ONA ZAMIN – RIZQ-ROʻZIMIZ MANBAI

Tumanimizda aholi bandligi va daromadlari oʻsishini taʼminlaydigan sohalardan biri – bu shubhasiz, qishloq xoʻjaligidir. Qadim-qadimdan ota-bobolarimiz ne bir mashaqqatlar evaziga tilsiz zamin bagʻridan rizqini undirib kelgan. Amu sohilida yastangan tumanimiz ekin maydonlari bugungi kunga kelib, qishloq xoʻjalik mahsulotlari bilan nainki aholini, balki, Respublikamiz bozorlari moʻl-koʻlligini ham taʼminlaydigan, totli mevalari, poliz mahsulotlari, sabzavotlari xorijga  ham eksport qilinadigan hududga aylandi.

Xoʻsh, joriy yilda tumanimiz fermerlari, dehqon xoʻjaliklari va tomorqa yer egalarining rejalari qanday? Bu savolimizga tuman Fermer, dehqon xoʻjaliklari va tomorqa yer egalari Kengashi raisi  Ilhom Polvonov shunday javob berdi:

– Oʻzbekiston Respublikasi Vazirlar Mahkamasining joriy yil 30-yanvarda qabul qilingan “Dehqon xoʻjaliklari va aholi tomorqalari yer uchastkalaridan yanada samarali foydalanish chora-tadbirlari toʻgʻrisida”gi 53-sonli Qarori, tuman hokimining shu xususidagi 2020-yil 7-fevral kungi qaroriga asosan 2020-yilda dehqon xoʻjaliklari va tomorqa yer uchastkalarida bahorgi, oʻrtagi (takroriy) qishloq xoʻjaligi ekinlarini joylashtirish koʻrsatkichlari hamda ekinlardan yetishtiriladigan qishloq  xoʻjaligi mahsulotlarining prognoz koʻrsatkichlari tasdiqlandi.

Tumanimizda jami 32570 nafar tomorqa yer egalarining 5217,3 gektar ekin maydonlari mavjud.

Bahor mavsumida 158 gektar yerga sabzi, 180,5 gektar yerga piyoz, 15,8 gektar yerga sarimsoq piyoz, 225,6 gektar yerga bodring, 169,2 gektar yerga koʻkatlar, 694,3 gektar yerga kartoshka, 477,3 gektar yerga poliz ekinlari, 631,8 gektar yerga pomidor ekinlarini ekish va moʻl hosil olish uchun qizgʻin harakat boshlanib ketdi. Shu yerlardan 69546,1 tonna hosil olinishi, olingan hosilning 59114,2 tonnasi ichki bozorlarda sotilishi rejalashtirilgan.

Takroriy ekinlar qishloq xoʻjalik mahsulotlari yetishtirishning muhim manbalaridan ekanligi hisobga olinib, takroriy ekin sifatida 71,1 gektar yerga sabzi, 95,9 gektar yerga bodring, 224,3 gektar yerga koʻkatlar, 318,3 gektar yerga kartoshka, 240 gektar yerga poliz ekinlari, 119,9 gektar yerga pomidor, 981,8 gektar yerga boshqa ekinlar ekilishi koʻzda tutilmoqda.

Ayni kunlarda tumanimiz boʻyicha 5,4 gektar yer maydonida 450 ta ixcham issiqxonalar tashkil qilinib, ertagi ekinlar koʻchatlari yetishtirilayapti. Bu koʻchatlar kunlar isishi bilan ochiq dalalarga koʻchirib oʻtqaziladi va moʻl hosil yetishtirish choralari koʻriladi.

Shuningdek, 2020-yil hosili  uchun oʻtgan yilning avgust-sentyabr oylarida aholi tomorqalarining 878 gektar yeriga piyoz, sarimsoq piyoz, 233 gektar yeriga esa kuzgi boshoqli don ekinlari ekilgan edi. Ushbu maydonlardagi ekinlarni parvarishlash ishlari olib borilayapti, sugʻorib, oziqlantirilib, moʻl hosil olish choralari koʻrilayapti.

Tumanda “Amudaryo tomorqa xizmat” masʼuliyati cheklangan jamiyati tomonidan tomorqa  yer egalarining ekin maydonlariga motokultivatorlar orqali va kimyoviy ishlov berish, shuningdek, mineral oʻgʻitlar, urugʻlar, mevali daraxtlar koʻchatlarini yetkazib berish yoʻlga qoʻyildi.

Koʻrilayotgan chora-tadbirlarning barchasi xalqimizning moʻl-koʻl va xavfsiz oziq-ovqat, qishloq xoʻjaligi mahsulotlari bilan taʼminlanishiga, dasturxoni toʻkin-sochin boʻlishiga qaratilgan.

Zamonaviy ilm-fan yutuqlari keng joriy etilayotgan mazkur sohada mamlakatimiz aholisining koʻpchilik qismi mashgʻul ekanligi eʼtiborga molik. Ha, ona zamin rizq-roʻzimiz manbai.