Gʻalla oʻrim-yigʻimi jadal davom etmoqda

Mamlakatimizning barcha hududlarida gʻalla oʻrim-yigʻimi qizgʻin tarzda davom etmoqda. Tumanimizda ham oʻrim-yigʻim mavsumi uyushqoqlik bilan oʻtkazilmoqda va rizq-roʻzimiz boʻlgan gʻalla nest-nobud qilinmay, qisqa fursatlarda yigʻishtirib olinmoqda.
Tumandagi fermer xoʻjaliklari tomonidan 3 ming 350 gektar maydonga gʻalla ekilgan boʻlib, barcha agrotexnik qoidalar oʻz vaqtida bajarilganligi tufayli moʻl hosil yetishtirildi. Fermer xoʻjaliklari tomonidan davlatga shartnomaviy don sotish rejasi 6695 tonnani tashkil etadi. Gʻalla oʻrim-yigʻimini tizimli olib borish maqsadida mavsum boshlanishida  13 ta otryad tashkil etilib, ushbu otryadlarga 35 ta yuk avtomashinalari, 58 ta transport traktorlari, 92 ta tirkamalari, yoqilgʻi tashish vositalari, shuningdek, har bir otryadga koʻchma taʼmirlash ustaxonalari hamda masʼul xodimlar biriktirildi. Undan tashqari, ishchilar va mexanizatorlarning vaqtida dam olishi va ovqatlanishlari uchun barcha sharoitlar yaratildi.

"Taxiatosh-don mahsulotlari” hissadorlik jamiyatining "Mangʻit-don” filialiga qarashli Qipchoq don qabul qilish maskanida ham ishlar qizgʻin davom etmoqda. Bu yerga fermer xoʻjaliklari tomonidan kuniga 750-830 tonnadan don topshirilmoqda. Biriktirilgan transport traktorlari va yuk avtomashinalari tomonidan tashib keltirilayotgan hosil betoʻxtov qabul qilinmoqda. Undan tashqari ular belgilangan oʻrinlarda toʻkib quritilib, tozalab olinmoqda.

Ilgʻor xoʻjaliklardan “Rajabova Bahor”, “Yoʻldoshev Anvar”, “Jumaboyev Joʻlliboy”, “Eshniyozov Yoʻldosh” fermer xoʻjaliklari  esa belgilangan 22 tsentner oʻrniga 30 tsentnerdan topshirib,  rejani ortigʻi bilan uddalashdi. Gʻalla ekilgan 328 fermer xoʻjalikdan 130 tasi muddatidan oldin davlat shartnomasini bajarishga erishdi.

Bu yil dalalarda hosil moʻl. Mirishkor dehqonlar mehnati evaziga yetishtirilgan gʻalla uyushqoqlik bilan yigʻib olinib, davlatga urugʻlik zahirasi bilan birga yana rejadan tashqari 3500 tonna topshirish rejalashtirilmoqda.

O.Xudoyberganova.