QONUNChILIK PALATASI SPIKERI OʻRINBOSARI AKTAM HAITOV TUMANIMIZGA TAShRIF BUYuRDI

Davlatimiz rahbari Shavkat Mirziyoyev joriy yilning 2-oktyabr kuni Qoraqalpogʻiston Respublikasi Joʻqorgʻi Kengesining navbatdan tashqari sessiyasida ishtirok etish, hududdagi bunyodkorlik ishlari, yirik loyihalar bilan tanishish, hududni ijtimoiy-iqtisodiy jadal rivojlantirish maqsadida Nukus shahriga tashrif buyurgan edi.

Ushbu sessiyada koronavirus pandemiyasi butun dunyoda boʻlgani kabi yurtimizga ham yoʻqotishlar olib kelgani, lekin hayot davom etishi, shu sharoitga munosib boʻlib, toʻgʻri yoʻl topish zarurligini taʼkidlanib, Qoraqalpogʻistonda barcha sohalarni jadal rivojlantirish boʻyicha kelgusi 3-yilga moʻljallangan chora-tadbirlar ishlab chiqilganini maʼlum qilindi. Shunga koʻra, har bir tumanda 2 tadan faoliyat turi oʻziga xos “oʻsish nuqta”si etib belgilanib, respublikadagi 16 ta tumanni yanada ravnaq toptirish maqsadida har bir tuman va shaharni jadal rivojlantirishga kuchli turtki berish, muammolarni tezkor hal etish uchun ularga vazirlar va banklar biriktirildi.

Xususan, Amudaryo tumanini barcha sohalarda jadal rivojlantirish maqsadida hududga Oʻzbekiston Respublikasi Oliy Majlisi Qonunchilik palatasi spikeri oʻrinbosari, OʼzLiDeP fraktsiyasi rahbari, Oʻzbekiston Fermer, dehqon xoʻjaliklari va tomorqa yer egalari kengashi raisi Aktam Haitov masʼul etib tayinlandi.

6-oktyabr kuni Aktam Haitov tumanda ijtimoiy-iqtisodiy sohalardagi oʻzgarishlar, muammo va kamchiliklar bilan tanishish, ularning bartaraf qilinishini taʼminlash maqsadida tumanimizga tashrif buyurdi. Spiker oʻrinbosari dastlab tuman hokimligining majlislar zalida OʼzLiDeP tuman Kengashi faollari bilan uchrashdi. Uchrashuv chogʻida Aktam Haitov partiya dasturida belgilangan vazifalarning tumandagi ijrosi bilan tanishib, masʼullarga zaruriy tavsiya hamda yoʻl-yoʻriqlar berib oʻtdi. Shuningdek, OʼzLiDeP tuman Kengashida namunali faoliyat olib borayotgan, partiya faollarini sovgʻalar bilan ragʻbatlantirib, ularning kelgusidagi ishlariga muvaffaqiyatlar tiladi. 

Shundan soʻng, Aktam Haitov tumandagi “TAMARA-TEKSTIL” MChJda olib borilayotgan ishlar bilan tanishdi. Tadbirkorlik subʼektida ish unumini oshirish uchun yaratilayotgan shart-sharoitlar, keltirilgan zamonaviy texnologiyalar mehmonlarni mamnun qildi. Masʼullar tadbirkor hamda korxonada faoliyat yuritayotgan xodimlar bilan suhbatlashib, ularda qanday muammo hamda kamchiliklar mavjudligi bilan qiziqdi. Suhbat yakunida Aktam Haitov korxonaga yangi toʻquv dastgohi olib kelishda hamda ishlab chiqarilayotgan mahsulotlarni sotish uchun shahar markazida doʻkon ochishga amaliy yordam beradigan boʻldi.

Shu oʻrinda qayd etish joizki, davlatimiz rahbari Qoraqalpogʻistonga tashrifi chogʻida hududdagi tumanlar va mahallalarni jadal rivojlantirish, aholi bandligini taʼminlash va kambagʻallikni qisqartirish, yoshlar va ayollarni qoʻllab-quvvatlash, xizmat koʻrsatish sohasi salohiyatini toʻliq ishga solish kabi ustuvor yoʻnalishlar qatorida, ayniqsa, qishloq xoʻjaligini rivojlantirishga alohida eʼtibor qaratish zarurligini taʼkidlagan edi.

Prezidentimizning Qoraqalpogʻistonda qishloq xoʻjaligi sohasini jadal rivojlantirish borasida belgilab bergan vazifalar ijrosini taʼminlash maqsadida Aktam Haitov Ozod Qurbonboyev rahbarligidagi tuman “Tomorqa xizmat” MChJ klasteri faoliyati bilan ham tanishdi. Aytish kerakki, mamlakatimizda qishloq xoʻjaligi sohasida klaster usulining yoʻlga qoʻyilishi ekin turlarining koʻpayishiga, natijada hosildorlik ham, daromad ham oshishiga xizmat qilmoqda.

Aktam Haitov tumanda klaster tizimini jadal rivojlantirish uchun Oʻzbekiston Fermer, dehqon xoʻjaliklari va tomorqa yer egalari kengashining tadbirkorlikni qoʻllab-quvvatlash jamgʻarmasi hisobidan 5 mlrd. kredit mablagʻi ajratilishida amaliy yordam beradigan boʻldi.

Aktam Hayitov tashrif chogʻida kelgusi 3-yilga moʻljallangan oʻnta ustuvor yoʻnalishda koʻzda tutilgan tumanlar va mahallalarni jadal rivojlantirish, xizmat koʻrsatish sohasi salohiyatini toʻliq ishga solish, qishloq xoʻjaligini rivojlantirish, aholi bandligini taʼminlash va kambagʻallikni qisqartirish, ayniqsa, yoshlar va ayollarni qoʻllab-quvvatlash kabi masalalar boʻyicha tegishli chora-tadbirlar ishlab chiqilishi lozimligi haqida fikr va mulohazalar bildirib, bu borada masʼullarga tegishli tavsiyalar berdi. Shuningdek, aholini uy-joy bilan taʼminlash, ijtimoiy infratuzilmani rivojlantirishga eʼtibor qaratish keraligini alohida taʼkidladi.

Charos Arslonova, tuman hokimligining Axborot xizmati rahbari.