ChOR-ATROF OBOD BOʻLSA...
Obod va soʻlim maskanda yashashni, toza havodan toʻyib-toʻyib nafas olib bardam yurishni kim ham xohlamaydi, deysiz. Joriy yilimizning Yurtboshimiz tomonidan "Obod turmush yili” deya eʼlon qilinishi ham oʻzimiz, yaqinlarimiz istiqomat qiladigan hududlarni, Oʻzbekiston deya atalmish shu oilamizni obod va farovon qilish borasida zimmamizga ulkan vazifalar yuklaydi va ijrosiga erishishdan hammamiz ham manfaatdormiz. Chunki bizning sogʻ-salomat va bardam hayot kechirishimiz 20-25 foiz atrofimizni oʻrab turgan olam bilan chambarchas bogʻliq ekanligini tibbiyot tasdiqlamoqda.
Tuman obodonlashtirish boshqarmasi mehnat jamoasi yil boshidan beri atrof-muhitni obodonlashtirish, koʻkalamzorlashtirish va tozaligini taʼminlash borasida keng koʻlamli ishlarni olib bormoqda.
2009-2011-yillarda obodonlashtirish boshqarmalarini zamonaviy maxsus avtotransport vositalari bilan taʼminlash rejasiga muvofiq bugungi kunda boshqarmamiz bitta suv sepish mashinasi, bitta axlat tashuvchi mashina, 1 dona ekskavator, 1 dona toza ichimlik suvi tashish mashinasi, 3 ta traktor bilan taʼminlangan boʻlib, zimmamizdagi vazifalarimizni ado etishda ulardan samarali foydalanayapmiz.
Tuman obodonlashtirish boshqarmasi tasarrufiga kiruvchi barcha koʻchalarda yil boshidan beri keng koʻlamli obodonlashtirish ishlari olib borildi. 122,12 kilometrlik Mangʻit shahri ichki yoʻllarida taʼmirlash ishlari olib borildi va davom ettirilmoqda.
Yilimiz koʻklamida ishchilarimiz 6000 tup mevali va manzarali daraxt koʻchatlari oʻtqazgan edilar va ayni kungacha unib ketgan koʻchatlar parvarish qilinayapti. Shuningdek, mavjud 1200 tup manzarali daraxtlarga shakl berilib, sugʻorib, oziqlantirilayapti.
Mavjud 74 ta qabristonlarda ham obodonlashtirish ishlari olib borilmoqda va ota-bobolarini ziyorat qiluvchilarga yaxshi sharoitlar yaratilmoqda.
Bu koʻlamdor vazifalarni ado etishda Oʻzbekiston Respublikasi Vazirlar Mahkamasining 2009-yil 1-apreldagi 91-sonli "Obodonlashtirish xodimlarini moddiy ragʻbatlantirishni kuchaytirish chora-tadbirlari toʻgʻrisida”gi qarori asosida ishchilarimizga qulay mehnat sharoitlari yaratilayotgani va ragʻbatlantirilib borilayotgani bizga juda qoʻl kelayapti.
Shuni ham taʼkidlashni istardimki, tumanimizda har yili koʻklam va yozda umum-xalq xayriya hasharlari oʻtkazib kelinayotganligi ham atrofimizning orasta va koʻrkam boʻlishiga xizmat qilayapti. Shuningdek, mahallalar oqsoqollari va maslahatchilarining aholi orasida koʻkalamzorlashtirish va tozalikka rioya qilish lozimligi borasidagi keng tushuntirishlari ham oʻz samarasini koʻrsatayapti. Xonadonlar sohiblari hovlisi atrofini koʻrkam qilishga, tomorqalariga mevali daraxtlar ekishga sidqidildan kirishadigan boʻldilar.
Aslida ham har kim ixcham va qulay hovlisi atrofini obod qilib, gullar ekib, koʻrgan koʻzni quvontiradigan qilib qoʻysa, yurtimiz obodligiga, tirikligimizni taʼminlovchi havoning tozaligiga ulkan hissa qoʻshgan boʻlar edi.
Ikrom KARIMOV,
tuman obodonlashtirish boshqarmasi boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
