OILAVIY VA ShAXSIY NAMUNA

Mangʻit shahrining "Durunki” mahallasida yashovchi Amangul Qayupovaning bizning elimizga kelin boʻlib tushganiga 33-yil toʻlmoqda. U asli qoraqalpoq qizi boʻlib, Respublikamizning Qonlikoʻl tumanidagi Qulamet jirov ovulida tugʻilib oʻsdi. 8 yillik maktabni tamomlagach, Xoʻjayli shahridagi pedagogika bilim yurtida tahsil olib, boshlangʻich taʼlim oʻqituvchisi mutaxassisligini egalladi. Uning keyingi hayoti Mangʻit shahri bilan bogʻlanib ketdi. Pedagogik faoliyati esa shahardagi 36-sonli maktab jamoasida boshlandi. Pedagogik faoliyatining dastlabki yillarida taniqli pedagog, Oʻzbekiston xalq taʼlimi aʼlochisi, Qoraqalpogʻiston Respublikasida xizmat koʻrsatgan oʻqituvchi, rahmatlik Oymon opa Bobojonova yosh oʻqituvchiga oʻzining boy tajribalarini, boshlangʻich sinf oʻquvchilarini oʻqitish uslublarini sira erinmasdan oʻrgatib bordi. Natijada yosh oʻqituvchi Amangul Qayupova qisqa fursatda yetakchi oʻqituvchilar safidan joy oldi.

– Ustozim Oymon opa Bobojonova menga onam kabi mehribonlik qildi, bilim va tajribalarini saxiylik bilan oʻrgatdi. Bu qalbi daryo, bagʻrikeng, fidoyi insonning shogirdlari juda koʻp edi. Men shularning biri boʻlganimdan faxrlanaman va ustozimdan bir umr minnatdorman, -deydi Amangul Qayupova toʻlqinlanib.

Amangul Qayupova oilaviy jihatdan ham baxtli inson boʻlib, uning Matyoqubovlar oilasiga qoʻygan qadami qutlugʻ boʻldi. Shu bois, mana 33-yildirki, turmush oʻrtogʻi Koʻklan Matyoqubov bilan ahil-inoq hayot kechirib kelmoqda. Hakimboy, Hamida, Hamro va Xolida kabi solih farzandlarni kamolga yetkazishdi. Oʻgʻilqizlari kasb-hunarli. Oʻgʻillari ota kasbini tutib, elektr-gaz payvandlovchi boʻlib yetishishdi.

– 5 nafar nevaram bor. Danagidan magʻzi shirin, deganlari rost ekan. Nevaralar bilan oilamiz obod. Oʻgʻillarim Hakimboy, Hamro kasbimni yerda qoldirmay, davom ettirishmoqda. Men bundan juda xursandman, deydi oila sardori Koʻklan Matyoqubov biz bilan suhbatda.

Ha, "Durunki” mahalla fuqarolar yigʻinining diniy maʼrifat va maʼnaviy-axloqiy tarbiya masalalari boʻyicha maslahatchisi Gavhar Mingboyevaning Matyoqubovlar oilasini namunali, tinch-totuv va ahil oila deganicha bor ekan. Men ham mazkur oila davrasida boʻlib, bunga amin boʻldim.

Amangul Qayupova maktabda oʻqituvchilik davrida jamoat ishlarida, turli tadbirlarda va koʻrik-tanlovlarda faol qatnashdi. U yetakchi pedagog-oʻqituvchi va faol jamoatchi boʻlgani uchun 2001-yilda mustaqilligimizning 10 yilligi koʻkrak nishoni bilan taqdirlangan. Bu koʻkrak nishoni oʻsha yili birinchi marta taʼsis etilgan edi.

Amangul Qayupova mahalla hayotida ham faol qatnashib kelmoqda. U mahalla fuqarolar yigʻinidagi "Yarashtirish komissiyasi” aʼzosi, mahalla ayol-qizlar boshlangʻich tashkiloti yetakchisi boʻlib faoliyat koʻrsatmoqda. U mahalla faollari bilan birgalikda oilalarda maʼnaviy-axloqiy sogʻlom muhitni va sogʻlom turmush tarzini qaror toptirish, yosh oilalarning tinchtotuv va ahilligiga erishish, farzand tarbiyasiga eʼtiborni kuchay-tirish, erta nikohlarning oldini olish kabi jamiyat uchun foydali ishlarda jonbozlik koʻrsatmoqda. Bu ishlari bilan Amangul Qayupova jamiyatda maʼnaviy muhit barqarorligiga, mahallada tinchlik-totuvlikni taʼminlashga hissa qoʻshmoqda.

Qobul ShOMURODOV,

gazetaning jamoatchi muxbiri.