ИҚТИДОРЛИ БОЛАЛАР МАСКАНИДА

Aйни кунда мамлакатимизда ёшларимизга таълим-тарбия бериш билан биргаликда касб-ҳунар ўргатиш, уларни ўн бармоғи ҳунарли инсонларга айлантириш, эртанги ҳаётга баркамол инсон сифатида кириб боришларига пухта замин яратиш мақсадида бир қанча ишлар амалга оширилаяпти.

Туманимизда фаолият юритаётган “Баркамол авлод” болалар марказида ҳам ёшлар иқтидорини шакллантириш, уларнинг турли ҳунарларга ва касбларга бўлган қизиқишларини ошириш борасида кўламли ишлар амалга оширилаяпти. Биз айни кунда ушбу муассасада у ёки бу ҳунарга қизиқишлари кучли бўлган юзлаб иқтидорли болаларни учратишимиз мумкин. Уларнинг ёниқ кўзларида янгиликларга, бунёдкорликка бўлган иштиёқни кўриб, кўзимиз қувонади, албатта.

Бугунги кунда мингдан ортиқ болани ўз бағрига олган ушбу масканда 47 та тўгарак фаолият кўрсатаяпти.

Тўгараклар иши уч хил йўналишда шакллантирилган бўлиб, улар бадиий ижодиёт, техник ижодиёт, ўлкашунослик ва экология йўналишларидан иборат.

Бу масканда иқтидорли болаларнинг истеъдодларини шакллантиришда муҳим аҳамиятга эга бўлаётган бир неча тўгараклар фаолияти билан танишганимизда уларда олиб борилаётган машғулотлар бизни ҳақиқатан ҳам қойил қолдирди.

Шокир Худойберганов раҳбарлигидаги “Шўх болалар” тўгарагида бугунги кунда 10 нафардан ортиқ бўлажак хонандалар мусиқа ва хонандалик сирларини ўрганишмоқда. “Шўх болалар” жамоаси ҳар йили туманимизда ўтказилаётган байрам тадбирларида фаол иштирок этиб келишади. Улар ҳар бир байрам тадбири учун янги қўшиқлар тайёрлашга ҳаракат қилишади. “Ўзбекистон”, “Бизлар – баркамол авлод” ва “Ҳунар ўрган” қўшиқлари улар томонидан доимо севиб ижро этиладиган қўшиқлардан ҳисобланади.

Биз ташриф буюрган яна бир тўгарак – инглиз тили тўгараги ҳам ўқувчиларнинг энг севимли тўгаракларидан бири экан. Бу ерда биз кичкина болаларнинг инглиз тилини катта қизиқиш, зўр иштиёқ билан ўрганаётганларига гувоҳ бўлдик. Мазкур тўгарак аъзоларининг инглиз тилини зўр ихлос билан ўрганишларининг боиси, тўгарак раҳбари Маҳфуза Ибрагимованинг болаларга бу тилни ўргатишда илғор усуллардан фойдаланган ҳолда машғулот ўтказиши муҳим омил бўлаётган экан.

Биз тўгарак иштирокчилари томонидан инглиз тилида ижро этилган шеър ва қўшиқларни тинглаб, уларнинг устози, ёш ўқитувчи Маҳфуза Ибрагимованинг тўгарак ишларини ташкил этишдаги қобилиятига, ғайрату шижоатига қойил қолдик.

Гуласал Алламбергенова раҳбарлигидаги тўқувчилик тўгараги ҳам намунали тўгараклардан ҳисобланар экан. Бу тўгарак эшигини очишимиз биланоқ, биз ранг-баранг иплар билан тўқув ишларини амалга ошираётган қизлар даврасига қўшилдик. Тўқув дастгоҳларини моҳирлик билан ҳаракатга келтириб, ихлос билан ишлаётган қизларнинг бири-биридан чиройли нарсаларни тўқишаётгани бизнинг ҳавасимизни келтирди.

– Мен 31-сонли мактабнинг 10-синф ўқувчиси Гулноза Жуманиёзова бўламан, – дея таништирди ўзини тўгарак аъзоларидан бири. – Мен бу ерга тўрт йилдан буён қатнаб, тўқувчилик сирларини ўрганаяпман. Тўқувчилик бўйича анча тажрибага эга бўлдим. Ҳозир кўпгина нарсаларни ўзим мустақил равишда тўқий оламан. Устозим Гуласал опадан чексиз миннатдорман.

Биз бу тўгарак фаолияти билан танишиб бўлганимиздан кейин болалар марказининг “Бошланғич техник моделлаштириш” тўгарагига ташриф буюрдик. Тўгарак фаолияти билан танишганимизда ўқувчилар томонидан яратилган самолётлар, миноралар, ракеталар, уйлар, тракторлар ва турли ҳайвонлар макетларини кўриб, уларнинг иқтидорларига қойил қолдик.

Ушбу тўгарак аъзоси Бекпошша Абдуллаева “Камалак юлдузлари” танловида биринчи ўринни, “Бадиий ижодиёт фестивали”да дўппидўзлик бўйича иккинчи ўринни, “Техник ижодиёт фестивали”да учинчи ўринни олишга муваффақ бўлган. Шунингдек, тўгарак аъзоларидан Жамшид Бобожонов, Хуршид Ражаббоев ва Жавоҳир Хўжамуродовлар ҳам танловларда турли номинациялар бўйича ғолибликни қўлга киритишган.

Бу ерда шуғулланаётган ёшларнинг ўз касбининг усталари, меҳри дарё устозлар раҳбарлигида ўзлари танлаган йўналишлар бўйича ўтказилаётган машғулотларда фаол иштирок этиб, ўз иқтидорларини намоён қилаётганлари бизни ниҳоятда хурсанд қилди.

“Баркамол авлод” болалар марказидан олам-олам таассуротлар билан қайтар эканмиз, у ердаги ҳар бир тўгаракда иштирок этаётган ёшларимизнинг билим олишга, ҳунар ўрганишга ташналиги, орзулари ва камолот сари сидқидилдан интилишлари бизда уларнинг эртанги кунига, келажагининг порлоқ бўлишига катта ишонч уйғотди.

Севара ИБРОҲИМОВА, газетанинг жамоатчи мухбири.