ZULFIYa NOMIDAGI DAVLAT MUKOFOTIGA NOMZODLARNI SARALASh BOʻYIChA TUMAN BOSQIChI OʻTKAZILDI

Zulfiya nomidagi Davlat mukofotining  taʼsis etilishi mamlakatimiz yoshlari hayotida muhim voqea boʻldi. Bu mukofot iqtidorli qizlarni kashf etish, ularni qoʻllab-quvvatlash, orzu-intilishlarini amalga oshirish va jamiyatda oʻz oʻrniga ega boʻlishini taʼminlashda oʻta muhim ahamiyat kasb etadi.
Bugungi kunda ushbu mukofot uchun oʻtkaziladigan tanlovni yanada takomillashtirish, mukofotni eng munosiblarga topshirish va qizlarimizning ham maʼnan, ham jismonan sogʻlom, barkamol boʻlib voyaga yetishini taʼminlash yoʻlida amalga oshirilayotgan islohotlar yildan-yilga takomillashib, sifat jihatidan  yangi bosqichga koʻtarilmoqda. Tumanimizda ham har yili anʼanaviy tarzda oʻtkaziladigan “Zulfiyaxonim qizlari” koʻrik-tanlovini ochiqlik va shaffoflik tamoyillariga muvofiq, mazkur tanlov Nizomi talablari asosida olib borilishiga alohida eʼtibor qaratilmoqda.

Tuman hokimligi, tuman Mahalla va oilani qoʻllab-quvvatlash boʻlimi, Yoshlar agentligi tuman boʻlimi hamda Xalq taʼlimi boʻlimi hamkorligida mazkur tanlovning ilk bosqichi umumtaʼlim maktablarida va hududlarda boʻlib oʻtdi.
Joriy yilning 30-oktyabr sanasida tuman Mahalla va oilani qoʻllab-quvvatlash boʻlimi binosida boʻlib oʻtgan ushbu tadbirda umumtaʼlim maktablarining oʻquvchi-yoshlari, mamlakatimizdagi turli oliy taʼlim muassasalarida taʼlim olayotgan tumanimiz yoshlari, jamoat ishlarida oʻz tashkilotchilik qobiliyatini namoyon etayotgan yoshlar hamda ularning ustozlari, ota-onalari ishtirok etishdi.
Shuni  alohida eʼtirof etish kerakki, Prezidentimiz tashabbusi bilan mazkur tanlov yangicha mezonlar orqali oʻtkazilmoqda. Bu borada Prezidentimizning 2018-yil 2-fevraldagi “Xotin-qizlarni qoʻllab-quvvatlash va oila institutini mustahkamlash sohasidagi  faoliyatini tubdan takomillashtirish chora-tadbirlari toʻgʻrisida”gi Farmoni dasturilamal boʻlib xizmat qilmoqda. Ushbu Farmonga koʻra, 2018-yildan eʼtiboran Zulfiya nomidagi Davlat mukofotini 14 yoshga toʻlgan va 30 yoshdan oshmagan iqtidorli qizlarga berish boʻyicha yangi tartib joriy  etildi va 2018-yildan Qoraqalpogʻiston Respublikasi, viloyatlar va Toshkent shahridan ikki nafardan iqtidorli qizga ushbu mukofot taqdim etila boshladi.
“Zulfiyaxonim qizlari” koʻrik-tanlovining tuman bosqichi tadbirini tuman Mahalla va oilani qoʻllab-quvvatlash boʻlimi boshligʻining birinchi oʻrinbosari Muqaddas Beknazarova ochdi va barchani, shu jumladan tanlov ishtirokchilari boʻlgan qizlarni tanlovni oʻtkazish shartlari, yoʻl-yoʻriqlari hamda tanlov Nizomi talablari bilan tanishtirdi hamda ishtirokchi qizlarga muvaffaqiyat tiladi.

Bu boradagi Prezident Farmoni ijrosini taʼminlash, ayolni muqaddas bilish, unga alohida ehtirom koʻrsatish, ozod va obod yurtimiz kelajagi boʻlgan, har tomonlama yetuk yoshlarni tarbiyalashdagi beqiyos oʻrnini yana bir bor eʼtirof etish, barkamol, oqila, maʼnan kuchli ayol-qizlar avlodini voyaga yetkazish hamda yoshlarning fan, adabiyot, taʼlim sanʼat va madaniyatni, sport hamda jamoatchilik faoliyatini rivojlantirishdagi yutuqlarini ragʻbatlantirishga qaratilgan tanlovning tuman bosqichi bu yil ham hayajonli taassurotlarga boy boʻldi. Yoshlarning milliy istiqlol gʻoyalari va madaniy-maʼnaviy qadriyatlarga eʼtiqodining yuksalishi yoʻlidagi ibratli hamda keng koʻlamli islohotlarni jadallashtirishdagi faol ishtirokini oʻzida aks ettirgan koʻrgazma namoyishi tadbir ishtirokchilarida katta taassurotlar qoldirdi. Xususan, isteʼdodli va iqtidorli qizlarning hunarmandchilik, rassomlik va dizayn yoʻnalishlaridagi  ijod namunalari ishtirokchilarda tumanimizda yetuk ijodkor-hunarmand yoshlar shakllanayotganidan faxrlanish hissini uygʻotdi.

Tanlovning tuman bosqichida umumtaʼlim maktablari, oʻquv muassasalari hamda jamoatchilik vakillaridan 14 yoshdan 30 yoshgacha boʻlgan 70 nafar iqtidorli qizlar ishtirok etishdi. Tanlovining  tuman bosqichi gʻoliblari belgilangan yoʻnalishlar boʻyicha Nizom talablariga asosan yopiq ovoz berish orqali  aniqlanadi.
Shu kunning oʻzida tanlov komissiyasi aʼzolari tomonidan ishtirokchi qizlarning hujjatlari va erishgan yutuqlari aniqlik hamda shaffoflik tamoyiliga koʻra oʻrganib chiqildi va baholandi.
Ijod namunalari va hujjatlari  Zulfiya nomidagi Davlat mukofoti boʻyicha  Nizom talablariga munosib nomzodlarga mazkur tanlovning Qoraqalpogʻiston Respublikasi bosqichiga yoʻllanma berildi.

Robiya YOʻLDOShEVA.