Siyosat 27.01.2014 👁 2,705

Barchaga teng tosh-u tarozi

Oʻzbekiston oʻz mustaqilligini qoʻlga kiritib, demokratik huquqiy davlatni barpo qildi. Fuqarolarning huquq va erkinliklarini taʼminlovchi asosiy Qonunimiz - Oʻzbekiston Respublikasi Konstitutsiyasi qabul qilindi. Unda jamiki dunyoviy neʼmatlar ichida eng ulugʻi inson degan fikr ilgari surilib, shu asosda fuqaro - jamiyat - davlat oʻrtasidagi oʻzaro munosabatning oqilona huquqiy yechimi topildi. Konstitutsiyaning 2-boʻlimi inson va fuqarolarning asosiy huquqlari, erkinliklari va burchlariga bagʻishlangan. Shu bobning 18-moddasida barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼi nazar, qonun oldida tengdirlar, deyilsa, 22-moddasida Oʻzbekiston Respublikasi oʻz hududida ham, uning tashqarisida ham oʻz fuqarolarini huquqiy himoya qilish va ularga homiylik koʻrsatishni kafolatlaydi, deyiladi. Demak, asosiy Qonunimizning diqqat markazida inson va uning manfaati yotadi.

Konstitutsiyaning VII bobi shaxsiy huquq va erkinliklarga bagʻishlangan boʻlib, unda yashash huquqi, shaxsiy daxlsizlik huquqi kafolatlanib, hech kim qiynoqqa solinishi, zoʻravonlikka, shafqatsizlik yoki inson qadr-qimmatini kamsituvchi boshqa tarzdagi tazyiqqa duchor etilishi mumkin emasligi, turar joy daxlsizligi, respublika hududida bir joydan ikkinchi joyga koʻchish huquqi, har kimning fikrlash, soʻz va eʼtiqod erkinligi, vijdon erkinligi kafolatlangan. Konstitutsiyaning IX bobida esa fuqarolarning mulkdor boʻlishga haqliligi, mehnat qilish, erkin kasb tanlash, dam olish, ijtimoiy taʼminot olish, malakali tibbiy xizmatdan foydalanish, bilim olish huquqiga ega ekanligi belgilab qoʻyilgan. Konstitutsiyaning 44-moddasida har bir shaxsga oʻz huquq va erkinliklarini sud orqali himoya qilish, davlat organlari, mansabdor shaxslar, jamoat birlashmalarining gʻayriqonuniy hatti-harakatlari ustidan sudga shikoyat qilish huquqi kafolatlanadi.

Biz Konstitutsiyaviy huquq va erkinliklardan foydalanar ekanmiz, qonunlarga rioya etishimiz, tarixiy, maʼnaviy va madaniy merosimizni avaylab-asrashimiz, atrof tabiiy muhitga ehtiyotkorona munosabatda boʻlishimiz, qonunda belgilangan soliq va mahalliy yigʻimlarni toʻlashimiz, Oʻzbekiston Respublikasini himoya qilish kabi burchlarni bajarishimiz zarur. Shundagina biz Oʻzbekiston Respublikasiga munosib farzandlar boʻlamiz. Zero,

Quyosh zarrin nurlari bilan,

Bu olamni charogʻon qilar.

Qomusim – baxt nurlari bilan,

Hayotimni gullarga oʻrar.

Udir mening nomusim-orim,

Shon-sharafim ham buyuk qadrim.

Qomusim-la hamnafas oʻsdim,

Va angladim bu hayot sehrin.

Qomusim bor - ushalgay orzu,

Barchaga teng tosh-u tarozi.

Hamma birday qon-qardosh, ahil,

Biz yoshlarning buyuk parvozi.