Beshtomlik fermerning issiqxonasida pomidor pishib yetildi

Tumanimizning Beshtom mahallasida yashovchi “Jalolov Qadamboy” fermer xoʻjaligi raisi Ibodulla Yarmonovni mahalla ahli haqiqiy dehqon va tadbirkor sifatida yaxshi bilishadi.

Ishbilarmon fermer Ibodulla Yarmonov 2009-yilda fermer xoʻjaligini tashkil etganidan keyin xoʻjalik qoshida issiqxona tashkil etib, yerdan samarali foydalanishni oʻz oldiga maqsad qilib qoʻygan edi. U dastlab 2017-yilda 12 sotix yerga issiqxona qurib, hayolida oʻylab yurgan ishlarini amaliyotda sinab koʻrishga qaror qildi. Natija esa kutilganidan ham ziyoda boʻldi. Kaftdekkina yerdan oilasi xarajatlarining bir qismini qoplashga yetadigan daromad oldi. Yerdan yil davomida bir necha marta ekin ekib, hosil olgani esa bu daromadlarini yanada koʻpaytirdi. Shundan keyin ishbilarmon fermer bu ishga astoydil kirishib, issiqxonadan olgan daromadi evaziga fermer xoʻjaligina qoʻshimcha tarmoqlarni yoʻlga qoʻya boshladi. Ayni kunda issiqxonada pomidor, bodring va har xil gul koʻchatlari ham yetishtirilayapti.

Tinib-tinchimas tadbirkor fermer Ibodulla Yarmonov yana bir xayrli ishga qoʻl urdi. U “Mikrokreditbank”ning tuman filialidan 85 million soʻm kredit olib, sigʻimi 100 tonnalik muzlatkich qurishga muvaffaq boʻldi. Ayni kunda ushbu muzlatkichda oʻz fermer xoʻjaligida va ovul dehqonlari tomonidan yetishtirilgan qishloq xoʻjaligi mahsulotlari sifatli saqlanayapti.

Bugungi kunda fermer xoʻjaligida bahorgi ekish mavsumiga puxta tayyorgarlik koʻrilayapti. Fermer xoʻjaligining ichki suv yoʻllarini tozalash, mahalliy oʻgʻit jamgʻarish ishlari shu kunning talablari darajasida tashkil etilib, xoʻjalikdagi issiqxonada yetishtirilgan pomidorlarni bozorga tayyorlash, bodring va gul koʻchatlarini parvarishlash ishlariga ham alohida eʼtibor berilmoqda. Bu ishlarda Paima Jalolova va Gulzoda Xolmurodova kabi fermer xoʻjaligi ishchilari tinim bilmasdan hamjihatlikda mehnat qilishmoqda.

Yerdan yil davomida hosil olib, uni bozorga chiqarish orqali oilasining farovonligi va el-yurt dasturxonining toʻkinligi yoʻlida halol mehnat qilayotgan bu kabi fermer xoʻjaliklari safining koʻpayishi mamlakatimiz iqtisodiyotining yanada rivojlanishiga xizmat qiladi.

A.Jumaniyozov.