MILLIY EMLASh KALENDARIGA 13-TUR KASALLIK KIRITILDI VA UNGA QARShI EMLASh BOShLANDI

Bachadon boʻyni  saratoni – bu hayot uchun havfli  kasallikdir.

Bachadon boʻyni saratoni bachadon ichiga oʻsib, chuqur tarqalishi mumkin. Ayrim vaziyatlarda saraton tananing boshqa qismlariga ham tarqaladi, yaʼni  metastaz beradi. Bachadon boʻyni saratoni ayollar orasida tarqalgan saraton kasalliklari ichida ikkinchi oʻrinni egallaydi.

Har yil dunyo boʻyicha 528 ming ayol bachadon boʻyni saratoni  bilan kasallangan boʻlib, ulardan 266 ming nafari hayotdan koʻz yumayapti. Kasallik 85 foiz rivojlangan mamlakatlarda qayd etilmoqda.

Kasallikning asosiy sababi – odam papillomasi virusidir.

Oʻzbekiston Respublikasida oʻrganishlar natijasida bitta  bachadon boʻyni raki bilan kasallangan bemor bir marta oʻrtacha kasalxonada yotib davolanishi uchun 684 AQSh dollari sarflanadi. Bir yilda 3-6-marta davolansa, 3-6-marta koʻp mablagʻ sarflanadi.

Oʻzbekiston Respublikasida  har yili  bachadon boʻyni raki  kasalligini davolash  sarf harajatlari uchun 4.1 mln. AQSh dollari miqdorida mablagʻ sarflanadi. Shundan 1.5 mln. AQSh dollari davlatimiz byudjeti tomonidan, qolgan qismi bemorlar hisobidandir.

Respublikamizda bachadon boʻyni raki kasalligi diagnozi qoʻyilgandan keyin bemorlarning oʻrtacha yashashi davri 5-7-yilni tashkil qiladi.

Yuqoridagilarni inobatga olib  davlatimiz tomonidan Respublikamizning «Milliy emlash kalendari»ga 13-tur kasallikka qarshi, yaʼni 9-13 yoshli qiz bolalarni odam papilloma virusiga qarshi profilaktik emlash oʻtkazish kiritildi. 2019-yil 21-30-oktyabr kunlari 2010-yil tugʻilgan 9 yoshli qiz bolalarga  emlash oʻtkaziladi.

Emlash oʻtkazish  natijasida kelajakda quyidagilarga erishish mumkin:

– har bir 470 emlangan qiz bolalar oʻrtasida1ta rak kasalligidan oʻlishining oldi olinadi.

– har bir 250 emlangan qiz bolalar oʻrtasida kelajakda 1 ta bachadon boʻyni raki kelib chiqishining oldi olinadi.

– kelajakda har yili 585 holatda bachadon boʻyni rakidan vafot etish va 1100 ta holatda bachadon boʻyni raki kasalligining paydo boʻlishining oldi olinadi.

Hurmatli ota-onalar! Farzandlaringizning salomatligiga befarq boʻlmasdan, oʻz vaqtida emlatsangiz - kasallikning oldini olishga erishasiz.

G.TAJIBAYeVA,
tuman DSENM epidemiologiya boʻlimi mudirasi,
oliy toifali epidemiolog.