PROBATsIYa GURUHI NAZORATIDAGI 4 NAFAR MAHKUM MUDDATIDAN ILGARI JAZODAN OZOD ETILDI

Oʻzbekiston Respublikasi Ichki ishlar organlari huzurida tashkil etilgan Probatsiya xizmati mamlakatimizda  jazoni ijro etish tizimini takomillashtirish, qayta jinoyat sodir etilishining oldini olish, mahkumlarni axloqan tarbiyalashda va ijtimoiy moslashtirishda muhim ahamiyat kasb etmoqda.
Oʻzbekiston Respublikasi Prezidentining 2018 il 7-noyabrdagi qaroriga  muvofiq 2019-yil 1-yanvardan faoliyati boshlangan Probatsiya xizmati  ozodlikdan mahrum etish bilan bogʻliq boʻlmagan jazolarning ijro etilishini nazorat qilish bilan shugʻullanadi. Sud hukmi yoki ajrimi bilan ozodlikdan mahrum qilish bilan bogʻliq boʻlmagan jazolarga loyiq koʻrilgan shaxslar tomonidan jazoning ijro etilishini taʼminlaydi. Qarorga muvofiq Probatsiya xizmati va uning hududiy boʻlinmalari ozodlikdan mahrum qilish bilan bogʻliq boʻlmagan jazo ga mahkum etilganlar bilan ishlashishda faoliyatini boshqada davlat organlari, jamoat tashkilotlari bilan oʻzaro hamkorlikda olib boradi.
Shu yilning 23-oktyabrida Jinoyat ishlari boʻyicha tuman sudida ochiq sud majlisi oʻtkazildi. Unda Probatsiya guruhi nazoratida turgan 4 nafar mahkum belgilangan jazosidan muddatidan ilgari ozod etildi. Mazkur ochiq sud majlisida Jinoyat ishlari boʻyicha tuman sudi raisi  Sultonmurod Davletmurodov, tuman prokurorining katta yordamchisi Bahrom Koshanov, tuman ichki ishlar organlari Probatsiya guruhi katta inspektori Islom Jabborberganovlar qatnashdilar.
Sud majlisida tuman Ichki ishlar organlari Probatsiya guruhi tomonidan keltirilgan 4 ta taqdimnomalar muhokama qilindi. Sud majlisida tuman Ichki ishlar organlari Probatsiya guruhi nazoratida turgan,  muqaddam jinoyat sodir etib, Oʻzbekiston Respublikasi Jinoyat Kodeksining turli moddalariga koʻra aybli deb topilgan, ozodlikdan mahrum qilish bilan bogʻliq boʻlmagan jazoga hukm qilingan uch nafar mahkumning oʻtgan davr mobaynida oʻrnatilgan tartib-qoida talablarini bajarganligi va mehnatga halol munosabatda boʻlganligi eʼtiborga olindi. Sud qaroriga koʻra, ushbu mahkumlar oʻtalmagan jazo muddatidan Oʻzbekiston Respublikasi Jinoyat  kodeksining 73-moddasiga asosan muddatidan ilgari, shartli ravishda ozod qilindi.
Shuningdek, Oʻzbekiston Respublikasi Jinoyat Kodeksining 266-moddasi bilan aybli deb topilgan 1 nafar mahkum jazoni oʻtash vaqtida mehnatga yaroqsiz boʻlib qolganligi tufayli  tayinlangan axloq tuzatish  ishlari jazosidan ozod qilindi.
Tuman Ichki ishlar organlari huzurida tashkil etilgan Probatsiya guruhi oʻz faoliyati davomida shartli hukm qilingan, jazoni oʻtashdan muddatidan ilgari ozod etilgan shu kabi shaxslarning xulq-atvori yuzasidan taʼsirchan nazoratni amalga oshirmoqda. Nazorat ostidagilarning qayta jinoyat sodir etish xavfini barvaqt aniqlab, oldini olish uchun profilaktik ishlarni olib bormoqda. Natijada ozodlikdan mahrum qilish bilan bogʻliq boʻlmagan  jazolarga hukm qilingan shaxslarda sogʻlom dunyoqarash shakllanib, oʻz xatolaridan tegishli xulosalar olishayapti.
    Probatsiya xizmati xodimlarining asosiy vazifasi nazorat ostidagi shaxslarning tuzalish yoʻliga oʻtishiga, jinoyatlarning oldi olinishiga erishishdir.

Oygul RAJABOVA.