Yangi biometrik pasport
Oʻzbekiston Respublikasi Prezidentining 2009-yil 23 iyuldagi PF-4117-sonli va Oʻzbekiston Respublikasi Prezidentining 2011-yil 5 yanvardagi "Oʻzbekiston Respublikasida pasport tizimini yanada takomillashtirishga doir qoʻshimcha chora-tadbirlar toʻgʻrisida”gi PF 4262-sonli Farmonlariga asosan Oʻzbekiston Respublikasi fuqarosining amaldagi pasporti 2015-yil 31 dekabrgacha haqiqatligi belgilab berilgan. Yaʼni, fuqarolar shu muddatga qadar yangi turdagi biometrik pasport bilan taʼminlanishlari shart.
Oʻzbekiston Respublikasi hududida doimiy yashovchi fuqaro pasport olishi uchun doimiy roʻyxatda turadigan joyidagi ichki ishlar idoralarining maʼlumotlarni yigʻish punktiga murojaat qilishi lozim. Ular buning uchun Ichki ishlar Vazirligi tomonidan belgilangan maxsus shakldagi anketa-arizani toʻldirishi va unga shaxsini tasdiqlovchi tegishli hujjat-amaldagi pasporti yoki birinchi marta pasport olayotganlar tugʻilganligi haqidagi guvohnomasini, ota-onasining pasport nusxasi, davlat boji toʻlaganligi haqidagi kvitantsiyani ilova qilishi kerak. Pasport egasining familiyasi, otasining ismi, ismi, millati, tugʻilgan sanasi oʻzgarganligi yoki yozuvlarda noaniqliklar mavjudligi aniqlanganligi munosabati bilan yangi biometrik pasport rasmiylashtirilishidan oldin ushbu holatlarni tasdiqlovchi hujjatlarni taqdim etadi.
Biometrik maʼlumotlarni yigʻish punkti operatori fuqarolarning biografik va biometrik maʼlumotlarini kompyuter umumiy toʻplamiga kiritadi. Bunda fuqaroning barmoq izlari olinadi va raqamli fotosuratga tushiriladi. Ushbu maʼlumotlar asosida elektron talabnoma tayyorlanib, maxsus elektron tarmoq orqali Oʻzbekiston Respublikasi Vazirlar Mahkamasi huzuridagi Davlat personallashtirish markaziga yuboriladi. Bu yerda elektron talabnomalar asosida hujjatlar personallashtiriladi, yaʼni, biografik maʼlumotlar pasportni vizual tekshirish zonasiga, biografik va biometrik axborot esa chipga kiritiladi.
Eski namunadagi pasportni rasmiylashtirishda fuqarolar tomonidan fotosurat taqdim etilib, ushbu fotosurat fuqaro pasportiga yopishtirib berilgan boʻlsa, biometrik pasportni rasmiylashtirishda fuqarolardan fotosurat olib kelish talab qilinmaydi. Xorijga chiqish-kelish va fuqarolikni rasmiylashtirish xizmatida fuqaro fotosuratga olinib, ushbu fotosurat pasport blankasiga bosmalash yoʻli bilan tushiriladi. 16 yoshdan oshgan fuqarolardan barmoq izlari maxsus skaner qurilmalari orqali olinadi. Shuningdek, biometrik pasportga barcha zarur maʼlumotlar lotin alifbosi asosida kiritiladi.
Biometrik pasportning varaqlari soni 36 tadan iborat va maxsus mikrochip oʻrnatilgan boʻlib unga pasport egasining biografik hamda biometrik maʼlumotlarining elektron nusxalari kiritiladi.
Maʼlumotlarni toʻplash punktiga kelish uchun jismoniy imkoniyati boʻlmagan shaxslarga ham biometrik pasport berish mexanizmi ishlab chiqilgan. Harakatlanish imkoniyati cheklangan shaxslarga xizmat koʻrsatish uchun biometrik maʼlumotlarni toʻplash punktlari huzurida ariza beruvchi yashayotgan joyda uning raqamli fotosurati va barmoqlari izini olish imkonini beradigan mobil stantsiya orqali rasmiylashtiriladi.
Yuqorida qayd etilgan Oʻzbekiston Respublikasi Prezidenti Farmonlarini amalga oshira borib, joriy 2013-yil 28-iyuldan eʼtiboran tumanimiz fuqarolariga yangi biometrik pasportlarni rasmiylashtirib taqdim etishga kirishildi. Shu kunga qadar 3500 nafarga yaqin fuqarolarning talab qilingan hujjatlari kompyuter bazasiga kiritilib, yangi biometrik pasportlar talab darajasida tayyorlanmoqda. Shulardan 3000 tadan ortigʻi sifatli tayyor qilinib, fuqarolarga taqdim etildi. Yangi yilgacha 6000 nafarga yaqin fuqaro yangi biometrik pasport egalari boʻladilar. Yangi 2014-yil davomida jami 46 ming nafardan ortiq fuqaro yangi biometrik pasport sohiblari boʻladilar. 2015-yil oxirigacha tumanimizning pasport yoshidagi fuqarolarning barchasi yangi biometrik pasportga egalik qiladilar. Bu bilan Prezidentimizning mazkur Farmonlari toʻla-toʻkis muvaffaqiyatli amalga oshiriladi.
Nurbek KAMOLOV,
Amudaryo tumani IIB xorijga chiqish-kelish va fuqarolikni rasmiylashtirish boʻlinmasi boshligʻi, mayor.
(Foto: http://fikr.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
