tanlovida qatnashib, Qoraqalpogʻiston Respublikasi bosqichida uchinchi oʻrinni egalladi.