TUMAN MAHALLA VA OILANI QOʻLLAB-QUVVATLASh BOʻLIMI BINOSINING OChILISh MAROSIMI BOʻLIB OʻTDI

Joriy yilning 3-oktyabr sanasida tuman Mahalla va oilani qoʻllab-quvvatlash boʻlimi binosining ochilish marosimi boʻlib oʻtdi.

Tadbirda Oʻzbekiston Respublikasi Mahalla va oilani qoʻllab-quvvatlash vaziri Rahmatjon Mamatov, Qoraqalpogʻiston Respublikasi Vazirlar Kengashi Raisi oʻrinbosari, Mahalla va oilani qoʻllab-quvvatlash vaziri Sagʻindiq Turmanov, birinchi oʻrinbosari Maryam Ahmedova, tuman hokimi Sultonboy Yoʻldashev, hokim oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev, boʻlim boshligʻining birinchi oʻrinbosari Muqaddas Beknazarova va boshqa masʼullar, korxona-tashkilotlar rahbarlari hamda ommaviy axborot vositalari ishtirok etdilar.

Ilgari tuman Fuqarolik holati dalolatnomalarini yozish boʻlimi faoliyat olib borgan mazkur binoning rekonstruktsiya ishlari mahalliy byudjet mablagʻlari hisobidan pudratchi tashkilot “Temir beton” MChJ tomonidan olib borilgan. Qurilish-taʼmirlash ishlariga jami 755 mln. soʻm mablagʻ sarflangan boʻlib, binoda barcha qulaylik hamda shart-sharoitlar yaratilgan, zamonaviy koʻrinishga keltirilgan.

Ochilish marosimida soʻzga chiqqanlar mamlakatimizda mahalla va oilani yanada qoʻllab-quvvatlash, xotin-qizlarning jamiyatdagi oʻrnini yanada mustahkamlash orqali aholining turmush farovonligini, insonlarning hayotdan rozi boʻlib yashashlarini taʼminlashga alohida eʼtibor qaratilib, koʻplab chora-tadbirlar amalga oshirilayotganligi xususida soʻz yuritdilar. Shuningdek, Prezidentimizning 18-fevral kungi “Jamiyatda ijtimoiy-maʼnaviy muhitni sogʻlomlashtirish, mahalla institutini yanada qoʻllab-quvvatlash hamda oila va xotin-qizlar bilan ishlash tizimini yangi darajaga olib chiqish chora-tadbirlari toʻgʻrisida”gi Farmoni bu boradagi vazifalarni amalga oshirishda muhim dasturulamal boʻlib xizmat qilayotganini qayd etdilar.

Mazkur Farmon bilan tashkil qilingan Oʻzbekiston Respublikasi Mahalla va oilani qoʻllab-quvvatlash vazirligi hamda uning Qoraqalpogʻiston Respublikasi, viloyatlar, Toshkent shahar va tuman boʻlinmalari tomonidan jamiyatda “Obod va xavfsiz mahalla” tamoyilining toʻlaqonli va samarali joriy etilishiga har tomonlama koʻmaklashish, oilalar va mahallalardagi ijtimoiy-maʼnaviy muhitni sogʻlomlashtirish, fuqarolarning oʻzini oʻzi boshqarish organlari bilan yaqin hamkorlikni oʻrnatish, oila institutini mustahkamlash, xotin-qizlarni qoʻllab-quvvatlashga doir davlat siyosatining samarali amalga oshirilishini taʼminlash borasida keng qamrovli ishlar olib borilmoqda.

Amudaryo tumani Mahalla va oilani qoʻllab-quvvatlash boʻlimi ham belgilangan vazifalarni amalga oshirishda samarali faoliyat yuritib kelmoqda. Boʻlim tomonidan tumandagi fuqarolarning oʻzini oʻzi boshqarish organlari faoliyatini, jamiyatdagi oʻrni va rolini kuchaytirish, aholi kundalik muammolari bilan ishlash, mahallalarda qonun ustuvorligini taʼminlash va huquqbuzarliklarning oldini olish boʻyicha amaliy ishlar qilinmoqda. Undan tashqari, yolgʻiz keksalar, ijtimoiy himoyaga muhtoj va kam taʼminlangan oilalarga moddiy koʻmaklashish, ijtimoiy qoʻllab-quvvatlash, yoshlar maʼnaviyatini yuksaltirish, ularda vatanparvarlik ruhini mustahkamlash, notinch va muammoli oilalarga manzilli koʻmaklashish, xotin-qizlarning muammolarini oʻz vaqtida aniqlash, ularning bandligini taʼminlash borasida har tomonlama manzilli ishlar tashkil etilmoqda.

Marosimda soʻzga chiqqanlar tuman Mahalla va oilani qoʻllab-quvvatlash boʻlimi masʼullarini yangi bino ochilishi bilan samimiy tabrikladilar va kelgusidagi ishlarida yangi zafarlar, yutuqlar, muvaffaqiyatlar tiladilar.

Charos Arslonova, tuman hokimligining Axborot xizmati rahbari.