MENING OʻZ BOFIM BOR
Tabiat - aslida nima? Tabiat borligʻimiz, hayotimiz asosi hamda inson yashashi uchun muhim boʻlgan shart-sharoit. Uni faqat shu soʻzlar bilan cheklab boʻlmaydi. Chunki u har tomonlama mukammaldir. Tabiatda inson tasavvuriga sigʻmaydigan sir-sinoat koʻp, undagi moʻʼjizalarning chek-chegarasi yoʻq. U shunday jilvakor, maftunkor, nafis va shu bilan birga betakrordir. Binobarin, tabiatdagi barcha jonli va jonsiz narsalar bir-biri bilan uzviy bogʻliq. Jumladan, oʻsimliklar, hayvonlar, qushlar, hashoratlar hamda yer bilan osmon, shu qatori inson ham oʻzaro chambarchas bogʻliq. Agar tabiatdagi tirik mavjudotlar nafas olmasa, oziqlanmasa, harakatlanmasa, koʻpayish jarayonini amalga oshirmasa, ularning nobud boʻlishi muqarrar. Bu biologik jarayonlar uzluksiz amalga oshishi sababli tabiat mavjud va u muntazam oʻzgarib, yangilanib turadi.
Odam hayoti davomida tabiat neʼmatlaridan toʻgʻri foydalanishga intilib yashaydi.Chunki odam tabiat bolasi. Insonni tabiatsiz tasavvur etib boʻlmaydi. Tabiatdagi har bir unsur inson yashashi uchun muhim omil hisoblanadi. Hatto inson ham tabiat unsurlaridan yaralgan.
Hozirgi arxeologlarimizning bergan maʼlumotlariga koʻra, odamlar eramizdan avvalgi II-III asrlarda rivojlana boshlagan va hayot kechirgan. Bora-bora odam koʻp narsalarni, shu qatorda ekin ekish, hayvonlarni ovlash kabi ishlar bilan shugʻullana boshlagan. Tabiatda insonning yaratilishiga qoyil qolish mumkin. Chunki har bir narsa mukammal darajada yaratilgan. Insonning koʻrish, eshitish, gapirish kabi xususiyatlari baʼzi hayvonlarda bor, lekin inson ongining rivojlanishi uni yuksak pogʻonalarga koʻtargan. Nima boʻlishidan qatʼiy nazar tabiat insonning haqiqiy onasi.
Tabiatda fasllar, jilvalanishiga tasanno aytish kerak. Masalan, butun bir yilni olaylik. Uni inson umriga qiyoslash mumkin. Bahor - yoshlik, goʻzallik fasli. Yoz bu – yetilish davri, kuz - xazonrezgilik, inson umrining soʻlishiga oʻxshaydi. Qish - soʻngisi qarilik, yaʼni oʻlim. Bundan tashqari tabiatda yana turli goʻzalliklar mavjud. Quyosh botishi shunday chiroyli va ajoyib manzaraki, u qizaradi va yerning boshqa tarafiga oʻtib ketadi. Tongda gulga shudring tushishi betakror manzarani hosil qiladi. Muhimi, inson bu goʻzallikning qadriga yetishi, uni ardoqlashi lozim.
Atrofimizdagi bu goʻzal olamni qanday ardoqlaymiz? Biz uchun ana shunisi muhim. Tabiatni boyitish, mevali va manzarali daraxt koʻchatlarini ekib, parvarishlash, bogʻ-rogʻlarni koʻpaytirish-atmosfera azon qatlamini mustahkamlash ekologik toza hayot tarzini qaror toptirish degani. Tabiat bagʻridagi har bitta giyoh insonning sogʻlomligini taʼminlashga xizmat qiladi. Tabiat bizni kiyintiradi, toʻydiradi, uyimizni, hayotimizni bezaydi.
Men ham bogʻ tashkil qilishga, tabiat muhofazasiga hissa qoʻshishga qaror qildim. Menda bogʻ yaratishga intilish bolaligimdan, bobomning bogʻiga havas qilishimdan paydo boʻlgan. Uning bogʻi biram chiroyli ediki, bahorda oʻrik qiygʻos gullardi, yozda uzum pishib, olma, olcha uzardik. Sarhil mevalarni terib har xil sharbat va murabbolar qilardim. Men oʻz bogʻimga koʻchat ekdim va bu mehnatlarim besamar ketmadi. Oʻsha ekkan koʻchatlarim hozir hosilga kirgan. Men tabiat muhofazasiga biroz boʻlsa-da hissa qoʻshganimdan juda xursandman. Bu yil bogʻni yanada kengaytirishni rejalashtiryapman.
Xulosa qilib aytganda bu borliq, nabotot olamining siri, goʻzalligi, jilvasi hamma vaqt insonni oʻziga tortadi. Xuddi gulga oshufta boʻlgan bulbul misol. Chunki tabiat onamiz, biz uni asrashimiz himoya qilishimiz kerak!
Mohigul Erdasheva,
26-maktabning 8a-sinf oʻquvchisi, "Eng yaxshi insho" tanlovining "Tabiat va men" mavzusi boʻyicha gʻolib.
(Foto - http://www.eco.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
