EL TANIGAN FIDOYI

Oʻtgan asrning 80-yillari oxiri. Sobiq SSSP tarkibidagi Pespublikalarda notinchlik hukm surar, millatchilik, demokratik qoʻzgʻalishlar avj olgan edi. Ana shunday tahlikali bir davrda, 1988-yilda umumtaʼlim maktabini tugatgan Bahodir ota-onasining duosini olib, Volgograd davlat pedagogika universitetining rus tili va adabiyoti fakultetiga hujjat topshirdi. Maktabda aʼlo baholarga oʻqigani sababli shu yiliyoq talabalar qatoridan joy oldi.

Universitet tahsili qiziqarli, dars beruvchi professor-oʻqituvchilar nihoyatda talabchan boʻlishsa-da, oʻsha davr ruhi talabalar hayotiga oʻz taʼsirini oʻtkazgan, ayrim yoshlar orasida guruhbozlik, millatchilik gʻoyalari ham tarqalib ulgurgandi. Ana shunday tahlikali davrda universitet pedagogika jamoasi talabalarga sabr-toqat va zukkolik bilan taʼlim berishar, aʼlochi talabalarni doimiy ravishda ragʻbatlantirib turishardi. Bahodir Boltaboyev to universitetni tugatgunga qadar ustozlarining aʼlochi va intizomli talabalari safida tahsil oldi.

1993-yilda universitetni imtiyozli tugatgan Bahodir oʻzi tugʻilib oʻsgan ovuldagi 32-sonli maktabda yosh avlodga rus tili va adabiyoti fanidan dars bera boshladi.

Ishchanligi va tashkilotchiligi bilan nazarga tushgan Bahodirni oradan 1-yil oʻtib – 1994-yilda Oʻzbekiston Yoshlar ittifoqi Amudaryo tuman qoʻmitasining umumtaʼlim maktablari tashkilotlari boʻlimi yoʻriqchisi vazifasiga tayinlashdi.

Tinib-tinchimas bu yigit bilan goho yoʻlda, goho tuman miqyosidagi yigʻilishlarda, baʼzan esa yoʻlimiz bir boʻlgani uchun Mangʻit-Qipchoq yoʻnalishidagi avtobuslarda uchrashib qolardik.

– Falon maktabda bunday tadbir bor, – taklif qilardi doim. – Hamma maktablarda shunday tadbirlar oʻtkazayotirmiz. Bilasiz-ku, har xil boʻlar-boʻlmas oqimlar, mafkuraviy xurujlar kun sayin avj olayotir, – kuyib-pishib gapirardi Bahodir. Uning jiddiylik zohir boʻlgan yuzida hech ham horgʻinlik sezilmasdi. Zamonning qalqib turganini, yoshlarning boʻsh vaqtlarini mazmunli oʻtkazishlari uchun bunday targʻibot-tashviqot tadbirlari juda muhimligini nainki taʼkidlardi, balki oʻzi ana shunday tadbirlarning tashkilotchisi ham edi oʻsha yillari.

Yoshlar bilan ishlashish borasida katta tajriba toʻplagan Bahodir Boltaboyev 23 yoshdayoq, juda qisqa fursatda Yoshlar ittifoqi tuman qoʻmitasi rahbariyatining ishonchini qozondi, tumanimiz yoshlari orasida obroʻ-eʼtibor topdi.

Oradan bir yil oʻtib, tashkilotchi va tashabbuskor bu yigitni Oʻzbekiston Yoshlar ittifoqi tuman qoʻmitasining mafkura boʻlimi mudirligiga tayinlashdi. Endi uning faoliyat koʻlami yanada kengaydi. Nafaqat umumtaʼlim maktablari oʻquvchi-yoshlari, balki tumanimizning barcha toifadagi yoshlari bilan ishlashish, yoshlar oʻrtasida giyohvandlik, odam savdosi, ommaviy madaniyat kabi yot gʻoya va illatlarga qarshi kurashish, sogʻlom va barkamol avlodni tarbiyalash, yoshlar ongini turli xil mafkuraviy xurujlardan himoya qilish kabi mavzulardagi maʼnaviy-maʼrifiy tadbirlar, ochiq muloqot shaklidagi davra suhbatlari tashkil etish, yoshlarning boʻsh vaqtlarini mazmunli oʻtkazish uchun sharoitlar yaratishdek qamrovi keng vazifalar tashabbuskori va ijrochisiga aylandi.

Oʻsha yillari oʻzim ishga qatnaydigan yoʻnalishdagi avtobuslarda Bahodirni juda kam koʻrardim.

Hech esimdan chiqmaydi: bir kuni ishdan ancha kech chiqdim. Mangʻit shahridan chiqaverishda, Mangʻit-Qipchoq yoʻli boʻyida yoʻlovchi mashinalardan biriga umid bilan qoʻl koʻtardim – toʻxtadi. Mashinaga chiqsam, oldingi oʻrindiqda Bahodir oʻtiribdi. Soʻrashib, omonlashdik.

– Kecha uyga borolmagandim. Ish koʻp, hisobotlar vaqti, paxta terimi deganidek... Ota-onam juda bezovta boʻlibdi. Bugun ham kechikib ketdim, – siz ham kechga qolibsiz-da, deganday gapirdi u.

Oʻsha yillari – 1994-1995-yillarda bozor iqtisodiyotiga oʻtish davri qiyinchiliklari yoshlar tashkilotlarini ham chetlab oʻtmadi. Oʻzbekiston Yoshlar ittifoqi tuman qoʻmitasi rahbaridan tortib, barcha mutaxassislari ham kun boʻyi dalama-dala yurishar, yoshlar brigadalarini tuzib, paxta terimiga jalb qilishar, oʻzlari ham paxta terishar edi. Horib-tolib daladan qaytgan Bahodir oʻshanda kechalari qoʻmita ofisida oʻtirib, oʻzi boshqaradigan mafkura boʻlimining ishlarini bajarardi.

Fidoyilik, masʼuliyatni his qilish, tirishqoqlik kabi sifatlari bois u 25 yoshida Oʻzbekiston Yoshlar ittifoqi Amudaryo tuman qoʻmitasi birinchi kotibligiga saylandi.

1996-2002-yillarda “Kamolot” jamgʻarmasi, keyinchalik “Kamolot” YoIH tuman boʻlimi Kengashi raisi, 2002-2009-yillarda tuman hokimligining ijtimoiy masalalar boʻyicha bosh mutaxassisi, tuman hokimining yordamchisi lavozimlarida sidqidildan xizmat qildi. Qaysi vazifani ado etishidan qatʼiy nazar, zimmasidagi masʼuliyat va burchni chin dildan his eta oldi va atrofidagilarning ishonchini qozondi. Quyidan to yuqorigacha oʻzi rahbarlik qilgan boʻlimlar va sohalar faoliyatini chuqur oʻrganib, oʻziga xos tajriba maktabini yaratdi. Koʻplab yoshlarga ustozlik qildi, oʻnlab shogirdlar tayyorladi. Uning shogirdlari ayni paytda fan, taʼlim, madaniyat va maʼrifat sohalarining bilimdonlari, jonkuyarlari sifatida el-yurt ravnaqi yoʻlida xizmat qilmoqda.

2009-yildan buyon shu kungacha tuman hokimligining tashkiliy-nazorat guruhi rahbari sifatida faoliyat yuritayotgan Bahodir Boltaboyev guruh toʻgʻrisidagi Nizomda koʻrsatilgan ijro intizomini mustahkamlash, kadrlarni tanlash, joy-joyiga qoʻyish uchun nomzodlarni har tomonlama oʻrganish, kadrlar zahirasini shakllantirish, saylovlarni tashkil etish va oʻtkazish, xalq deputatlari tuman Kengashi deputatlarining oʻz vakolatlarini amalga oshirishida koʻmaklashish kabi vazifalarni sidqidildan ado etib kelmoqda.

Ayni kunlarda Bahodirning xonadoni shogirdlari, doʻst-u birodarlari tashrifidan fayzga toʻlgan. Yoshlar hayotiga oid muammolarni hal qilish, yoshlar bilan ishlashishda fidoyilik koʻrsatish, istiqlol gʻoyalarini yanada mustahkamlash, yosh avlod ongida vatanparvarlik, oʻzaro mehr-oqibat, intiluvchanlik va tashabbuskorlik tuygʻularini uygʻotish, mamlakatimizda yoshlarga oid davlat siyosatini roʻyobga chiqarishdagi fidokorona xizmatlari uchun hamda mustaqilligimizning 27 yilligi munosabati bilan Bahodir Boltaboyev Qoraqalpogʻiston Pespublikasi Joʻqorgʻi Kengesi Prezidiumining qaroriga koʻra “Qoraqalpogʻiston Pespublikasida xizmat koʻrsatgan yoshlar ustozi” faxriy unvoni bilan mukofotlandi.

Xalqimizda shunday hikmatli ibora bor: “El fidoyisini el taniydi, hurmat qiladi”. El tanib, hurmat qilgan, mehnatlari eʼtirof etilib, Vatanning yuksak mukofotiga sazovor boʻlgan Bahodir Boltaboyevga bundan ham yuksak unvonlar nasib qilishini tilaymiz!

Pobiya YOʻLDOShEVA.