Yangiliklar, voqealar, xabarlar

Dushanba - nuroniylar kuni

Dushanba - "Olmazor" mahallasida faoliyat yuritayotgan "Salomatlik" sektori ish rejasida "Nuroniylar kuni" deya belgilanganligiga koʻra, mazkur sektor rahbari, hudud shifokori Nargiza Yoʻldosheva va diniy maʼrifat, maʼnaviy-ahloqiy tarbiya masalalari boʻyicha maslahatchi Gulnora Oʻrozboyevalar keksa otaxon Oʻtamurod Mamutov, onaxonlar Xolbika Avazboyeva, Malika Bozorboyevalarning xonadonlarida boʻlib, sogʻligini nazoratdan oʻtkazishdi. Salomatligini asrash, dori-darmonlarni qanday qabul qilish kerakligi toʻgʻrisida tavsiyalar berdilar.

Shoʻr yuvish qizgʻin

Qipchoq ovulidagi fermer xoʻjaliklari 2013-yilni barcha sohalar boʻyicha muvaffaqiyatli yakunladilar. Ayni kunlarda hosildan boʻshagan, sifatli shudgor qilingan dalalarda shoʻr yuvish ishlari jadal surʼatlarda olib borilmoqda. 1136 gektar yer bir marta sifatli sugʻorilgan boʻlsa, 600 gektardan ziyod maydon ikkinchi marta sugʻorildi.

Ijodkorlar uchrashuvi

Shu yilning 27-dekabrida Qoraqalpogʻistonda xizmat koʻrsatgan faxriyjurnalist Saʼdulla Xoʻjaniyozov tashabbusi bilan tumanimizda yashab, ijod qilayotgan sheʼriyat ixlosmandlarining uchrashuvi boʻlib oʻtdi.

Uchrashuvda ijodkorlar oʻz ijodlaridan namunalar oʻqidilar, fikrlashdilar.

Uchrashuv havaskor-ijodkorlarga koʻtarinki kayfiyat ulashdi.

Yosh qalamkashlar taqdirlandi

Yosh ijodkorlarni qoʻllab-quvvatlash, ularning ijodiy qobiliyatlarini oʻstirish, "Obod turmush yili" Davlat Dasturini amalga oshirish jarayonidagi xalqimizning fidoyi mehnatlarini keng targʻib qilish maqsadida 2013-yil boshida "Taraqqiyot koʻzgusi" gazetasi tahririyati tomonidan "Obod turmush - ezgu maqsadimiz" tanlovi eʼlon qilingan edi.

Shu yilning 7-yanvar kuni "Taraqqiyot koʻzgusi" gazetasi tahririyatida tanlovda faol ishtirok etgan yosh ijodkorlarni taqdirlash marosimi boʻlib oʻtdi.

Nukus Davlat pedagogika institutining 4-bosqich talabasi Feruza Razzoqova tanlov gʻolibi deb topildi va 1-darajali diplom bilan taqdirlandi. Mangʻit iqtisodiyot kasb-hunar kolleji talabasi Aziza Madrahimova ikkinchi, Nukus Davlat pedagogika instituti talabasi Muhabbat Sobirova uchinchi darajali diplomlar va esdalik sovgʻalari bilan taqdirlandilar.

Gʻoliblarni taqdirlash marosimida gazeta muharriri Gʻ.Yeshniyozov, jurnalistlardan A.Jumaniyozov, O.Rajabova, R.Yoʻldosheva, O.Xudoyberganova va "Barkamol avlod" bolalar markazi mutaxassisi Z.Olloyorovalar soʻzga chiqishib, yosh ijodkorlarga muvoffaqiyatlar tiladilar. Oʻz navbatida yosh qalamkashlar oʻz ijod namunalaridan oʻqib berdilar.

Bilimlar bellashuvi

7-yanvar kuni tumanimizdagi umumtaʼlim maktablarining 9-sinf oʻquvchilari orasida fanlar olimpiadasining tuman bosqichi boʻlib oʻtdi. Olimpiadada 76 ta maktabdan, hudud bosqichida gʻoliblikni qoʻlga kiritgan 256 nafar oʻquvchi qatnashdi. 8-9-yanvar kunlari esa 5-8-sinflar oʻrtasida "Bilimlar bellashuvi" tuman bosqichi boʻlib oʻtdi. Unda oldingi bosqichda gʻolib boʻlgan 511 nafar oʻquvchi ishtirok etib, bilimlarini sinovdan oʻtkazdilar.

"Harakat xavfsizligi oyligi” davom etmoqda

Oʻzbekiston Respublikasi Vazirlar Mahkamasining 2013-yil 4-dekabrdagi 825-f-sonli farmoyishiga asosan Mamlakatimizning barcha joylaridagi kabi bizning tumanimizda ham "Harakat xavfsizligi oyligi" tadbirlari oʻtkazilmoqda.

2013-yilning 15-dekabridan shu kungacha tuman IIBAMTVTXUFMKAKNE boʻlinmasi tomonidan tuman davlat soliq inspektsiyasi bilan hamkorlikda 6 ta maxsus reydlar oʻtkazildi, bir qancha yoʻlovchi tashish bilan shugʻullanuvchi uyushmalarda haydovchilar oʻrtasida tushuntirish - targʻibot ishlari olib borildi.

Bunday tadbirlar mehnat jamoalarida va barcha taʼlim muassasalarida ham oʻtkazilmoqda.