SARIShTALI VA FARIShTALI XONADONLAR KOʻPAYaVERSIN

Xonadonlarni ozoda, saranjom-sarishta saqlash, oila aʼzolarini sogʻlom turmush tarzini yaratishga moyil qilib tarbiyalash ham xalqimiz uchun bobomeros oila qadriyatlaridan hisoblanadi. Chunki qayerdaki sogʻlom turmush tarzi qaror topar ekan, oʻsha manzil obod va koʻrkam qiyofa kasb etadi. Xonadonlardagi saranjom-sarishtalik har bir inson hayotiga goʻzallik baxsh etadi.

“Taraqqiyot koʻzgusi” gazetasi tahririyati qoshidagi “Jayxun sadosi” internet-radiosi tahririyatining “Salomatlik – tuman boylik” loyihasi doirasida tumanimizdagi fuqarolar yigʻinlari bilan hamkorlikda tashkil qilingan “Sarishtali uy – farishtali uy” koʻrik-tanlovidan koʻzlangan maqsad ham avvalo xalqimizning oʻz xonadonlarida saranjom-sarishta va ozoda turmush muhitini yaratishdek oila qadriyatlariga nechogʻlik ahamiyat berayotganlarini oʻrganish, shu barobarida oʻz oilaviy tutumlari, orastaliklari bilan boshqalarga ibrat boʻlayotgan xonadonlar sohiblari va bekalarining oilaviy hayot tajribalarini ommaga maʼlum qilishdan iborat.

“Sarishtali uy – farishtali uy” koʻrik-tanlovi dastlab ovul va mahallalar fuqarolar yigʻinlarida oʻtkazilib, ovul va mahallalardagi ozoda va sarishta xonadonlar aniqlanib, gʻolib xonadonlar, keyingi bosqichda ishtirok etish imkonini qoʻlga kiritdilar. Joriy yilning 3-iyul kuni tumanimizning Qipchoq hududidagi A.Temur nomli, “Choykoʻl”, “Qipchoq”, “Qangli” OFYlari hamda “Uyshin”, “Daryo boʻyi” mahallalarida gʻoliblikni egallagan xonadonlar orasidan eng sarishta, eng ozoda va orasta xonadonni aniqlash boʻyicha “Taraqqiyot koʻzgusi” gazetasi, AmuTV tahririyati, “Jayxun sadosi” internet-radiosi tahririyati hamda tuman DSENM xodimlaridan iborat ishchi guruh oʻz xulosalarini maʼlum qildi. Unga koʻra, Amir Temur nomli ovul fuqarolar yigʻinida istiqomat qiluvchi Xalilla Yunusov xonadoni koʻrik-tanlovning barcha talablariga javob beradigan “Sarishtali uy – farishtali uy” sifatida tan olindi va xonadon bekasi Gulchehra Matqurbonovaga tashkilotchilar tomonidan changyutgich sovgʻa qilindi.

Gʻolib xonadonni aniqlashda bir jihatga alohida eʼtibor berdik, - deydi koʻrik-tanlovning ishchi guruhi aʼzosi, tuman DSENM shifokori Xursand Ibragimov. – Oddiy, mehnatkash, tomorqa xoʻjaligi obod boʻlgan xonadonda madaniy-maishiy sharoitning mavjudligi asosiy diqqat markazimizda boʻldi. Mahallalardagi xonadonlarni kuzatish jarayonida shunday holatlar ham boʻldiki, yashash joyi - asosiy uy shohona lekin molxona, hojatxona va boshqa maishiy xonalarga eʼtibor berilmagan. Tomorqalar qarovsiz. Xalilla Yunusovlar oilasida esa hamma narsa joyida, haqiqiy orasta, farishtali xonadon. Oila aʼzolari fidoyi, mehnatkash.

“Sarishtali uy – farishtali uy koʻrik-tanlovi tumanimizning barcha ovul va mahallalarida davom etmoqda. Istaymiz, tumanimizda sarishtali va farishtali xonadonlar koʻpayaversin.

Robiya YOʻLDOShEVA.