Aholini toza ichimlik suvi bilan taʼminlash ishlari YaNGI BOSQIChGA KOʻTARILMOQDA

Bugungi kunda tumanimizda 191,6 ming nafar aholi istiqomat qilayotgan boʻlib, ularning 68,9 ming nafari markazlashgan ichimlik suvi bilan taʼminlangan. Qolgan 122,7 ming nafar aholi muqobil ichimlik suv manbalari, yaʼni quduq va daryo suvlaridan isteʼmol qiladi.

Tuman Suv tarmoqlari korxonasi aholining 36 foizini toza ichimlik suvi bilan taʼminlaydi. Shundan shaharda yashovchi 27,5 ming nafar, yaʼni 14,4 foiz aholiga suv tarmoqlari filiali tomonidan markazlashtirilgan tarmoqlar orqali suv yetkaziladi. Undan tashqari, korxonadan toza ichimlik suvi maxsus texnikalar yordamida Jumurtov shaharchasida, Jumur ovul va Oybek nomli mahallalarda, Toʻlqin, Qangli, Qipchoq, Oʻrta qalʼa ovullarida yashovchi 41,4 ming nafar, yaʼni 21,6 foiz aholiga yetkazib beriladi.

Qishloq aholisini toza ichimlik suvi bilan taʼminlash maqsadida loyiha asosida 2016-yilda “Osiyo taraqqiyot banki” tomonidan “Boʻz yop” ovuli hududida 32,3 km. uzunlikdagi vodoprovod tarmogʻi yangidan qurildi.

Prezidentimizning shu yil 29-martdagi «Obod qishloq» dasturini 2018-yilda amalga oshirish boʻyicha qoʻshimcha chora-tadbirlar toʻgʻrisida»gi qarori asosida Nazarxon ovuli hamda Qipchoq shaharchasida aholini toza ichimlik suvi bilan taʼminlash boʻyicha qator ishlar amalga oshirilmoqda.

Jumladan, Nazarxon ovulida uzunligi 2,8 km. boʻlgan suv quvuri rekonstruktsiya qilinadi. Shuningdek, 4,1 km masofada suv tarmoqlari yangidan quriladi. Mazkur ovulda jami 6,9 km. uzunlikdagi suv quvurlari yotqiziladi. Bularning barchasiga 656 mln. soʻm mablagʻ sarflanadi. Hozirgi kunda qurilish ishlari yakunlanish arafasida. Loyiha amalga oshirilishi natijasida 245 ta xonadon markazlashgan toza ichimlik suvi bilan taʼminlanadi.

Qipchoq shaharchasida esa 2 ta tozalangan ichimlik suvi sotish shoxobchasi qurilishi moʻljallangan. Hozirgi kunda qurilish uchun yer maydonlari aniqlanib, 660 mln. soʻmlik loyiha smetalari asosida qurilish ishlari olib borilmoqda.

Prezidentimizning “2018-yil uchun investitsiya va infratuzilma loyihalari roʻyxatini tasdiqlash toʻgʻrisida”gi qaroriga asosan tumanda aholini toza ichimlik suvi bilan taʼminlash maqsadida 2018-yilgi Davlat dasturi doirasida jami 17,2 km. suv tarmoqlarini yangidan qurish hamda rekonstruktsiya qilish rejalashtirilgan.

Mangʻit shahridagi “Boʻston”, Oybek nomli, “Gulzor” va “Bosuv” mahallalarida yashovchi aholining ichimlik suvi bilan taʼminlanishini yaxshilash maqsadida Gurlan va Qipchoq koʻchalari boʻylab uzunligi 3 km. boʻlgan, smeta bahosi 1 mlrd. 537 mln. soʻmlik loyiha boʻyicha magistral suv quvuri rekonstruktsiya qilinmoqda.

Rejaga koʻra, “Yangiobod”, “Olmazor” va “Gulzor” mahallalarining aholisini toza ichimlik suvi bilan toʻliq taʼminlash maqsadida “Doʻstlik” mahallasidan “Olmazor” mahallasi hududigacha uzunligi 2,5 km. boʻlgan, smeta bahosi 1 mlrd. 303 mln. soʻmlik loyiha asosida yangidan magistral suv quvuri yotqiziladi. “Durunki” mahallasi xonadonlarini toza ichimlik suvi bilan taʼminlash maqsadida esa mahalla hududidagi koʻchalarga smeta bahosi 1 mlrd. 150 mln. soʻmlik loyiha asosida jami 5,7 km. uzunlikda magistral va ichki koʻcha suv tarmoqlari oʻtkaziladi. “Gulzor” mahallasida ham aholini toza ichimlik suvi bilan taʼminlash uchun mahalla koʻchalariga jami 6 km. uzunlikda, smeta bahosi 1 mlrd. 225 mln. soʻmlik loyiha asosida suv tarmoqlari oʻtkazilib, mustaqillik bayrami arafasida aholiga foydalanishga topshirilishi moʻljallanmoqda.

Kelgusi 2019-yilda ham tuman hududida jami 18 km. uzunlikdagi suv tarmoqlarini oʻtkazish boʻyicha taklif kiritilgan. Smeta bahosi 7,1 mlrd. soʻmlik loyiha boʻyicha “Olmazor”, “Yangiobod”, Oybek nomli va “Chordara” mahallalarida yashovchi aholini ichimlik suvi bilan taʼminlash yaxshilanadi.

Keyingi yilda “Besh tom” ovulida ham jami 7.2 km. masofaga magistral va ichki koʻcha suv tarmoqlarini oʻtkazish boʻyicha taklif berilgan. Smeta bahosi 970 mln. soʻmlik loyiha asosida “Besh tom” ovuli aholisi toza ichimlik suvi bilan taʼminlanadi.

“Qilichboy” va “Choykoʻl” ovullarida aholini toza ichimlik suvi bilan taʼminlash uchun suv sotish shoxobchasi qurish boʻyicha taklif loyihalari berilgan.

Bundan tashqari, 2017-2021-yillarda Osiyo taraqqiyot banki mablagʻlari hisobidan “Qipchoq” ovuli hududiga 1 ta zamonaviy tipdagi, sutkasiga 35 ming kub metr sifatli ichimlik suvi ishlab chiqarishga moʻljallangan suv tozalash inshooti quriladi. Tuman miqyosida esa bank mablagʻlari hisobidan 95 km. uzunlikda yangidan suv tarmoqlari oʻtkaziladi va 110 km. suv tarmoqlari rekonstruktsiya qilinadi.

Amalga oshirilayotgan bu kabi ishlar aholining toza ichimlik suvi bilan taʼminlanganlik darajasini oshirish, xalqimizning turmush sifatini yanada yuksakka koʻtarishga xizmat qiladi.

Akbar RAJABOV, Amudaryo tuman

Suv tarmoqlari filiali boshligʻi.