Ezgu ishlarda yashayotgan ustoz

Azim Qilichboyning “Xizr eli” mahallasida tugʻilib-oʻsgan va butun vujudi bilan shu zaminga bogʻlanib, uning har bir giyohidan tortib, har bir bolasiga va taʼbir joiz boʻlsa, har bitta xonadoniga mehr qoʻyib yashagan Boltaboy Sodiqov kechagina biz bilan hamnafas, hayot edilar. Bugun esa... Uning nomi mangulikka daxldor boʻlib qoldi. Umr boʻyi oʻzi ishlagan 46-sonli maktabda, mahalla-koʻyda, oshna, yor-doʻstlar, qadrdonlar va nihoyat oilasi davrasida bu aziz insonning oʻrni boʻm-boʻsh...

Boltaboy Sodiqov butun “Xizr eli” mahallasining faxri edi. Hali oʻquvchilik paytidanoq oʻzining intizomi, chiroyli xulqi bilan atrofidagilarning mehrini qozongan Boltaboy Sodiqov 1972-yilda Nukus Davlat pedagogika institutining fizika-matematika fakultetini muvaffaqiyatli tugatib, ilk ish faoliyatini 46-sonli umumtaʼlim maktabida fizika fani oʻqituvchisi boʻlib ishlashdan boshladi. Bilimdon, fikri teran Boltaboy Sodiqov juda qisqa fursatda maktabning yetakchi oʻqituvchilari safidan joy oldi. Maktabda fizika fanini oʻqitish boʻyicha oʻziga xos tajriba maktabini yaratdi. Natijada Boltaboy Sodiqovning saʼy-harakatlari, ushbu fanni oʻqitish borasidagi uslubi, taʼlim-tarbiya sohasidagi tajribalari alohida eʼtiborga olinib, 46-sonli maktab fizika fanini oʻqitish boʻyicha tumandagi tajriba-tayanch maktabiga aylantirildi.

– Nafaqat hamkasblari orasida, balki oilada ham soʻzi, fikri oʻtkir, hurmati baland edilar, – deydi u kishining umr yoʻldoshi, xalq taʼlimi faxriysi Jamila opa Safarboyeva. – U kishi hech kimga tanbeh berib, qattiq gapirmasdilar. Oʻgʻil-qizlari, nevaralari bilan hurmatli insonlar bilan gaplashganday muomala qilardilar. Barchamizga gʻamxoʻr edilar.

– Agar ustoz Sodiqov bizga fizika fanini chuqur oʻrgatmaganlarida men bugungi darajaga yetishmagan boʻlardim, – deydi tuman faollaridan biri Omonboy Yusupov. – Ustoz bizga bu fanni goʻzal sheʼriyat darajasida maroqli oʻtardilar.

Boltaboy Sodiqov shogirdlarining deyarli 80 foizi oliy maʼlumotli mutaxassislar boʻlib yetishishgan. Komiljon Omonov – tajribali jarroh, Aminboy Oʻrozmetov stomatolog-shifokor, Mansur Qosimov ichki ishlar xodimi, Zafar Otamurodov Iqtisod kolleji direktori, Zulfiya Sotiboldiyeva bolalar shifokori, Muyassar Otamurodova terapevt-shifokor, Raʼno Aminova, Sayyora Eshchanova, Surayyo Eshimbetovalar biri matematika, birlari fizika fani oʻqituvchilari. Bu roʻyxat juda uzun. Boltaboy Sodiqov oʻzi hayotligida har bir qalbga ilm nurlarini yoʻgʻirgan nurli yoʻl kabi uzundir bu roʻyxat. Chunki bu ustozdan taʼlim olgan insonlar “Xizr eli” mahallasidan taralgan maʼrifat nurlari boʻlib mamlakatimizning turli goʻshalariga charogʻonlik baxsh etgan. Ana shu charogʻon manzillarda shogirdlari tomonidan amalga oshirilayotgan ezgu ishlarda Boltaboy Sodiqovning ikkinchi umri davom etayotganday. Zero, yaxshi, ezgu ishlari bilan el-yurt yuragidan joy olgan insonlar nomi mangulikka daxldordir.

Robiya YOʻLDOShEVA.