ShOIRLARNING SULTONI – NAVOIY

Alisher Navoiy xalqimizning ongi va tafakkuri, badiiy madaniyati tarixida butun bir davrni tashkil etadigan buyuk shaxs, milliy adabiyotimizning tengsiz namoyandasi, millatimizning gʻururi, shaʼni-sharafini dunyoga tarannum qilgan soʻz sanʼatkoridir.

Taʼbir joiz boʻlsa, olamda turkiy va forsiy tilda soʻzlovchi biron-bir inson yoʻqki, u Navoiyni bilmasa, Navoiyni sevmasa, Navoiyga sadoqat va eʼtiqod bilan qaramasa. Inson qalbining  quvonch-u qaygʻusini, ezgulik va hayot mazmunini Navoiydek teran ifoda etgan shoir jahon adabiyoti tarixida kamdan-kam topiladi. Ona tiliga muhabbat, uning beqiyos boyligi va buyukligini anglash tuygʻusi ham bizning ong-u shuurimiz, yuragimizga eng avvalo Navoiy asarlari bilan kirib keladi. Biz bu bebaho merosdan xalqimizni qanchalik  bahramand etsak, milliy maʼnaviyatimizni yuksaltirishda, jamiyatimizda ezgu, insoniy fazilatlarni kamol toptirishda shunchalik qudratli maʼrifiy qurolga ega boʻlamiz.

Alisher Navoiy tavalludining 579 yilligi munosabati bilan 38-sonli umumiy oʻrta taʼlim maktabning 5”B”-sinf oʻquvchilari tomonidan adabiy kecha oʻtkazildi. Maktab sahnasi kechaga mos ravishda gullar, bukletlar, bobokalonimizning surati bilan bezatildi, devoriy gazetalar, fotoalbom, Navoiy asarlari koʻrgazmasi tashkil etildi.

Adabiy kechani maktabimizning maʼnaviy-maʼrifiy ishlar boʻyicha direktor oʻrinbosari Nilufar Tojimurodova ochib berdi. U oʻz soʻzida Navoiyning oʻzbek adabiy tilining, mumtoz adabiyotining asoschisi, sharq badiiy va falsafiy tafakkurini jamlab, yangi pogʻonaga koʻtara olgan mutafakkir ekanligini faxr bilan tilga oldi. Shuningdek, bobokalonimiz Temuriylar davlatining yirik arbobi, adolat himoyachisi, ilm-u irfon, madaniyat va sheʼriyat homiysi, ustoz-murabbiy sifatida tarixda nom qoldirganini ham aytib oʻtdi.

Kechada oʻquvchilar tomonidan Alisher Navoiy hayoti va ijodi haqida maʼlumotlar, uning sheʼrlari, gʻazallari, hikmatli soʻzlari aytildi. Undan tashqari, “Alisher va gado” nomli sahna koʻrinishi ham namoyish etildi. Kecha davomida kuy, qoʻshiq va raqslar ijro qilinib, hammaga xush kayfiyat bagʻishladi.
Boʻlib oʻtgan tadbir oʻquvchilar qalbida Navoiy adabiy merosiga cheksiz hurmat va eʼtibor tuygʻularini yanada mustahkamladi.

Nodira QURBONBOYeVA, 38-sonli maktab oʻqituvchisi.