IQTISODIYoTGA XORIJIY SARMOYaLARNI JALB QILISh-DOLZARB MASALA

Maʼlumki, mamlakatda toʻgʻridan-toʻgʻri investitsiyalarni jalb etish uchun eng qulay investitsiya muhitini shakllantirish maqsadida iqtisodiyotni liberallashtirish, davlat boshqaruvini isloh qilish boʻyicha keng koʻlamli chora-tadbirlar amalga oshirilmoqda.  Shuningdek, tadbirkorlik subʼektlari faoliyatiga aralashuvni cheklash, litsenziyalash va ruxsat berish tartib-taomillarini qisqartirish, soddalashtirish, tovarlardan erkin foydalanishni taʼminlash va hududlarda zarur infratuzilmani yaratish borasida ham tizimli ishlar yoʻlga qoʻyilmoqda.

Bu borada Prezidentimizning 2019-yil 17-yanvardagi Farmoni bilan «2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini «Faol investitsiyalar va ijtimoiy rivojlanish yili»da amalga oshirishga oid davlat dasturi» tasdiqlandi. Ushbu davlat dasturi iqtisodiyotni rivojlantirish va investitsiyalarni faol jalb etish sohasida makroiqtisodiy barqarorlikni taʼminlash, sogʻlom raqobat uchun zarur sharoitlarni yaratish, ishbilarmonlik va investitsiya muhitini tubdan yaxshilash, iqtisodiyotda davlat ishtirokini jiddiy ravishda kamaytirish, yuqori iqtisodiy oʻsish surʼatlarini saqlab qolish, «xufyona» iqtisodiyotga qarshi kurashish va uning ulushini keskin qisqartirish, valyuta siyosatini erkinlashtirishni davom ettirishga qaratilganligi bilan ham gʻoyatda muhimdir.

Undan tashqari, Harakatlar strategiyasini «Faol investitsiyalar va ijtimoiy rivojlanish yili»da amalga oshirishga oid Davlat dasturida belgilangan vazifalarni bajarish maqsadida Prezidentimizning «Respublika iqtisodiyotiga toʻgʻridan-toʻgʻri xorijiy investitsiyalarni jalb qilish mexanizmlarini yanada takomillashtirish chora-tadbirlari toʻgʻrisida»gi Qarori ham qabul qilindi. Mazkur qaror bilan endilikda kimyo va neft-gaz sanoati, mashinasozlik sohasidagi xoʻjalik yurituvchi subʼektlar, bank-sugʻurta tashkilotlari ustav kapitallaridagi davlat aktsiyalar paketlarini sotish, toʻgʻridan-toʻgʻri xorijiy investitsiyalarni jalb etish uchun tayyor investitsiya takliflarini ishlab chiqish, investitsiya va biznes forumlar, taqdimotlar («Road Show») va marketing kompaniyalari imkoniyatlaridan keng foydalanish, davlat-xususiy sheriklik loyihalarini amalga oshirish boʻyicha ustuvor yoʻnalishlarni tashkil etish nazarda tutilmoqda.

Qaror bilan investorlarga, shu jumladan xorijiy investorlarga ham sotish uchun taklif qilinadigan xoʻjalik jamiyatlarining ustav kapitallaridagi davlat aktsiyalar paketlarining hamda belgilangan tartibda sotiladigan davlat aktivlarining roʻyxatlari tasdiqlandi. Qoraqalpogʻiston Respublikasi boʻyicha mazkur qaror bilan tasdiqlangan mahalliy va xorijiy investorlarga sotish uchun taklif qilinadigan xoʻjalik jamiyatlarining ustav kapitallaridagi davlat aktsiyalar paketlarining roʻyxatida «Qoʻngʻirot soda zavodi» MChJ, belgilangan tartibda sotiladigan davlat aktivlarining roʻyxatida esa, «Turon Xojeyli» AJ va «Yogʻgar Beruniy» AJlari belgilab berilganligini alohida qayd etib oʻtish oʻrinlidir.

Aytish mumkinki, mamlakatimizda iqtisodiy sohada amalga oshirilayotgan keng koʻlamli islohotlar Respublika iqtisodiyotiga toʻgʻridan-toʻgʻri xorijiy investitsiyalarni jalb qilish faoliyati samaradorligini oshiradi. Shu bilan birga xorijiy investorlarni mamlakatimiz imkoniyatlari va salohiyati toʻgʻrisida xabardor qilish, xorijiy investitsiyalarni jalb etish va oʻzlashtirish sohasida davlat va xoʻjalik boshqaruvi organlari, mahalliy ijro hokimiyati organlari faoliyatini muvofiqlashtirishni yaxshilashga xizmat qiladi.

Elmurod Tursunov, Qoraqalpogʻiston Respublikasi adliya vaziri oʻrinbosari.