BUGUNGI OʻZBEK AYoLI HAR JIHATDAN FAOL

Oʻzbekistonda xotin-qizlarga boʻlgan munosabat, ularning huquqlari va erkinliklarini himoya qilish davlat siyosati darajasiga koʻtarilgan. Prezidentimiz I.Karimov oʻzining turli chiqishlarida bu masalaga doimiy ravishda eʼtibor qaratib kelmoqda.

1998-yil 5-dekabrda Konstitutsiya qabul qilinganligining olti yilligi munosabati bilan oʻtkazilgan tantanali majlisda soʻzlagan nutqida 1999-yilni "Ayollar yili” deb eʼlon qilar ekan, Yurtboshimiz shunday degan edilar:

-"Insoniyat tarixi guvohlik beradiki, ming yillar jarayonida har jamiyatning madaniy va maʼnaviy hayoti ularning ayollarga boʻlgan munosabati bilan belgilangan. Bizga bu qadriyat yanada qimmatlidir, chunki biz ayollarga sharqona hurmat bilan munosabatda boʻlamiz”.

Mamlakatimizda ayollar huquqlarini himoya qilishga qaratilgan qonunchilik tizimi shakllangan.

Konstitutsiyamizning 18-moddasiga koʻra, "Oʻzbekiston Respublikasida barcha fuqarolar bir xil huquq va erkinliklarga ega boʻlib, jinsi, irqi, millati, tili, dini, ijtimoiy kelib chiqishi, eʼtiqodi, shaxsi va ijtimoiy mavqeidan qatʼiy nazar, qonun oldida tengdirlar. Imtiyozlar faqat qonun bilan belgilab qoʻyiladi hamda ijtimoiy adolat tamoyillariga mos boʻlishi shart”. 46-moddada esa yanada aniq va ravshan qilib: "Xotin-qizlar va erkaklar teng huquqlidir”,-deb gender tengligi tamoyili mustahkamlab qoʻyilgan.

Jamiyatda ayollarning ijtimoiy faolligini oshirish maqsadida turli xil ijtimoiy-huquqiy va jamoat tuzilmalari tashkil etilgan. Xususan, "Huquqiy taʼlim markazlari”, "Ayollar markazlari”, "Salomatlik markazlari” kabi ijtimoiy tuzilmalar ayollarning jamiyatda oʻz oʻrnini topishlarida muhim ahamiyat kasb etmoqda.

Men har tong farzandlarimni oʻqishga, umr yoʻldoshimni yumushga kuzatib, ular qatori shodon kayfiyatda oʻzim mehnat qiladigan 55-sonli maktab tomon yoʻl olaman. Kun boʻyi sevimli kasbimda faoliyat yuritib, ishdan soʻng oilam bagʻriga xush kayfiyatda qaytaman. Qanday yaxshi zamonlar-a, deyman quvonib. Umr yoʻldoshim bilan bab-baravar huquq va imkoniyatlarim bor. Ishlash, jamoatga faol aralashish – ayol kishiga qanchalik huzur bagʻishlashini bilsangiz edi!

Axir dunyoning turli burchaklarida menga oʻxshagan ayollarning koʻpchiligi toʻrt devor ichida, hayot goʻzalliklaridan mosuvo, hijobga burkanib yashashyapti-ku! Biz oʻzbek ayollari esa oila tashvishlariga oʻralib qolayotganimiz yoʻq. Oʻz fikrimizni emin-erkin ifoda etib, boʻsh vaqtimizni oilamiz bagʻrida koʻngilli oʻtkazamiz. Salomatligimizni mustahkamlash uchun sihatgohlarda dam olib, yana mehnat bagʻriga qaytamiz, oʻzimiz qiziqqan tadbirkorlik turlari bilan shugʻullanamiz. Bunday shart-sharoit va imkoniyatlarning barchasi Bosh Qomusimiz orqali kafolatlangan.

Xulosa qilib aytganda, mamlakat ishlab chiqarishining barcha sohalarida, hatto mamlakatni boshqaruv organlarida, iqtisod va siyosatda, ilm-fanda ayollarning tutgan oʻrni beqiyos kattadir. Bugungi oʻzbek ayoli har jihatdan yetuk shakllangan faol shaxsga aylangan.

Zuhra Ahmedova,

55-sonli maktabning kutubxona mudirasi.