AMU ELNING OʻZ QIZIGA AYLANGAN ZULXUMOR

Shifo ahli uchun hech qayerda yozilmagan bir qoida bor: kun-u tunning qaysi mahalida boʻlishidan qatʼiy nazar, bemordan chaqiruv boʻldimi, sumkasini yelkalab tezda yoʻlga shaylanadi. Oʻz burchini sadoqat bilan bajarishga kirishadi. Kasbiy faoliyatiga, Gippokrat qasamiga sodiqlik tuygʻusi shifokorni har lahzada safarbar holatda yashashga undayveradi.
Ularning fidoyiliklari, elim, yurtim, deb intilishlarini his etmoq uchun faqatgina bir kecha – tong otguncha bir bemor holatini kuzatmoq kifoya. Zero, shifo ahli butun hayoti, bilim va tajribasi, kuch-gʻayratini ana shunday beorom faoliyatga baxsh etib yashaydilar.
Zulxumor Mamatqulova ana shunday yuzlab, minglab fidoyilardan biri. Asli Qashqadaryolik Zulxumor Mamatqulova oʻz kasbiy foaoliyati, fidoyiligi, tashkilotchiligi va nihoyatda kirishimliligi bilan amudaryoliklarning aziz farzandiga aylandi. Gastroenterolog-shifokor sifatida yuzlab insonlarning dardiga darmon boʻldi. Tibbiyot birlashmasining zamonaviy talablarga javob beradigan, yaxshi jihozlangan fizioterapiya boʻlimi tashkil etilishida yelib-yugurdi, boʻlimni namunali tibbiy muolaja maskaniga aylantirdi. Fizioterapiya boʻlimi rahbari sifatida boʻlim uchun ajratilgan xonalarni taʼmirlash, davolanuvchilar uchun zarur shart-sharoitlar yaratish ishlariga bosh-qosh boʻldi.
Tashabbuskor shifokor tibbiyot sohasida xususiy sektorni rivojlantirishga hissa  qoʻshish maqsadida 2017-yilda «Mohidil shifo med» masʼuliyati cheklangan jamiyat shaklidagi xususiy klinikani tashkil etdi. Oʻzbekiston Respublikasi Sogʻliqni saqlash vazirligi tomonidan tibbiy faoliyatni amalga oshirish uchun maxsus litsenziya olgan 2017-yilning 8-sentyabr sanasi Zulxumor Mamatqulovaning hayotidagi eng quvonchli kun boʻlib qoldi.
Ayni kunda aholiga UZI tekshiruvi, EXO kardiografiya, EKG, laboratoriya tekshiruvlari, kompyuter yordamida umurtqa pogʻonasini choʻzish, uqalash, parafin, yurak-qon tomir, asab kasalliklari, oshqozon-ichak, buyrak, qandli diabet, nafas yoʻllari kabi kasalliklarni davolash boʻyicha xizmat koʻrsatishga ixtisoslashgan mazkur klinikada bemorlar uchun barcha sharoitlar yaratilgan.
«Mohidil Shifo med» xususiy klinikasi shahar markazida, tumanimizning barcha ovul va mahallalaridan avtotransport vositalari serqatnov hududda joylashgani, zamonaviy infratuzilmaga  egaligi aholiga manzur. Bundan ham muhimi, 20-oʻringa moʻljallangan mazkur shifo maskanida 6 nafar yuqori malakaga ega mutaxassis shifokorlar, 6 nafar oʻrta va 4 nafar kichik tibbiy xodimlar tun-u kun xalqimiz xizmatida. Aholiga yanada yaxshi qulayliklar yaratish maqsadida klinikaga oʻz mablagʻlari hisobidan yuqori aniqlikdagi «LOGIC» UZI apparati olib kelib oʻrnatildi va 4 ta yangi ish oʻrin yaratildi.
Izlanuvchan, tinib-tinchimas Zulxumor Mamatqulova tibbiyot sohasiga oid yangiliklar va zamonaviy muolaja usullarini oʻzlashtirib borish bilan birga amaliyotga joriy etish borasida ham samarali faoliyat olib bormoqda. Klinika rahbari hamda malakali shifokor sifatida u ozoonterapiya muolaja usulini qunt bilan oʻrgandi, tinmay malakasini oshirdi. Natijada klinikada ozoonterapiya muolaja usulini yoʻlga qoʻydi.
Ozon – bakteriya, virus va zamburugʻlarni nobud qiladi, hatto organizmning tiklovchi jarayonlarini tezlashtirib, toʻqimalarda kislorod yetishmovchiligini bartaraf etadi. Ozonli muolaja, ayniqsa, hozirgi pandemiya sharoitida bemorga juda muhim. Shifokorlarning fikricha, doimiy ravishda ozonli muolaja olib turgan kishi sogʻlomlashib, yasharib ketadi, faqat qatʼiy muolaja tartibiga amal qilish kerak.
Klinikada 2020-yil boshidan beri 13 ming 562 nafar bemorga sifatli tibbiy xizmat koʻrsatilib, shundan 200 nafardan ziyod bemor ambulator, 545 nafari esa statsionar sharoitda davolanib, oilalari bagʻriga qaytishdi.
Shifo maskanida davolangan, oʻz dardlariga shifo topgan insonlar, garchi sogʻayib ketishsalar-da, bu yerga, Zulxumor Mamatqulova bilan uchrashish, zarur tavsiyalar olish uchun tez-tez kelib turishadi. Ularning minnatdor nigohlaridan oʻzlariga hayot goʻzalliklaridan bahra olish, sogʻlomlik baxsh etgan najotkor shifokoriga nisbatan mehr va samimiyat tuygʻularini ilgʻab olish qiyin emas. «Mohidil shifo med»  klinikasi  ana shunday mehr va samimiyat nurlaridan hamisha charogʻon va gavjum.
Klinika rahbari, oliy toifali gastroenterolog-shifokor Zulxumor Mamatqulovaning har bir ish kuni ana shunday minnatdor koʻngillar gavjumligida, xalq salomatligini muhofaza qilishdek ezgu maqsadlar bilan oʻtaveradi. Fidoyi mehnat va xalq mehri bilan sayqallangan kasbiy faoliyati esa Zulxumor Mamatqulovaning umr mazmuniga aylangan. Zero, Amu elining oʻz qizi kabi aziz Zulxumorxon uchun xalq sogʻligidan ham ulugʻroq neʼmat va baxt yoʻq.

Robiya YOʻLDOShEVA.