Jamiyat 10.02.2014 👁 1,574

Sogʻlom bola yili yangiliklari

Yangi tanlov eʼlon qilindi

"Taraqqiyot koʻzgusi” gazetasi tahririyati tomonidan tahririyatga yosh ijodkorlarni yanada kengroq jalb qilish va oʻquvchilarning jurnalistika sohasiga qiziqishini oshirish maqsadida taʼlim muassasalari oʻquvchilari oʻrtasida har yili 2 bosqichda, yil davomida 10 ta mavzu boʻyicha oʻtkaziladigan "Eng yaxshi insho” tanlovi tashkil qilindi. Tuman XTMFTTE boʻlimi bilan hamkorlikda eʼlon qilingan ushbu tanlov toʻgʻrisida keng maʼlumot berish uchun tanlov va loyiha toʻgʻrisidagi maʼlumotlar, ularda qatnashish shartlari aks ettirilgan maxsus plakatlar tumandagi 82 ta maktab, akademik litsey va 8 ta kasb-hunar kollejlariga tarqatildi.

Adhambekning gʻalabasi

Yaqinda Toshkent shahrida karate boʻyicha bolalar, oʻsmirlar va katta yoshdagi sportchilar oʻrtasida Oʻzbekiston kubogi musobaqalari boʻlib oʻtdi. Bu nufuzli bellashuvda mamlakatimizdagi barcha viloyatlarning besh yuz nafardan ortiq eng kuchli karatechilari qatnashdi. Ispaniya mamlakatida boʻlib oʻtadigan yoshlar oʻrtasidagi Jahon chempionatida qatnashish uchun tayyorgarlik koʻrgan Oʻzbekiston terma jamoasi aʼzolari mazkur saralash bellashuvida oʻz qobiliyatlarini va mahoratlarini namoyish etdilar. Shiddatli kechgan bu bellashuvda tumanimiz terma jamoasining sardori, eng qobiliyatli karatechi, 2-sonli BOʻSM oʻquvchisi Adham Ibrohimov ham qatnashib, kumite bahsida faxrli uchinchi oʻrinni egallab, bronza medalini qoʻlga kiritdi. A.Ibrohimov – Oʻzbekiston terma jamoasi aʼzosi, jahon kubogi qatnashchisi. U Dubay shahrida boʻlib oʻtadigan Osiyo chempionatida ham qatnashish uchun yoʻllanma oldi va hozirda qizgʻin tayyorgarlik koʻrmoqda.

Tumanimizdagi 2-sonli BOʻSM va tuman karate federatsiyasi raisi Ilhom Erimmetov va murabbiy Ildor Erimmetovlar sportchilarni musobaqaga puxta tayyorlamoqdalar.

Veb-saytning texnik imkoniyatlari kengaymoqda

www.amunews.uz veb-saytining texnik imkoniyatlarini yanada kengaytirildi. Jumladan, saytda foydalanuvchilarni roʻyxatga olish tizimi joriy qilinib, roʻyxatdan oʻtgan va roʻyxatdan oʻtmagan foydalanuvchilarning saytdagi maqolalarga fikr bildirish imkoniyatini yaratildi.

Shuningdek, www.amunews.uz veb-saytining oʻquvchilar auditoriyasini kengaytirish maqsadida tuman XTMFMTTE boʻlimi, tumandagi akademik litsey va kasb-hunar kollejlari bilan hamkorlikda ZiyoNet tarmogʻida oʻquvchilarning tuman saytiga kirishiga koʻmaklashilmoqda. Shu maqsadda targʻibot ishlari olib borilib, oʻquv muassasalarining rasmiy veb-saytlaridagi "foydali manbalar” boʻlimiga www.amunews.uz saytini kiritildi.