MINNATDORChILIGIMIZ ChEKSIZ
Inson vujudi misli gul, deyishgani toʻgʻri ekan. Azob tortsa, damda soʻlib qolarkan.
Buni Xolimbeg ovulida yashovchi yaqinim Sanamjon Rajabovaning misolida ayniqsa yaqqol koʻrdim.
Shu yilning 8-oktyabrida kechqurun uning ichki aʼzolarida birdaniga kuchli ogʻriq boshlandi. Yarim tunda tuman tibbiyot birlashmasining shoshilinch tibbiy yordam boʻlimiga olib kelishdi va shifokorlar tibbiy yordam koʻrsata boshlashdi. Ogʻriqning zoʻridan bir kunda tanish qiyin darajada oʻzgarib qoldi. Tezkor tekshiruvlar natijasida uning oʻt qopida tosh yigʻilib, oʻt qopini chiritib yuborganligini aniqlashdi va zudlik bilan jarrohlik amaliyotini oʻtkazib, oʻt qopini olib tashlash kerak, degan xulosaga kelishdi.
Barcha qarindoshlar, yaqinlar, oila aʼzolari shifokorlar taklifiga rozilik berib, operatsiya muvaffaqiyatli chiqishini yaratgandan iltijo qilib, soʻrab turdilar.
Toʻrt soatga yaqin davom etgan operatsiyadan chiqib kelgan boʻlim mudiri Olimboy Shomurodov, shifokorlar Ikrom Sariboyev, Sanjar Ollamberganovlar bizga kesib olingan, chirib, koʻkarib ketgan oʻt qopini koʻrsatib, Sanamjon opani azoblab yurgan shu, endi qutuldi, hademay oyoqqa turib oilasiga qaytadi, - deyishdi.
Boʻlim shifokorlarining fidoyiliklari tufayli Sanamjon Rajabova olti kun oʻtib, haqiqatan ham binoyiday sogʻayib, oilasiga qaytdi.
Bu voqealarni oʻz koʻzim bilan koʻrib, tumanimizda tibbiyotning nechogʻlik rivojlanib ketganligini, shifokorlarimizning kasbiy mahorati tobora oshib, elimizga malakali tibbiy xizmat koʻrsatayotganligini sidqidildan his qildim. Yaqin yillar ichida ham buningdek murakkab operatsiyalar faqat Nukusda, Toshkentda bajarilar edi. Endi tumanimizning odamlari dard cheksa, uzoqqa bormay, tuman tibbiyot birlashmasida dardiga shifo topib ketishayapti.
Ayniqsa tibbiyot xodimlarining odobli, shirinsoʻzligini aytmaysizmi?
Men bu ishlarning boshida turgan tuman tibbiyot birlashmasi boshligʻi Olimboy Halimovga, murakkab operatsiyani muvaffaqiyatli oʻtkazgan Olimboy Shomurodov, Ikrom Sariboyev, Sanjar Ollamberganovlarga, ularga koʻmakdosh boʻlgan barcha hamshiralarga minnatdorchilik bildiraman. Ularga "El sogʻligʻi yoʻlida charchamang”, deyman.
Yoʻldosh RAJABOV,
mehnat faxriysi.
(Foto - http://uz24.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
