Mashaqqatli kasb fidoyisi

Yurtimizda inson salomatligini mustahkamlash, ayniqsa, onalik va bolalikni muhofaza qilish, jismonan sogʻlom hamda maʼnan barkamol avlodni voyaga yetkazish masalasiga ustuvor vazifa sifatida eʼtibor qaratib kelinmoqda. Zero, faqat sogʻlom xalq, sogʻlom millatgina buyuk ishlarga qodir. Bugungi kunda buyuk kelajak egalari boʻlgan sogʻlom va barkamol avlodni voyaga yetkazishga oʻz hissasini qoʻshayotgan tibbiyot xodimlari faoliyati ham tahsinga loyiq.

Barchamizga maʼlumki, Prezidentimiz Qarori bilan chekka hududlardagi qishloq vrachlik punktlari qishloq oilaviy poliklinikalarga aylantirildi. Tumanimizning Qipchoq shaharchasidagi 1-qishloq oilaviy poliklinikasi bugungi kunda oʻzining samarali faoliyatini olib borayotgan tibbiyot maskanlaridan biri. 2017-yilda Qipchoq, Madaniyat, Toʻlqin qishloq vrachlik punktlari tugatilib, 1-sonli qishloq oilaviy poliklinikasi tashkil etildi. Bugungi kunda ushbu tibbiyot maskani Qipchoq, Toʻlqin, Choykoʻl ovullari, Uyshin, Daryo boʻyi, Beshtom mahallalari va Qipchoq shaharchasi hududlaridagi jami 5500 xonadon - 30224 aholiga xizmat koʻrsatadi. Poliklinikada umumiy amaliyot shifokorlari soni 14 nafar boʻlib, bolalar shifokori, jarroh, ayollar shifokori, tish doktori, UZI mutaxassisi, ichki kasalliklar shifokorlari oʻz faoliyatlarini olib bormoqdalar. Tibbiyot maskanida jami hamshiralar soni 55 nafar boʻlib, shundan 35 nafari patronaj hamshiralardir.

1-qishloq oilaviy poliklinikasida 2017-yildan buyon oʻzining patronaj hamshiralik faoliyatini olib borayotgan Raʼno Tangirberganova ham oʻz kasbiga masʼuliyat bilan yondashadigan, jonkuyar xodimlardan biri.

R.Tangirberganova 1991-yilda Qipchoq vrachlik punktida oʻzining hamshiralik faoliyatini boshladi va bir necha yillar davomida ushbu vrachlik punktida ishladi. Oʻz faoliyati mobaynida sohasidagi koʻplab koʻrik-tanlovlarda ishtirok etib, bir qancha yutuqlarni qoʻlga kiritdi. Xususan, “Yilning eng yaxshi hamshirasi” koʻrik-tanlovida qatnashib, tuman bosqichida faxrli 1-oʻrinni egalladi. Qisqa vaqt oraligʻida sinchkov va izlanuvchan hamshira ustoz shifokorlardan tibbiyot sirlarini va tajribalarini oʻrganishdan toʻxtamadi. Bu esa oʻz navbatida yuqori natijalarga erishish imkonini berdi. R.Tangirberganova 2004-yilda oliy toifali hamshira boʻldi. Bunday yutuqlar, shubhasiz, oʻz kasbiga mehr va masʼuliyat bilan yondashish, oʻz ustida ishlash, tinmay mehnat qilish natijasidir.

Charos Arslonova.