NAVOIY QALBLARDA MANGU YaShAYDI
Ayni kunlarda tumanimizdagi oʻquv muassasalarida gʻazal mulkining sultoni Alisher Navoiy tavalludining 579 yilligi keng nishonlanmoqda. Boʻlib oʻtayotgan tadbirlarda Navoiy asarlarining umumjahon miqyosidagi ahamiyati, xalqimiz maʼnaviyatini yuksaltirish borasidagi beqiyos katta oʻrni haqida maʼnaviy-maʼrifiy maʼruzalar oʻqilib, suhbatlar tashkil etilmoqda.
Mir Alisher Navoiy bobomizning maʼnaviyatga toʻla ijodini oʻrganish va targʻib qilish orqali yoshlarni vatanparvarlik ruhida tarbiyalash maqsadida 38-sonli umumtaʼlim maktabida ham maʼnaviy-maʼrifiy tadbir oʻtkazildi.
“Navoiy qalblarda mangu yashaydi” deb nomlangan adabiy-badiiy kechada oʻquvchi-yoshlar oʻzlarining Navoiy asarlarini nechogʻlik bilishlarini amalda namoyon etishdi.
Ulugʻ bobokalonimiz Alisher Navoiy oʻzbek mumtoz adabiyotining tengsiz namoyondasi sifatida yuksak ehtiromga sazovor boʻlgan inson. Darhaqiqat, oʻzbek tili va adabiyotini Alisher Navoiysiz tasavvur qilish qiyin. Nafaqat oʻzbek adabiyoti balki turkiy xalqlar adabiyoti Alisher Navoiy bobomizning ijodi bilan bevosita bogʻliqdir. Sheʼriyat mulkining sultoni hazrat Navoiy tarixda nomlari oltin harflar bilan yozib qoʻyilgan shoir va olimlar sirasiga kirib, u zotning yozgan asarlari ham dunyo adabiyotida shoh asarlar qatoridan oʻrin olgan. Hazratning purmaʼno sheʼr va gʻazallarida ilohiy ishq, halollik, poklik, rostgoʻylik, insoniy ulugʻ fazilatlar, insonparvarlik, diyonatlilik, saxiylik, kamtarinlik, muloyimlik va hokazo insoniyat uchun qancha manfaatlar boʻlsa, barchasi asarlarda oʻz aksini topgan.
Maktabning oʻzbek tili va adabiyot fani oʻqituvchisi Muharram Sobirova mazkur adabiy-badiiy kechada Alisher Navoiy haqidagi maʼruzasida mana shu maʼlumotlarni keltirib oʻtdi. Oʻquvchilar ham hazrat Navoiy ijodidan namunalar, yaʼni gʻazallar va ruboiylarni ifodali yod aytib berdilar. Navoiy yaratgan “Xamsa” asarining dunyo xalqlari qalbida hamon ham havas, ham hayrat uygʻotayotgani, “Xazoyin ul-maʼoniy”, “Muhokamat ul-lugʻatayn”, “Mahbub ul-qulub” kabi asarlari, ayniqsa, “Hayrat ul-abror” dostonidagi falsafiy fikrlari har bir inson uchun eng qimmatli hayotiy saboqlar berishi haqida toʻlqinlanib soʻzladilar.
Kecha davomida bobokalonimiz yashagan davr ruhi aks ettirilgan sahna koʻrinishlarini ham namoyish etishdi. Sahna koʻrinishlari va kecha ishtirokchilari tomonidan ijro etilgan gʻazal va ruboiylar barchaga juda manzur boʻldi.
Boʻlib oʻtgan adabiy-badiiy kecha oʻquvchi-yoshlar qalbida ulugʻ mutafakkir asarlarini yanada puxta, mukammal oʻrganish istagini va buyuk ajdodimiz maʼnaviy merosiga cheksiz mehr uygʻotdi. Shu bilan birga millat maʼnaviyatining porloq quyoshi Mir Alisher Navoiy haqida oʻz bilimlarini yanada boyitishdi.
Muyassar XALILLAYeVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
