SIYoSIY PARTIYaLARNING YIGʻILIShLARIDA OʻTGAN DAVRDAGI VAZIFALAR IJROSI TAHLIL QILINDI

Tuman hokimligining majlislar zalida Oʻzbekiston “Adolat” sotsial-demokratik partiyasi tuman Kengashining navbatdagi III Plenumi boʻlib oʻtdi.

9-noyabr kuni boʻlib oʻtgan Plenumda Oʻzbekiston “Adolat”sotsial demokratik partiyasi tuman Kengashi raisi, kengash aʼzolari, partiya deputatlari va faollari ishtirok etdilar. Plenum yigʻilishida “Oʻzbekiston “Adolat” sotsial-demokratik partiyasi Amudaryo tuman Kengashi faoliyatining 2020-yil 3-chorak yakunlari va 2020-yil 4-chorakka moʻljallangan ustuvor vazifalari toʻgʻrisida”gi masala koʻrib chiqildi.

Plenumda partiyaning Qoraqalpogʻiston Respublikasi Kengashi tomonidan joriy yilning shu davriga qadar 2020-2024-yillarga moʻljallangan saylovoldi dasturida belgilangan vazifalarni amalga oshirish boʻyicha ishlab chiqilgan yoʻl xaritasiga muvofiq faoliyat olib borganligi toʻgʻrisida soʻz yuritildi. Oʻtgan davr mobaynida mafkuraviy va dasturiy vazifalarni amalga oshirishga qaratilgan 10 ga yaqin partiya loyihalarini hayotga tatbiq etish choralari koʻrilganligi toʻgʻrisida maʼlumot berildi.

Jumladan, “Muammo bilan yuzma-yuz” loyihasi doirasida barcha darajadagi deputatlik korpuslari va partiya faollari har haftaning chorshanba kunlari muntazam ravishda mahallalarda xalq bilan yuzma-yuz muloqotlar oʻtkazganligi aytib oʻtildi. Tumanimizdagi jami 23 ta mahallalarda shunday muloqotlar tashkil qilinganligi, mahallalardagi 167 ta xonadon va 17 ta xoʻjalik yurituvchi subʼektga tashrif buyurilib, ularni qiynayotgan muammo va kamchiliklar oʻrganilganligi qayd etildi. Oʻrganish jarayonlarida aholi tomonidan 9 ta murojaatlar kelib tushgan boʻlib, ular yuzasidan 5 ta deputatlik soʻrovlari yuborilgan hamda 4 tasi ijobiy yechimini topgan, 3 ta murojaatga huquqiy maslahatlar berilganligi taʼkidlandi.

Aytish joizki, partiyaning “Adolat” siyosiy-huquqiy oʻquvlari kuni” loyihasi doirasida har haftaning seshanba kunlari har bir mahallada aholini keng jalb qilgan holda siyosiy-huquqiy oʻquvlar tashkil etilgan. Partiyaning “Bir oyda bir ish oʻrni” loyihasi doirasida 7 nafar fuqarolar ish bilan taʼminlangan, shundan 2 nafarini yoshlar, 2 nafarini ayollar tashkil etadi. Vaqtincha daromadsiz qolgan, ehtiyojmand oilalarni qoʻllab-quvvatlash maqsadida “Saxovat va koʻmak” umumxalq harakati boʻyicha kam taʼminlangan va boquvchisini yoʻqotgan 28 ta oilalarga  partiya deputatlari va partiya faollari tomonidan zaruriy oziq-ovqat va maktab oʻquvchilariga bepul himoya niqoblari yetkazib berildi.

Kelgusida ham partiya deputatlari va faollari aholi bilan muloqotini yanada jadallashtirish, joylarda hududlarning ijtimoiy-iqtisodiy rivojlanishi, sogʻliqni saqlash, taʼlim sohalaridagi islohotlarga toʻsiq boʻlib kelayotgan muammolarni oʻrganib, ularning yechimini topishga hissa qoʻshishni maqsad qilgan.

Shuningdek, 10-noyabr kuni tuman hokimligida Oʻzbekiston “Milliy tiklanish” demokratik partiyasi Qoraqalpogʻiston Respublikasi hamda Amudaryo tuman Kengashlarining davlatimiz rahbari tomonidan xotin-qizlar va yoshlarning jamiyatdagi oʻrnini mustahkamlash borasida belgilangan vazifalar ijrosini taʼminlash mavzusidagi davra suhbati oʻtkazildi. Davra suhbatida partiyaning Qoraqalpogʻiston Respublikasi hamda tuman Kengashi faollari, deputatlar, koʻngilli ziyolilarning “Xizmat-beminnat”  loyihasi doirasida taʼlim olib, talabalik baxtiga erishgan yoshlar hamda ularning ustozlari, tumandagi “Ayollar daftari” va “Yoshlar daftari”ga kiritilgan aholi vakillari ishtirok etdilar.

Davlatimiz rahbari bugun xotin-qizlar va yoshlarni har tomonlama qoʻllab-quvvatlash, ularning jamiyatdagi oʻrnini mustahkamlash, orzu-istaklarini roʻyobga chiqarishga yordam berishga alohida eʼtibor qaratmoqdalar. Joriy yilning 8-oktyabr sanasida boʻlib oʻtgan videoselektor yigʻilishi ham aynan shu masalaga bagʻishlanib, bu borada amalga oshirish lozim boʻlgan vazifalar belgilab berilgan edi.

Davra suhbati davomida tumanda “Yoshlar daftari” va "Ayollar daftari”ini shakllantirshda qaysi koʻrsatkichlariga eʼtibor qaratilganligi, soʻrovnomalar tashkil qilish hamda oʻz mehnati, irodasi bilan katta yutuqlarga erishgan mashhur shaxslar bilan uchrashuvlar tashkil etib, yoshlar va xotin-qizlarga kuchli motivatsiya berishni yoʻlga qoʻyish orqali kasbga yoʻnaltirish lozimligi qayd etildi.

Shuningdek, suhbat mobaynida har bir inson hayotda oʻz oʻrnini topishi uchun, eng avvalo, oʻzi masʼul ekanligi, buning uchun oʻz oldiga ulkan maqsadlarni qoʻyib, ularga erishish uchun katta sabr-matonat hamda mehnat bilan tinimsiz harakat qilishi lozimligi taʼkidlandi.

Yigʻilish davomida koʻngilli ziyolilarning “Xizmat-beminnat” loyihasi asosida taʼlim berayotgan oʻqituvchilarga partiyaning Qoraqalpogʻiston Respublikasi Kengashi tomonidan tashakkurnoma hamda esdalik sovgʻalari topshirildi.

Charos Arslonova.