OʻZBEKISTON RESPUBLIKASI YoShLAR IShLARI AGENTLIGI AMUDARYo TUMANI BOʻLIMI BOShLIGʻI TAYINLANDI
14-sentyabr kuni tuman hokimligi majlislar zalida Oʻzbekiston Respublikasi Yoshlar ishlari agentligi Amudaryo tumani boʻlimi boshligʻini tayinlash yuzasidan majlis boʻlib oʻtdi.
Majlisda Yoshlar ishlari agentligi Qoraqalpogʻiston Respublikasi boshqarmasi boshligʻi, senator Abatbay Daniyorov, tuman hokimi Sultonboy Yoʻldashev, hokim oʻrinbosari Mahmud Shermetov, tumandagi korxona-tashkilotlar rahbarlari, faol yoshlar hamda ommaviy axborot vositalari vakillari ishtirok etdilar.Yigʻilishni tuman hokimi Sultonboy Yoʻldashev kirish soʻzi bilan ochdi. Tuman hokimi oʻz soʻzida davlatimiz rahbari tashabbusiga koʻra, yoshlar bilan bogʻliq soha va yoʻnalishlarda yagona davlat siyosatini amalga oshirish, yoshlar siyosati sohasidagi qonun hujjatlariga rioya etilishi ustidan davlat nazoratini oʻrnatish, shuningdek, yoshlarning huquqlari, erkinliklari va huquqiy manfaatlarini himoya qilish, ularga ijtimoiy-iqtisodiy tarafdan yordam koʻrsatish, bandligini taʼminlash, yoshlarga oid davlat siyosatini sifatli hamda oʻz vaqtida amalga oshirish maqsadida Yoshlar ishlari agentligi tashkil etilganligini taʼkidladi.
Taʼkidlanganidek, bu borada Prezidentimizning “Oʻzbekiston Respublikasida yoshlarga oid davlat siyosatini tubdan yangilash va yangi bosqichga olib chiqish toʻgʻrisida”gi Farmoni hamda “Oʻzbekiston Respublikasi yoshlar ishlari agentligi faoliyatini tashkil etish toʻgʻrisida” Qarori imzolangan edi. Ushbu qonun hujjatlari asosida Yoshlar ishlari agentligi – yoshlarga oid davlat siyosatini ishlab chiquvchi va amalga oshiruvchi, yoshlarning intellektual, ijodiy va boshqa yoʻnalishdagi salohiyatini kamol toptirish uchun sharoitlar yaratishga qaratilgan chora-tadbirlarni amalga oshiruvchi davlat boshqaruv organi etib belgilandi. Qoraqalpogʻiston Respublikasi, viloyatlar va Toshkent shahrida Agentlikning boshqarmalari, tumanlarda (shaharlarda) boʻlimlari tashkil etildi.
Yigʻilishda Yoshlar ishlari agentligi Qoraqalpogʻiston Respublikasi boshqarmasi boshligʻi, senator Abatbay Daniyorov soʻzga chiqib, mamlakatimizda yoshlarni vatanparvarlik, milliy anʼana va qadriyatlarimizga hurmat ruhida tarbiyalash, maʼnaviy yetuk va jismonan sogʻlom barkamol avlodni voyaga yetkazish, ularning huquq va manfaatlarini himoya qilish borasida salmoqli ishlar amalga oshirilib, yoshlar masalasi davlat siyosatining eng ustuvor yoʻnalishlaridan biri ekanligi xususida soʻz yuritdi. Tashkil qilinayotgan Yoshlar ishlari agentligi yurtimizdagi yoshlarga oid davlat siyosatida eng katta yangilik boʻlib, uning joylardagi boʻlimlariga munosib nomzodlarni tayinlash muhimligini alohida taʼkidladi. Shuningdek, Oʻzbekiston Respublikasi Yoshlar ishlari agentligi Amudaryo tumani boʻlimi boshligʻi lavozimiga yoshlar siyosatidagi islohotlarning tumandagi ijrosi borasida oʻzining salmoqli hissasini qoʻshib kelayotgan yoshlardan biri boʻlgan Davletov Jasurbek Xolmurotovich tayinlanganligini maʼlum qildi.
Jasurbek Davletovning shu davrga qadar mehnat faoliyati, yaʼni Yoshlar Ittifoqi tuman Kengashi raisi oʻrinbosari, “Kamalak” bolalar tashkiloti raisi lavozimida samarali faoliyat yuritib kelganligi toʻgʻrisida maʼlumot berildi. Uning ish faoliyati mobaynida tumanimizdagi yosh avlod egalarining, jamiyat hayotida tutgan oʻrnini mustahkamlash, tashabbuskor yoshlarni qoʻllab-quvvatlash, yoshlarning orzu-intilishlari, maqsadlariga erishishlarida amaliy yordam koʻrsatish borasida oʻzining munosib hissasini qoʻshganligi alohida aytib oʻtildi.
Yigʻilish ishtirokchilari Yoshlar ishlari agentligi tuman boʻlimi boshligʻi vazifasiga tayinlangan Jasurbek Davletovning kelgusidagi ishlariga muvaffaqiyat tilashdi.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
