Paxta terimida majburiy mehnatga yoʻl qoʻyilmaydi! (+video)

Maʼlumki, joriy yil 4-iyul kuni Oʻzbekiston Prezidenti Shavkat Mirziyoyev raisligida oʻtkazilgan selektor majlisida paxtachilikda bozor munosabatlarini keng joriy etish, yetishtirilayotgan mahsulot hajmini barqaror oʻsishini taʼminlash bilan bir qatorda, fermer xoʻjaliklarining rentabelligini oshirilishiga eʼtibor qaratgan holda, bu yil mutlaqo yangicha yondoshuv asosida paxta yigʻim-terimini tashkil etish tizimini ishlab chiqish boʻyicha topshiriq bergan edi.

Topshiriqqa asosan yutegishli masʼullar tomonidan paxta yigʻim terimi tizimi ishlab chiqildi va shu asosida joylarda ish tashkil qioinmoda. Bu masala boʻyicha qaror loyihasi tayyorlanib, joriy yil 30-avgust kuni Vazirlar Mahkamasining «2018-yil hosili paxta xom ashyosini yigʻib-terib olish ishlarini uyushqoqlik bilan tashkil etish chora-tadbirlari toʻgʻrisida»gi 703-sonli qarori qabul qilindi.

Mazkur qaror bilan paxta hosilini yigʻib-terib olishni uyushqoqlik bilan tashkil etish va terimchilarni ragʻbatlantirishning aniq mezonlari belgilab berildi.

«Bu yil dehqonlarimizni tabiat ogʻir sinovdan oʻtkazdi. Suv taʼminotida koʻplab muammolar kuzatildi. Shunga qaramay dehqonlarimiz fidokorona mehnatlari, tajribalari bilan moʻl hosil yetishtirdi. Hozirda oldimizda paxta hosilini nes-nobud qilmay yigʻishtirib olish masalasi turibdi. Ushbu mavsumda hech qaysi hududda maktab oʻqituvchi va oʻquvchilari, boshqa taʼlim dargohlari talabalari, tibbiy muassasalar xodimlari, 18 yoshga toʻlmagan shaxslar paxta terimiga majburan jalb etilmaydi. Biz majburiy mehnatga qarshi keskin choralar koʻramiz. Vaqtincha ishsiz fuqarolar paxta terimiga ixtiyoriylik asosida kirishishi uchun terimchilarga iqtisodiy manfaatga asoslangan sharoit yaratib berishimiz kerak», — degan edi Bosh vazir Abdulla Aripov.

Mazkur topshiriqlar ijrosini taʼminlash maqsadida tumanimizda ham tizimli ishlar amalga oshirilmoqda. Aytish kerakki, davlatimiz tomonidan paxtaning xarid narxlari oʻtgan yillarga qaraganda ancha oshgani, qolaversa, qoʻlda turilgan paxta uchun tabaqalashtirilgan holda, ming soʻmgacha haq toʻlanishi terimchilarning moddiy manfaatdorligini oshirmoqda. Bundan tashqari, tumanimiz paxtani qoʻshimcha kuchlarsiz terib oladigan mamlakatimizdagi sanoqli tumanlar qatoriga kirgani uchun qoʻlda terilgan har bir kilogramm paxtaga qoʻshimcha 100 soʻmdan terim puli toʻlanmoqda. Bularning barchasi aholining koʻngilli tarzda dalaga chiqishlariga asos yaratmoqda.

Shunindek, ovul va mahalla fuqarolar yigʻinlari ham terimchilarni muntazam ravishda ragʻbatlantirib borish orqali oʻz hududida ishsiz oʻtirgan fuqarolarni paxta yigʻim-terimiga chiqib, qoʻshimcha daromad olishga chaqirmoqda. Oʻtkazilayotgan targʻibot ishlari oʻz samarasini berib, ayni kunlarda shahar mahallalaridan minglab fuqarolar paxtakorlarga yordam berish va qoʻshimcha daromad olish uchun paxta dalalariga chiqmoqda.

Tumanimizning Doʻstlik mahalla fuqarolar yigʻini maʼmuriyati ana shunday terimchilarni ragʻbatlantirish maqsadida paxta dalasiga chiqishdi. Terimchilarga esdalik sovgʻalari topshirilib, tashakkurnomalar taqdim qilindi.