Adabiyot 08.04.2014 👁 2,875

RUHIYaT MANBAI

Kuy avjida uzilmasin tor,

Sheʼr yarmida sinmasin qalam.

Yashab boʻlmay umrini zinhor,

Bu dunyodan ketmasin odam.

Kuy avjida uzildi, sheʼr yarmida sindi-ku qalam. Dunyoga kelmay qoldi qancha-qancha sheʼrlar. Qoʻshiqqa aylanmadi satrlar. Xuddi oʻzbek sheʼriyatining chinori qulagandek boʻldi. Dillar ashʼorsiz, bogʻlar bulbulsiz, qoʻllar qalamsiz qolgandek goʻyo. Yillar oʻtdi, vaqt oʻtdi. Shoir har doim qalblarda barhayot.

Shoir hayotligida lolaqizgʻaldoqqa "Qabrim uzra hilpirab tur”, - deya iltijo qilgan edi. Uning sheʼrlari, bayotlari koʻngil gulshanida lolaqizgʻaldoqdek yashnab turibdi. Bu lolaqizgʻaldoqdan koʻngillar malham topgay, yuraklar sirdosh topgay, hayotdan izlaganingizni topa olmaganingizda, nolishga taraddudlanganingizda yoningizdagi baxtni his qildirish uchun shu satrlar tilingizda aylanishi tabiiy:

Biz baxtli boʻlamiz,

Xudo xohlasa.

Xudo xohlamasa

Uchrasharmidik.

Uchrashish, birinchi nigoh bu baxtli boʻlish uchun ishora ekanligini, siz sezmagan holda baxtli ekanligingizni his qilasiz.

Unchalik tashbih va istioralar koʻzga tashlanavermaydigan Muhammad Yusuf sheʼrlari sogʻingan onangizni, soʻlim qishlogʻingizni, birinchi yutuqlaringizni esga solish bilan birga kelajak haqida mushohada yuritishga undaydi.

Har kimning ham sochlariga oq tushsin,

Ajin tushsin, yuzlariga dogʻ tushsin.

Har kimning ham quvvat ketib belidan,

Qoʻllariga aso - bir tayoq tushsin.

Imoni sof, yuzga kirib yorugʻ yuz,

Toʻylar koʻrib yelkasidan togʻ tushsin.

Va jismiga soʻnggi safar oldidan

Oʻz bolasi qoʻlidan tuproq tushsin.

Bu qanday tilakki, baxtning oʻzginasi. Shoir sizga uzundan-uzoq tilak tilamayapti. Bor-yoʻgʻi inson dunyoda yorugʻ yuz bilan yashashi, farzandlar kamolini koʻrishni tilayapti. Oʻlim ham baxtdek goʻyo. Farzandlar qoʻlidan jismiga tuproq tushish baxti, yuzlariga ajin tushishi, qoʻliga bir asso-tayoq tushishi ham bir baxt ekanligini his qilasiz va siz shirin tashvishlar, orzular, shukronalar olamida qolasiz. Axir kuy avjida uzilayotgan torlar ozmi? Yashab boʻlmay ketayotgan umrlar ozmi? Keksalik ham bir baxt ekanligini sezasiz. Shoir sheʼrlari sizni ana shunday andishalar asosida tarbiyalaydi. Har bir satri boʻgʻzingizda turgan soʻzdek jaranglaydi.

Shoir oʻz sheʼrlarida Vatan, xalq taqdirini kuylar ekan, unga qoʻshilib goh tarix varaqlarini, goh kelajak sahifalarini, varaqlaysiz. Shuning uchun ham shoir sheʼrlarini ruhiyat manbai deb atagingiz keladi. U sizning ruhiyatingizni boyitadi. Hayotga teranroq boqa boshlaysiz. Yaqinlaringiz, onangiz, farzandlaringiz haqida, Vatan oldidagi farzandlik burchingiz haqida bir zum oʻyga tolasiz. Sizni lolaqizgʻaldoqday sehrlab turgan satrlarni qanday oʻqimasligingiz, ohanglarga quloq bermasligingiz mumkin! Muhammad Yusuf sheʼrlari ana shunday betakror va samimiy.

Baxt

Rayhon hidlarini yoʻllarga sepdi.

Atirgul isini tuymoqda yurak.

Sizga bir tabassum hadya etgan yor

Bugun bashariyatga aytmoqda "Tilak”.

Oʻsha siz qoʻmsagan, oʻsha siz sevgan

Kipriklari uzun kokillaridan,

Baytlaringiz oʻqir kutib har oqshom,

Nur tomib lablari sohillaridan.

Koʻngil gulshanida "lolaqizgʻaldoq”

Aylangan muhabbat, baxt timsoliga.

"Xavotir” neligin bilmaydi aslo,