Gazeta – hayotim boʻlagi

Oliygohni tugatganimdan keyingi ilk ish faoliyatimni men uchun aziz dargoh - "Amudaryo haqiqati” gazetasi tahririyatidan boshladim. Oliygohda oʻqish davomida olgan bilimlarimni bu dargohdagi ustozlarim Allambergan aka Jumaniyozov, Xonimjon opa Rajabova, Saʼdulla aka Xoʻjaniyozov, Robiya opa Yoʻldosheva, Oygul opa Rajabovalardan tajriba oʻrganib, yanada boyitishga, ularga munosib shogird boʻlishga harakat qildim. Vaholanki, ustozlarimning har biri oʻziga xos ish uslubi, yetuk tajriba, mahorat maktabiga ega iqtidorli, el oldida oʻz nomi bilan tanilgan jurnalistlar edi. Shu oʻrinda taʼkidlashim joizki, Allambergan aka Jumaniyozovdan tashabbuskorlik, Xonimjon opa Rajabovadan kuzatuvchanlik, dadillik, Saʼdulla aka Xoʻjaniyozovdan talabchanlik, mulohazakorlik, Robiya opa Yoʻldoshevadan joʻshqinlik, samimiylik, Oygul opa Rajabovadan esa vazminlik, intiluvchanlik kabi xislatlarni, eng muhimi, ularning har biridan fidoyilikni oʻrgandim.

Tahririyatda ish boshlagan yillarim gazeta hayotida oʻziga xos davr boʻldi. Chunki shu yillarda bu yerdagi jurnalistlar tashabbusi bilan gazeta chop etishning eski bosma usulidan yangi texnologiyalar asosida, yaʼni kompyuterda sahifalashga oʻtila boshlagandi. Dastlab gazetaning bayram sonlari, keyinchalik Allambergan aka Jumaniyozov tashabbusi hamda jurnalistlar jamoasining ijodiy qoʻllab-quvvatlashi bilan "Yulduz" hissadorlik jamiyati muassisligida tashkil etilgan "Hamroz” gazetasi ham kompyuter yordamida tayyorlandi. U paytlarda tahririyatda kompyuter boʻlmaganligi sababli markazga, Nukus shahridagi "Nukus poligrafkombinati” MChJga borib ishlashga toʻgʻri kelardi. Bu oʻz oʻrnida ancha mashaqqat, qiyinchilik tugʻdirsa ham biz jurnalistlar gazetani sifatli tayyorlab, obunachilarga oʻz vaqtida yetkazib berishga harakat qilardik. Zero, har bir sonni tayyorlash jurnalistlardan juda katta matonat, mehnat talab qilar edi. Albatta, gazetani yillar davomida muxlislar nazaridan qoldirmaslikka harakat qilish ham oz mehnat evaziga kelmaydi.

"Amudaryo haqiqati”ning "Taraqqiyot koʻzgusi”ga aylanishi, uning shu kunga qadar yetib kelishida tumanimizdagi har bir jurnalistning mashaqqatli mehnati, sabr-u bardoshi, matonati, hissasi bor. Oʻz oʻrnida men ham mana shunday sharafli ishda jurnalist sifatida ishtirok etganligimdan faxrlanaman.

Tahririyatda men ilk ish faoliyatimni boshladim va oʻziga xos hayot tarzini – xalq uchun, Vatan uchun, jamiyat uchun fidokor boʻlishni oʻrgandim hamda oʻz yoʻlimni topdim. Shu bois, tahririyatni, gazetani hayotimning bir boʻlagi deb bilaman va qadrlayman.

Ozoda Xudoyberganova,

jurnalist.